Sýretti túsirgen – Erlan OMAR, «EQ»
1997 jyly 20 qazanda Prezıdent Aqmolany respýblıkanyń astanasy dep jarııalaý týraly Jarlyqqa qol qoıdy. 8 qarashada Qazaqstan Respýblıkasynyń memlekettik rámizderiniń etalondary – Tý, Eltańba jáne Prezıdent baıraǵy Aqmolaǵa saltanatty túrde ákelindi. Al 10 jeltoqsanda el astanasy Almatydan Aqmolaǵa resmı kóshti. Sóıtip, 1999 jyly «Egemen Qazaqstan» gazetiniń redaksııasy da jańa elordaǵa qonys aýdardy. Basylymǵa Úkimet sheshimimen Aqmola oblysy Selınograd aýdany ákimdiginiń eki qabatty ǵımaraty berildi. 1954 jyly salynǵan nysanǵa kúrdeli jóndeý júrgizildi. Biraq ǵımarat ábden eski edi. Sondyqtan ony tolyq jańǵyrtý jasaý kerek boldy. Osy jumystardyń basy-qasynda júrgen, sol jyldary «Egemen Qazaqstan» AQ vıse-prezıdenti, keıin prezıdenti bolǵan Erkin Qydyr redaksııaǵa jańadan basqa ǵımarat salý qajet bolǵanyn aıtady.
«Aksıonerlik qoǵamǵa aınalǵandyqtan bizdiń jarǵylyq qorymyzdy kóbeıtý úshin mınıstrlik 130 mln teńge qarjy bóldi. Egizdiń syńaryndaı kórshi basylym «Kazpravda» dál osyndaı qarjyǵa jańa kólik satyp aldy. Al bizdi kólikten buryn keńse ǵımaraty qınap júr edi. Sebebi biz Astanaǵa kóship kelgende berilgen burynǵy aýdan ákimdiginiń eki qabatty ǵımaraty eski bolatyn, kúrdeli jóndeýden ótse de tóbesiniń sylaǵy túsip, al jaýapty hatshy otyratyn bólmedegi jyryqtan dala kórinetin. Sonymen ne kerek, qalalyq arhıtektýra jáne qurylys basqarmasyna baryp keńse ǵımaratyn kúrdeli jóndeýden ótkizýge ruqsat suradyq. Bólim meńgerýshisi tájirıbeli, kekse áıel eken bizge tańyrqaı qarap:
– Kúrdeli jóndeýińiz ne, ony syryp tastaý kerek. 1954 jyly salynǵan ǵoı, – dedi bizge. Sodan jańa ǵımarat salmasaq bolmaıtynyna kózimiz jetti.
Qarjy az, biraq táýekel dep bastap kettik. Qoǵam prezıdenti Saýytbek Abdrahmanov Memleket basshysyna hat jazdy, Premer-mınıstrge kirdi, Parlament depýtattarymen sóılesti, qysqasy 8 qabatty ǵımarat pen 4 qabatty jataqhanaǵa jetetin qarjy tabyldy», dedi ol.
Alaıda qurylys jumystaryn júrgizý ońaı emes. Aldymen onyń qujattaryn daıyndaý qajet. Ol úshin qanshama laýazymdy tulǵanyń tabaldyryǵyn tozdyrasyz. Oǵan tózim kerek. Osyndaı qıyndyqqa qaramastan bas basylym basshylyǵy ózderine úlken jaýapkershilik júktep, el ıgiligine tatıtyn aýqymdy isti bastap ketti. Bas keńse ǵımaratyn salýǵa tender jarııalandy. Ony buǵan deıin qalada biraz kórneki qurylys nysandaryn salǵan «Mırasstroıservıs» holdıngi jeńip aldy. Onyń basshysy – Mırasbek Hakimjanov. Erkin Saǵyndyqulynyń aıtýynsha, holdıng basshysy kisiligi mol azamat bolypty.
«Qurylys jumysy jaqsy bastaldy. Biraq bir jyldan keıin Mırasbek aǵamyz qaıtys boldy. Shynymyzdy aıtsaq, ne isterimizdi bilmedik. Biraq ol kisiniń otbasy adamgershilik tanytty. Eger: «Bizde osyndaı jaǵdaı boldy, sizdermen kelisim jasaǵan adam ómirde joq», dep qurylys jumysynan bas tartsa, ne ister edik? Aǵamyzdyń zaıyby er azamatqa tán minez kórsetti. Qurylysty óz jaýapkershiligine alyp, sońyna deıin jetkizdi. Biz soǵan qatty rıza boldyq», dedi.
Sonymen, «Egemen Qazaqstannyń» keńse ǵımaraty men 9 seksııaly jataqhana qurylysy gazettiń 90 jyldyǵy qarsańynda tolyq aıaqtalyp, paıdalanýǵa berildi. Basylymnyń toqsan jyldyq mereıtoıymen tuspa-tus kelgen jańa ǵımarattyń ashylýyna gazet ardagerlerimen birge Prezıdenttiń ózi kelip qatysty.
Sondaı-aq redaksııa irgesinen «Egemen Qazaqstan» 9 qabatty turǵyn úı kesheni boı kóterdi. Ony da «Mırasstroıservıs» holdıngi saldy. Osy úsh ǵımarat jobasyn belgili sáýletshi, Memlekettik Eltańba avtorlarynyń biri Jandarbek Málibek jasady. Al 2015 jyly jeltoqsanda 5 qabatty, 15 seksııadan turatyn jańa jataqhana ǵımaraty berildi. Osylaı gazet qyzmetkerleriniń bári baspanamen tolyq qamtyldy. Budan buryn «Jastar» shaǵyn aýdanynan gazet qyzmetkerlerine arnap, bir kireberisti bes qabatty turǵyn úı salynǵan edi.
Qazir «Egemen Qazaqstan» redaksııasynyń bas keńsesi ornalasqan aýmaq – úlken arhıtektýralyq ansambldi quraıdy. Quddy jeke qalashyq. Tyń ıgerý kezderinde salǵan eki qabatty úılerdiń ornyna ásem, bıik úıler túsken. Burynǵy M.Lomonosov atyndaǵy kóshe «Egemen Qazaqstan» gazeti» kóshesi dep ataldy. Ol Abaı dańǵyly boıyndaǵy «Qalamgerler» alleıasyna jalǵasady. Onda Alash ardaqtylary – Álıhan Bókeıhan, Mirjaqyp Dýlatuly, Ahmet Baıtursynulynyń eskertkishi qoıyldy. Sonymen qatar ult rýhanııatynyń damýyna zor úles qosqan Sáken Seıfýllın, Beıimbet Maılın, Ilııas Jansúgirovtiń de eskertkishi boı kóterdi. Bul eńseli eskertkishter alleıaǵa aıryqsha kórik berip tur. Munda Jazýshylar odaǵynyń Astana qalalyq fılıaly men qala ákimdiginiń uıymdastyrýymen túrli mádenı is-shara, jas aqyndardyń poezııa keshteri ótedi. Byltyr redaksııa ǵımaraty aldynan «Jýrnalıster alleıasy» ashyldy. Búginde bul alleıa qala turǵyndary jıi serýendeıtin orynǵa aınaldy.
Bir sózben aıtqanda, «Egemen Qazaqstan» gazetiniń bas ǵımaraty jan-jaǵyna sáýle shashyp turǵandaı áser beredi.
