foto: ashyq derekkóz
«Shapyrashty» dep atalatyn turǵyn úı alabynda araq-sharap satylymda múldem joq. Úsh jyl buryn aqsaqaldar alkogolden bas tartý týraly bastama kóteripti. Aǵa býynnyń usynysyn kópshilik qoldap, sodan beri mereke kúnderi men otbasylyq is-sharalardy ishimdiksiz atap ótedi.
«Shapyrashty» turǵyn úı alaby qalanyń shet jaǵynda ornalasqan. Munda tórt júzden astam adam turady. Azyq-túlik dúkenderinde araq-sharap múldem satylmaıdy. Jastardyń zııandy ádetten boıyn aýlaq ustaýyna úlkender dán rıza.
«Jaqsy sóz qazaqta «Mynaý qarttarynyń deıdi, aıtatyn ósıeti bolmasa, jastarynyń qasıeti bolmaıdy», deıdi. Bul aqsaqaldardyń myna jastarǵa úıretken tárbıesi ǵoı endi. Aýylymyzda eki dúken bar. Ekeýinde de ishimdik satylmaıdy», deıdi qala turǵyny Nurmahan Bekbosynov.
Turǵyndardyń alkogoldi ishimdikten bas tartýynan kásipkerlerdiń sharýasyna eshqandaı nuqsan kelmepti. Kerisinshe, kókónis pen jemis-jıdekke suranys artqan. Sút ónimderi de tez satylyp ketedi. Kópshiliktiń salaýatty ómir saltyn ustanýy ýchaskelik polısııa ınspektorynyń da jumysyn jeńildetipti. Qazir turmystyq zorlyq-zombylyq, kóshe tóbelesi, urlyq sııaqty zańbuzýshylyq deregi azaıǵan.
«Sońǵy ýaqytta Shapyrashty yqshamaýdanynda quqyqbuzýshylyq múldem joq deýge de bolady. Úsh jyldan beri polısııaǵa birde-bir ret shaqyrtý túsken joq», deıdi ýchaskelik polısııa ınspektory Talǵat Aldııarov.
Osylaısha Shymkenttegi shaǵynaýdan úlgili eldi mekenge aınaldy. Taıaýda munda 1200 adamǵa arnalǵan sport kesheni ashyldy. Ozyq úlgidegi mádenıet úıi jáne ulttyq at sportyna beıimdelgen stadıon da bar. Qýantarlyǵy, ishimdikten bas tartqan yqshamaýdanǵa qonys aýdarýshylardyń sany jyldan jylǵa artyp keledi.
