Sýret: 24.kz
Daryndy balalardy qoldaý maqsatyndaǵy bastamalar 2021 jyly qolǵa alynǵan. Májilis depýtattarynyń usynysymen memleket halyqaralyq olımpıada jeńimpazdaryn ýnıversıtetterge grantpen qabyldaý jáne aqshalaı syıaqy berý týraly sheshim qabyldaǵan. Bul sheshim daryndy balalardyń eńbegin baǵalaýdaǵy alǵashqy qadam boldy. Alaıda halyqaralyq ǵylymı jarystarda jeńiske jetken jetkinshekter mundaı múmkindikten qalys qalǵan edi. Depýtat Ashat Aımaǵambetovtiń aıtýynsha, olardyń da jetistigi baǵalanýy kerek degen bastamany úkimet qoldamaǵan. «Sol jyly halyqaralyq ǵylymı jarystardyń jeńimpazdaryn qoldaýdy engizý týraly normany kelisý prosedýrasynan ótkize almadyq. Álemdik robottehnıka chempıonattarynda jáne basqa da ǵylymı baıqaýlarda jeńiske jetken balalardyń nege osyndaı qoldaý almaıtynyn túsindirý qanshalyqty qıyn bolǵany áli esimde», dep jazdy A.Aımaǵambetov áleýmettik jeli paraqshasynda.
Degenmen tabandy jumystyń arqasynda usynys qabyldandy. Endi halyqaralyq ǵylymı jarystardyń jeńimpazdary olımpıada jeńimpazdarymen teń dárejede granttarǵa ıe bolady. Bul qadam daryndy balalardyń senimin arttyryp, olardyń jetistikterine laıyqty baǵa berý maqsatynda jasalyp otyr.
«Kelesi qadam – balalarǵa aqshalaı syıaqylar berý normasyn engizý. Biz osy máseleni sheship, 5 mıllıon teńgege deıingi syıaqyny olardyń da alýy úshin jumys isteıtin bolamyz. 2019 jyldan bastap memleket daryndy balalardy qoldaý úshin kóp nárse jasady. Ashyǵyn aıtqanda, bul máseleler Prezıdent Qasym-Jomart Toqaevtyń jeke ustanymy men qoldaýynyń arqasynda sheshilip keledi. Endi mesenattardyń da osy daryndy balalarǵa nazar aýdarýy qajet. Mesenattar tek sportshylardy ǵana emes, sonymen qatar jas ǵalymdar men talanttardy qoldasa eken deımin, sebebi dál osy balalar elimizdiń bolashaǵyn qalyptastyrady», deıdi depýtat.
Bul bastamalar daryndy jastardyń bilim alýyna jol ashyp qana qoımaı, olardyń ǵylymı-zertteýshilik jumystaryn odan ári damytýǵa múmkindik beredi. Daryndy balalardyń jetistigin baǵalap, qoldaý kórsetý – ult bolashaǵyna salynǵan utymdy ınvestısııa ekeni sózsiz.
