Keshendi sharalar Qazaqstannyń mádenı murasyn qorǵaý jáne saqtaý baǵytyndaǵy ortalyq jáne jergilikti atqarýshy organdardyń, IýNESKO jáne ISESKO (Islam áleminiń bilim, ǵylym jáne mádenıet uıymy) isteri jónindegi QR Ulttyq komıssııasy músheleriniń, sondaı-aq tarıhshy ǵalymdardyń, arheologtardyń, etnograftardyń jáne qoǵamdyq uıym ókilderiniń kúsh-jigerin úılestirýge baǵyttalǵan.
Bul strategııalyq bastama Qazaqstannyń IýNESKO-nyń álemdik muralar tizimine engizilgen jáne engizilýi múmkin mańyzdy tarıhı jáne sáýlet eskertkishterin saqtaý men materıaldyq emes mádenı mura elementterin qorǵaýǵa arnalǵan. Olarǵa dástúrler, salt-joralar, til, mýzyka, qolóner jáne basqa da qundylyqtar jatady.
Mınıstr Aıda Balaeva otyrys barysynda álemdik mádenı jáne tabıǵı murany qorǵaý jónindegi Konvensııanyń erejelerin oryndaý úshin barlyq múddeli taraptardyń júıeli jáne úılesimdi jumys isteý qajettigine erekshe toqtaldy.
Jumys tobynyń otyrysynda Qazaqstannyń mádenı murasyn qorǵaý jáne nasıhattaý boıynsha úsh kishi jumys tobynyń josparlary tanystyryldy:
Materıaldyq emes mádenı mura boıynsha kishi jumys tobynyń basty mindeti – mýzeıler, qoryqtar, kitaphanalar qyzmetkerleriniń biliktiligin arttyrý, sondaı-aq joǵary oqý oryndaryna pánaralyq bilim berý baǵdarlamalaryn engizý. Bul Qazaqstanda dástúrli qolóner, nýmızmatıka, bonıstıka, ulttyq oıyndar, sándik-qoldanbaly buıymdardy qalpyna keltirý boıynsha dıplomdy mamandardy daıyndaýǵa múmkindik beredi.
Sonymen qatar, mekteptegi «Dene shynyqtyrý» pánine qazaqtyń dástúrli oıyndaryn engizý máselesi qarastyrylýda.
Kishi toptyń josparynda materıaldyq emes mádenı murany ınventarızasııalaý, qazaqtyń kıiz úıin, kilem toqý tehnologııasyn qujattandyrý boıynsha zertteý jumystaryn uıymdastyrý bar.
IýNESKO qorǵaýyndaǵy nysandar boıynsha kishi jumys toby álemdik mádenı jáne tabıǵı murany qorǵaý jónindegi Konvensııa sheńberinde Qazaqstandaǵy IýNESKO qorǵaýyndaǵy nysandarmen jumys isteıdi. Basty mindetteri – basqarý, qaýipsizdik jáne ınfraqurylym máselelerin sheshý.
Sonymen qatar, sarapshylar «Uly Jibek joly: Ferǵana-Syrdarııa dálizi», «Uly Jibek joly: Kaspıı-Edil dálizi» sııaqty transulttyq serııalyq nomınasııalar boıynsha jumystar júrgizýde. Bul baǵytta Atyraý, Batys Qazaqstan, Qyzylorda jáne Mańǵystaý oblystarynyń jergilikti atqarýshy organdarymen birlesken jumys atqarylýda.
Qujattyq mura boıynsha kishi jumys toby IýNESKO-nyń «Álem jady» baǵdarlamasy aıasynda Qazaqstannyń qujattyq murasyn saqtaý jáne ilgeriletý baǵytynda jumys isteıdi. Qazirgi ýaqytta Abaıdyń «Qara sózderi» men Mashhúr Júsip Kópeıulynyń qoljazbalaryn IýNESKO-nyń «Álem jady» tizimine engizýge daıyndyq jumystary júrgizilýde.
2003 jyly bul tizimge Qoja Ahmet Iаsaýıdiń qoljazbalary, 2005 jyly «Nevada-Semeı» antııadrolyq qozǵalysynyń qujattary engizilgen. Sonymen qatar, Qazaqstannyń jazbasha murasynyń memlekettik tizilimin jasaý máselesi qarastyrylýda.
Úsh jumys kishi toby usynǵan josparlar Qazaqstannyń mádenı murasyn qorǵaý jáne damytý boıynsha sharalardy qamtıdy. Bul josparlardy Mádenıet jáne aqparat mınıstrligi júzege asyrady. Atalǵan sharalar Qazaqstannyń mádenı murasyn qorǵaý jáne damytý isin jańa deńgeıge kóterýge múmkindik beredi.
