Búginde Janasbekteı jaýyngermen bir sapta qyzmet etip júrgenine maqtanatyn ulandyqtar kóp. 6699 áskerı bóliminiń áskerı qyzmetshisi – halqyna adal sarbaz, otbasynda úlgili áke. Osylaı degen general-maıor Qaırat Úmbetov ónegeli otbasyna arnaıy kelip, balalarǵa bazarlyq syılap, qarýlasynyń otbasymen jaqynyraq tanysýdy jón kórgen.
«Ulttyq ulan qolbasshylyǵy qashanda qatarymyzda qyzmet etip júrgen kópbalaly otbasylarǵa erekshe kóńil bólip, olarǵa áleýmettik qoldaý tanytyp keledi. Búgingi kezekti qyzmettik saparymda osyndaı bir ónegeli otbasymen júzdesý sáti tústi», dedi ol.
Kópshilikke málim, bıyl mamyrda Janasbek kózsiz erlik tanytyp, jurt yqylasyna ıe boldy. О́skemen qalasynda Úlbi ózeniniń jaǵasynda serýendep júrgen ol sýǵa batyp, aınalasynan kómek suraǵan qyzdy baıqaıdy. О́zenniń qatty aǵysyna qaramastan, sýǵa lap qoıǵan Janasbek boıjetkendi ózen jaǵasyna shyǵaryp, alǵashqy medısınalyq kómek kórsetken. Jaýyngerdiń jankeshti áreketiniń arqasynda qyz ólim aýzynan aman qaldy. Bul erligi úshin efreıtor Memleket basshysynyń Jarlyǵymen III dárejeli «Aıbyn» ordenimen marapattaldy.
– Salqyndyǵy shekeden ótetuǵyn Úlbi ózeni esime tússe, denem qazir de titirkenip ketedi. Shynymdy aıtsam, sýǵa túsýge qumar adamdar qatarynan emespin. Biraq mundaı jaǵdaıda áskerı qyzmetshi bolǵandyqtan, dereý shara qoldanyp, qorqynyshyńdy umytý qajet. О́skemendi kesip ótetin qaı ózenniń bolsyn aǵysy qatty. Al kóktem mezgilinde, ıaǵnı sý kóterilgen shaqta ózenge túsý – tilsiz jaýdyń bir sátte qurbanyna aınalýmen birdeı. Sondyqtan qala turǵyndaryna sýǵa túsýge ruqsat etilgen ıirimi az arnaıy jaǵaǵa baryp, ózenge shomylmaýǵa keńes berer edim. Jalpy, kez kelgen adam tilsiz jaýdan qorǵanyp, saqtyq sharalaryn este ustaǵan durys. Ásirese, aǵysy qatty ózenderde shomylǵanda barynsha abaı bolýlaryn suraımyn, – deıdi Janasbek.
Bul oqıǵa onyń esinde uzaqqa deıin qalary sózsiz. Biraq sol kúni efreıtor aǵystyń qatty ekenin ańǵarǵannan keıin kómek qolyn sozýǵa qatar kelgen joldasyna sýǵa túsýge keńes bermegen. Asaý tolqyndy Úlbi tutastaı úsheýin de aǵyzyp áketer degen oı qylań berse kerek. Janasbek Ulttyq ulanda 2011 jyldan bastap qyzmet etip keledi. Áskerı qyzmetker jan shoshyrlyq shaqtaǵy taıynbas batyl áreketimen qarýlastarynyń arasynda da úlgi bola bildi.
– Janasbek bar jerde qoıylǵan tapsyrma joǵary deńgeıde oryndalady. Sondyqtan qaıta-qaıta qaýzap, qoıylǵan tapsyrmany táptishtep, suraýdyń da qajeti joq. Janasbekteı jaýapkershiligi joǵary senimdi azamattardyń Ulttyq ulan sapynda qyzmet etýi – biz úshin maqtanysh. О́ıtkeni ol kez kelgen ýaqytta naǵyz jaýyngerge tán jankeshtiligimen ózgelerden bıik turady. Sondaı-aq ol kómek suraǵanǵa qolushyn berýden esh jalyqqan emes. Bálkim, osyndaı adamgershilik qasıetterinen keıin be eken, ujymda syıly ári abyroıly. Sonymen qatar onyń dombyra shertip, kúı oryndaı alatyn óneri baryn bireý bilse, bireý bilmes. Ol dombyrany maqamyna keltirip oryndaǵanda qazaq kúıleriniń qudiretin sezinip, boıyńdy erekshe rýh bıleıdi, – deıdi 6699 áskerı bóliminiń 3-atqyshtar rotasynyń komandıri Shalqar Asıhan.
Jaýjúrek jaýyngerdiń otbasynda tórt bala bar. Qonaqqa kelgen general balalarǵa bazarlyq taratyp, shańyraqqa shadyman qýanysh syılady. Aıtpaqshy, Halyq qaharmany Qaırat Úmbetovtiń ózi de oqý-jattyǵý kezinde qatardaǵy sarbazdy granata jarylysynan qutqaryp, eren erlik úlgisin kórsetken edi. Beıbit kúnniń qos batyry qoǵamdaǵy oqıǵalarǵa beıjaı qaramaı, jas urpaqtyń boıyna otansúıgishtik qasıetti darytý qajettigin sóz etti. Kesh sońynda kópke úlgi bolǵan kópbalaly otbasy shańyraqqa arnaıy at basyn burǵan Ulttyq ulan Bas qolbasshysynyń orynbasaryna alǵys bildirdi.
