foto Senattyń baspasóz qyzmeti
Memleket basshysynyń usynýyn qaraý nátıjesinde senatorlar otstavkaǵa ketýlerine baılanysty Botagóz Eralıeva men Qambar Nuryshevty Joǵarǵy Sot sýdıasy qyzmetinen bosatý týraly sheshim qabyldady. Usynylǵan kandıdatýralar aldyn-ala Konstıtýsııalyq zańnama, sot júıesi jáne quqyq qorǵaý organdary komıtetinde talqylandy.
Sonymen qatar Palata otyrysynda Parlament Senaty taǵaıyndaǵan Qazaqstan Respýblıkasy Joǵary aýdıtorlyq palatasy múshesiniń ókilettigin toqtatý jáne qyzmetinen bosatý týraly másele qaraldy. Buǵan deıin Rashıt Ahmetovtiń atynan ózin Joǵary aýdıtorlyq palatanyń músheliginen bosatý týraly ótinish kelip túsken edi. Reglamentke sáıkes bul másele Qarjy jáne bıýdjet komıtetinde aldyn ala talqylandy. Ashyq daýys berý arqyly depýtattar atalǵan sheshimdi qoldady.
Senat otyrysynda «Qazaqstan Respýblıkasynyń Úkimeti men Fransýz Respýblıkasynyń Úkimeti arasyndaǵy Qazaqstan Respýblıkasynda Fransýz damý agenttigi tobynyń jumys isteýi týraly kelisimdi ratıfıkasııalaý týraly», «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Iran Islam Respýblıkasy arasyndaǵy erkin saýda týraly kelisimdi ratıfıkasııalaý týraly» jáne «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Sıngapýr Respýblıkasy arasyndaǵy jan-jaqty ekonomıkalyq yntymaqtastyq týraly negizdemelik kelisimdi jáne Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Sıngapýr Respýblıkasy arasyndaǵy erkin saýda týraly kelisimdi ratıfıkasııalaý týraly» zańdar qaralyp, ratıfıkasııalandy.
Otyrys kezinde atap ótilgendeı, bul zańdardy maquldaý – halyqaralyq qatynastardy nyǵaıtý jáne birlesken ekonomıkalyq jobalardy iske asyrý úshin turaqty jaǵdaı jasaý jolyndaǵy mańyzdy qadam. Sondaı-aq atalǵan qujattardy ratıfıkasııalaý yntymaqtastyqty odan ári damytýǵa, otandyq bıznesti halyqaralyq deńgeıde ilgeriletý úshin saýda kedergilerin joıýǵa jáne Qazaqstannyń saýda-ekonomıkalyq damýyn arttyrýǵa yqpal etedi.
Sonymen birge senatorlar «Qazaqstan Respýblıkasynyń keıbir zańnamalyq aktilerine dıplomatııalyq qyzmet, halyqaralyq sharttar jáne damýǵa resmı kómek máseleleri boıynsha ózgerister men tolyqtyrýlar engizý týraly» týraly zańdy qarap, maquldady. Zań el Prezıdentiniń «Memlekettik apparattyń qyzmetin bıýrokratııadan aryltý jónindegi sharalar týraly» Jarlyǵyn oryndaý maqsatymen ázirlendi.
«Maquldanǵan zań dıplomatııalyq qyzmet zańnamasyn odan ári jetildirýge baǵyttalǵan. Atap aıtqanda, zań aıasynda dıplomatııalyq qyzmetke turý, eńbek etý jáne biliktilikti arttyrýǵa qatysty jekelegen máseleler naqtylanyp otyr. Sondaı-aq dıplomattardyń eńbek jáne áleýmettik quqyqtaryn qorǵaý tetikteri jetildirilgen. Zańnyń maquldanýy dıplomatııalyq qyzmet organdarynyń jumysyn damytýǵa jáne halyqaralyq sharttar jasasý prosesin ońtaılandyrýǵa múmkindik beredi dep senemiz», dedi Máýlen Áshimbaev.
