Seksııalyq otyrystarda Astana qalasy men Aqmola oblysynyń 7-9 synyp oqýshylary óz jobalaryn usyndy. Aıta keteıik, konferensııaǵa qatysýǵa 80-nen asa baıandama jiberilip, onyń 55-i ekinshi kezeńge ótken.
«Búginde bas shaharymyz respýblıkanyń iri saıası, ekonomıkalyq, mádenı jáne ǵylymı ortalyǵyna aınaldy. Astananyń tarıhyn, ekologııalyq jaǵdaıyn, týrıstik máselelerin balalar osy bastan bilýi qajet. Sondyqtan biz bul jıynǵa osy salanyń aldyńǵy qatarly mamandaryn shaqyrdyq. Olar elordanyń órkendeý jolyn, qazirgi túıtkilderin, bolashaqtaǵy jaı-kúıin ortaǵa saldy. Oqýshylar da oıyn búkpeı, usynystaryn ashyq aıtty», dedi Prezıdent ortalyǵy dırektorynyń mindetin atqarýshy Serik Sydyqov.
Qazaqstannyń qurmetti sáýletshisi, sáýlet ǵylymynyń kandıdaty Amanjol Chıkanaevtyń aıtýynsha, Astananyń bas josparyna arnalǵan halyqaralyq baıqaýǵa álemdik sáýlet óneriniń sheberleri usynǵan birneshe joba saraptaýdan ótkizilgen.
«Naqtyraq aıtsaq, baıqaýǵa 47 shyǵarmashylyq ujym qatysty. Men uıymdastyrý komıtetiniń quramynda boldym. Baıqaýdyń fınalynda 3 úzdik joba tańdaldy. Birinshi eskızdiń avtory – áıgili japon sáýletshisi Kıse Kýrokava, ekinshi joba – otandyq sáýletshilerdiki, úshinshi jobanyń avtorlary – reseılik mamandar edi. Astana sáýlettik qııalǵa sheksiz erkindik berdi, eń batyl sáýlettik usynystardy sheshýge múmkindik berdi», dedi ol.
Atalǵan konferensııanyń ereksheligi – buryn mundaı jıyndarǵa elordanyń qurdastary shaqyrylatyn, al bul joly mektep oqýshylary minbege shyǵyp, utymdy usynystaryn aıtty.
«2010 jyly Astanada «Jabyq qala» keshenin salý josparlanǵan. Shuǵyl kontınentaldi sýyq aýa raıyna tótep beretin joba 10 myń turǵynǵa eseptelgen. Jergilikti sáýletshiler kıiz úı sııaqty jasaýdy usynypty. Biraq keıin bul joba aıaqsyz qaldy. Biz osy keshenniń keleshekte de mańyzdy ekenin zerttedik, ǵalymdarmen suhbattastyq. Jalpy uzyndyǵy bir shaqyrymdy qamtıdy. Kúmbez astynda damyǵan áleýmettik ınfraqurylymdar, atap aıtsaq, mádenı ortalyqtar, ǵylymı zerthanalar, botanıkalyq baqtar men oıyn-saýyq ortalyqtary boı kóteredi. Qysy-jazy qalypty aýa raıyn saqtap, júz paıyz ekologııalyq tazalyq kepildigin beredi. Qalanyń aýmaǵy shaǵyn bolǵandyqtan, ekonomıkalyq jaǵynan tıimdi. Eń bastysy, týrısterdiń kóptep kelýin qamtamasyz etedi. Jobanyń resmı ataýy – Batyǵaı. О́ıtkeni Astana mańynda buryn osy attas qala bolǵanyn birneshe tarıhı derekter dáleldeıdi», dedi Astana qalasy fızıka-matematıka baǵytyndaǵy Nazarbaev zııatkerlik mektebiniń 7 «E» synybynyń oqýshylary Omar Nurlanuly men Rysbaı Bekzat.
«Bilim salasyndaǵy statıstıkaǵa kóz júgirtsek, elordany Almatydan Aqmolaǵa aýystyrý ýaqytynda mundaǵy mektepte bar-joǵy 45 myń oqýshy bolsa, qazir 300 myńnan asa bala bilim alyp jatyr. 1997 jyly qalada 46 mektep qana bolsa, qazir 200-ge jýyq bilim oshaǵy bar ekenin atap ótkim keledi», dedi Astana qalasy bilim basqarmasynyń basshysy Qasymhan Senǵazyev.
Konferensııa nátıjesinde, Erbolat Qaraqat «Astana qalasynyń tarıhy jáne mádenı murasy (qala jáne aımaqtyń 1991 jylǵa deıingi tarıhy)» seksııasynda jeńimpaz atandy. Al «Astana – táýelsiz Qazaqstannyń elordasy» baǵytynda Kamıla Júsipova 1-oryn alsa, «Bolashaqtaǵy Astana» seksııasynda Janerke Rysqul kósh bastady.
