Sýretti túsirgen – Jangeldi ÁBDIǴALYM
Jańa ortalyq oblystyq kópsalaly balalar aýrýhanasynda ornalasqan. Ortalyq jergilikti atqarýshy organdardyń, «Qazaqstan halqyna» qorynyń seriktesteri men mesenattardyń birlesken kúsh-jigeriniń arqasynda ashylyp otyr.
Ońaltý ortalyǵynyń saltanatty ashylý rásimine oblys ákiminiń orynbasary Oraz Táýirbekov, «Qazaqstan halqyna» qoǵamdyq qorynyń donorlarymen strategııalyq josparlaý jáne ózara is-qımyl bóliminiń basshysy Shyńǵys Sharapıev, «ERG Kómek» qoǵamdyq qorynyń atqarýshy dırektory Mádı Ismaılov, «Qamqorshylyq qory» qoǵamdyq qorynyń dırektory Araılym Erkinova qatysyp, jańa medısınalyq mekemeniń jumysyna sáttilik tiledi.
Bul ıgilikti jobany iske asyrýǵa qarjylyq demeýshilik kórsetken – «Eurasian Resources Group» kompanııasy. «Qamqorlyq qory» qoǵamdyq qory ortalyqty zamanaýı jabdyqtarmen jabdyqtaýǵa, mundaǵy mamandardyń kásibı oqýyn tereńdetýge kómegin tıgizdi.
– Bizge osy oblysta ońaltý ortalyǵynyń ashylýy – asa mańyzdy. О́ıtkeni Qaraǵandy oblysy kompanııamyzdyń týǵan óńiri sanalady. Bıyl «ERG» kompanııasynyń 30 jyldyǵy keń kólemde atap ótilip jatyr. Bul ortalyq – elimizdiń densaýlyq saqtaý salasyn damytýǵa, ınklıýzıvti qoǵamdy qoldaýǵa qosqan úlesimiz. Erekshe qajettiligi bar balalarǵa tolyqqandy ómir súrýge, áleýmettik beıimdelýge múmkindik bere alatynymyzdy maqtan tutamyz, – dedi Qazaqstandaǵy «Eurasian Resources Group» kompanııasynyń bas dırektory Serik Shahajanov.
Byltyrdan beri aýrýhanada «Qamqorlyq» erte aralasý bólimshesi jumys isteıdi. Onda osy ýaqytqa deıin damý kemistigi bar júzdegen bala mamandardyń kómegine júgindi. Munda balalar 3 aıynan bastap 3 jasqa deıingi aralyqta qabyldansa, endi jańa ortalyqta 18 jasqa deıingi balalarǵa em-dom kórsetiledi. Balanyń týǵannan bastap, eresek jasqa deıingi densaýlyǵy, jaǵdaıy úzdiksiz qadaǵalaýda bolady. Ortalyqta nevrolog-dárigerlerdi, reabılıtologterdi, logopedterdi, defektologterdi, emdik-deneshynyqtyrý nusqaýshylary men psıhologterdi qosa alǵanda, kásibı kópsalaly komanda qurylyp, óz jumystaryna kiristi.
– Bizde barlyq qajetti jabdyq bar. Balanyń jasyna jáne boıyna baılanysty túrli vertıkalızatorlar qoldanylady. Barlyq maman daıarlyqtan tolyq ótti. Olar aýrýhananyń bazasynda oqyp, tájirıbesin jetildirdi. Astana, Qostanaıǵa da bardy. Ońaltý jumysynyń sapasy joǵary bolýy maqsatynda dárigerlerdiń biliktiligin únemi arttyryp otyramyz, – deıdi oblystyq balalar aýrýhanasy dırektorynyń orynbasary Nına Derkach.
«Qazaqstan halqyna» qory álemdik brendterden saraptamalyq synypty medısınalyq ońaltý jabdyqtarymen jaraqtandyrýǵa 6 mlrd teńgeden asa qarajat bóldi. Oǵan BOS-terapııa kabınetteri, ınteraktıvti, sensorlyq bólmeler, ımmersııalyq vanna sekildi biregeı tehnologııalar jabdyqtaldy. Bulardyń bári – erekshe qajettilikteri bar balalarǵa úlken kómek.
Igi jobany qoǵamdyq qor «QN Ońaltý ortalyqtary», «QN Aýdandyq ońaltý ortalyqtary» qaıyrymdylyq baǵdarlamalaryn iske asyrý sheńberinde júzege asyryp otyr. Aldaǵy ýaqytta qor barlyq óńirde erekshe qajettilikteri bar balalarǵa arnalǵan dál osyndaı 25 ońaltý ortalyǵyn ashpaq. Jaqynda Ulytaý oblysynda ashyldy. Endi taıaý kúnderi osyndaı mekemeniń ashylýy Pavlodar oblysy men Shymkent qalasynda josparlanyp otyr, deıdi qor basshylyǵy.
Qaraǵandy oblysy
