Osyndaı ónegeli isimen kópke úlgi bolǵan azamattyń biri Jambyl Baıǵonov. Memlekettik qyzmette júrip ońtústik jurtyna óziniń iskerlik qabiletimen, ultjandy qasıetimen tanylǵan tulǵa. Ońtústiktiń kıeli topyraǵy sanalatyn Báıdibek aýdany Shaıan aýylynyń týmasy. Asyl tekti babamyzdyń atyn ıelengen bul aımaqta esimderi respýblıkaǵa taraǵan qanshama myqty kisiler dúnıege kelgen. Solardyń arasynan Jambyl Baıǵonovtaı jampoz jandy bólip atasaq bolady.
Memlekettik qyzmet isinde shyńdalǵan azamat bir kezderi Báıdibek, Ordabasy, Saryaǵash aýdandarynda ákim bolyp qyzmet atqardy. Odan bólek qazirgi Túrkistan oblysynyń ekonomıka salasyna jaýapty basqarmasynda basshy boldy. Erekshe aıta keter jáıt, 1998-2002 jyldary ózi týyp-ósken Báıdibek aýdanynyń tizginin ustady. Toqsanynshy jyldardyń aıaǵy tutas elimiz úshin qıyn kezeńder bolǵany jasyryn emes. Ásirese aýyldyń turmysyn jaqsartýǵa múmkindikter kelmeı jatty. Sondaı kezde J.Baıǵonov qıyndyqtan shyǵar joldar taýyp, aýdannyń áleýmettik-ekonomıkalyq mádenı tirshiligin túzeýge bar kúsh-jigerin saldy. Sonyń bir mysalyn aıtsaq, aýyldardyń ınfraqurylymyn damytýǵa úlken kúsh jumsady. Ol kezde keńes odaǵynan jóndeý kórmegen joldar tozyp ketken edi. Adamdar júretin trotýardy jóndeý úshin asfalt tapshylyǵyna qaramaı taýdyń tep-tegis jyltyr tastaryn aıaqjoldarǵa tósetti. Tek Shaıan emes, búkil Qazaqstannyń tarıhı-mádenı eskertkishi bolyp tabylatyn Appaq ıshan meshitiniń qalpyna keltirý jumystaryn qolǵa aldy. Sol tusta tarıhı nysan jóndeýdi qatty qajetsinip turǵan. Qurylysyna tıisti qarjy qarastyryp, meshittiń buzylǵan jerlerin jóndep, el ıigiline qaıta tapsyrdy. Bul shyn máninde aýdan tarıhy úshin este qalarlyq oqıǵa boldy. Bir kezderi halqymyzdyń rýhanııatyna qyzmet istegen meshittiń qaıta jańǵyryp túleýi eldiń mádenı-rýhanı ómirindegi eleýli jańalyqqa aınaldy. Shaıandyqtardyń, kıeli ońtústik halqynyń maqtanyshy bolǵan tarıhı nysannyń ashylǵanyna barsha jurt balasha qýandy. Meshittiń saltanatty ashylý rásimine sol kezdegi oblys ákimi Berdibek Saparbaevtyń ózi kelip qatysqan edi. Osy kúnde elimizden, shetelden týrıster aǵylyp keletin Báıdibek ata, Domalaq ana keseneleriniń jóndeý kórip, qalpyna kelýi Jambyl Baıǵonovtyń eńbeginiń arqasy.
Ultyn súıgen azamat memlekettik qyzmette sharýadan qoly bosamaı júrse de ónerdi janynan eshqashan tastamaǵan. Qazaq aıtpaqshy, «óner dese, ishken asyn jerge qoıady». Sondyqtan bolar, onyń úıine qonaq bolyp túsken adam birinshi bolyp alýan túrli mýzykalyq aspaptarǵa nazary aýady. Sol úshin de aýdannyń óner salasynda ter tógip júrgen barsha azamat ol kisini qurmettep qadir tutady.
Búginde paıǵambar jastan asqan el aǵasy zeınetkerlik demalysta. Bala-shaǵasy men nemereleriniń ortasynda solardyń rahatyn kórip otyr. «Beınet túbi – zeınet» degen osy da. Qarııalyq jasqa jetken ardaqty azamatqa tek densaýlyq pen baqytty ǵumyr tileımiz.
Zaınıdın ABDÝAITOV,
eńbek ardageri,
Báıdibek aýdany, Shaıan aýyly
