Foto: Qazsport
Qazaqstan boksshysynyń qarsylasy Tájikstan ókili Parvız Karımov boldy. Birinshi raýndta Toǵambaı qarsylasyn nokdaýnǵa túsirip, tóreshilerdiń upaı sany boıynsha senimdi basymdyqqa ıe boldy.
Ekinshi raýnd taǵy da qazaqstandyqtyń basymdyǵymen ótip, taǵy eki nokdaýnnan keıin tóreshi jekpe-jekti toqtatyp, Saǵyndyq Toǵambaıǵa merziminen buryn jeńis syılady.
Saǵyndyq Toǵambaı Azııa chempıonatynyń 1/4 fınalynda ózbekstandyq Madııar Saıdrahımovty tóreshiniń sheshimimen jeńse, fınalǵa shyǵý úshin beldesýde qytaılyq Taımıao Lıýdi merziminen buryn jeńdi.
Buǵan deıin bokstan Qazaqstan erler quramasynyń Azııa chempıonatyndaǵy altynshy altynyn 54 keli salmaqta Mahmud Sabyrhan jeńip alǵan bolatyn. Qazaqstan quramasy úshin jetinshi joǵary júldeni Bekzad Nurdáýletov 86 keli salmaqta ózbekstandyq Jasýrbek Iýldoshevpen jekpe-jeginde jeńip aldy.
48 kelige deıingi salmaqta óner kórsetken Sanjar Táshkenbaı Azııa chempıonatynyń kúmis júldegeri atansa, Orazbek Asyqulov chempıondyq belbeý úshin beldesýde ózbekstandyq Mırazızbek Mırzahalılovtan jeńilip qaldy.
Qazaqstandyq Dýlat Bekbaýov ózbekstandyq Mýjıbıllo Tursynovtan utylyp, kúmis júldeger atandy. Abylaıhan Júsipov Qazaqstan quramasynyń qorjynyna taǵy bir kúmis qossa, Dıas Moljigitov fınalda ózbekstandyq qarsylasyn jeńe almaı, besinshi kúmisti jeńip aldy.
Al bokstan Qazaqstan áıelder quramasy Azııa chempıonatynda bes altyn, bes qola medal jeńip aldy.
