Foto: turkystan.kz
Rústemovtiń aıtýynsha qazaq kınosy kóbeıgenmen, sapasy syn kótermeı tur. Ásirese, kınoda aralas tilde sóz qoldaný úrdisi beleń alyp barady. Muny kórermenderdiń bir toby realıstik oqıǵa dep qabyldasa, ekinshi top ana tiliniń qoldaný aıasyn taryltý dep uǵyp júr. Osylaı degen senator aralas til qoldanystary qazaq tiliniń tazalyǵyn saqtaýǵa zııan tıgizip jatqanyn aıtty. Depýtat osy máselelerdi sheshý úshin otandyq fılmderdiń ıdeologııalyq jáne ádebı sapasyna erekshe nazar aýdarý qajet ekenine toqtaldy.
«Qazaq kınosy tilinde qalyptasqan áleýmettik-lıngvıstıkalyq máselelerdi sheshý maqsatynda birqatar usynystardy qoldaýyńyzdy suraımyz. Otandyq kıno ónimderine ádebı, ıdeologııalyq turǵyda naqty baqylaý ornatý maqsatynda kıno túsirý salasyna memlekettik lısenzııalaýdy engizý qajet. Kıno men teleındýstrııadaǵy tildik mádenıet máselelerin retteý maqsatynda kıno jáne sahna tilin qadaǵalaý fýnksııasy engizilgeni jón. Qazaq kınosynyń tilin kórkem ádebı stılge negizdep, memlekettik tildiń tolyqqandy qoldanylýyn zańnamalyq qamtamasyz etý, qazaq tilinde kıno túsirýshilerge arnaıy tildik kýrstar ótkizý, kenjelep qalǵan kıno syny salasyn jetildirip, ár jańa fılmge qatysty kásibı mamandardyń synı pikirlerin jarııalaıtyn arnaıy jýrnaldar shyǵarý qajet. Shetel kınosynyń prokatynan óndirilgen salyqtyń belgili bir bóligin ulttyq kınony damytýǵa jumsaýdy, memlekettik tapsyrys aıasyndaǵy kınonyń barlyǵyn tek memlekettik tilde túsirýdi zańnamalyq qamtamasyz etýdi jáne ulttyq kınony qoldaý memlekettik ortalyǵy janyndaǵy Saraptamalyq keńestiń qyzmetin zańnamalyq turǵyda qaıta ózektendirýdi suraımyn», dedi Rýslan Rústemov.
Senator mundaı jaǵymsyz úrdis telebaǵdarlamalarda da kóbeıgenin alǵa tartty. Telehabarlarda aralas tirkestiń jıi qoldanylýy qazaq tili úshin problema ekenin atap ótti.
