Foto: Salı Sabırov
Saltanatty jıynǵa QR Parlamentiniń depýtattary, Olımpıada jeńimpazdary men júldegerleri, álem birinshilikteri men halyqaralyq jarystardyń jeńimpazdary men júldegerleri, sport jýrnalısteri qatysty.
Týrızm jáne sport mınıstri Erbol Myrzabosynov 2024 jyl otandyq sport úshin erekshe jyl bolǵanyn atap ótti. El sportshylary bıyl halyqaralyq iri jarystarda tabysty nátıje kórsetse, Qazaqstanda iri jarystar uıymdastyryldy.
«Osy jyldyń basty dodasy Parıj Olımpıadasy men Paralımpıada ekeni anyq. Bizdiń qurama tarıhı jetistikterge qol jetkizdi. Dzıýdoshy Eldos Smetov Olımpıada chempıony atandy. Bul – Táýelsiz Qazaqstan tarıhynda dzıýdodan buıyrǵan alǵashqy altyn medal. Gımnastıkadan alǵash ret Olımpıada medalin jeńip aldyq. Ol júlde Narıman Qurbanovqa buıyrdy. Davıd Degtıarev para-paýerlıftıngten eki dúrkin Paralımpıada chempıony atandy. Para-dzıýdoshy Aqmaral Naýatbek Olımpıada shyńyn baǵyndyrdy», dedi mınıstr.
Sonymen qatar bıyl Astanada 5-shi Dúnıejúzilik kóshpeliler oıyny uıymdastyryldy. Kóshpeliler dodasynda 89 eldiń sportshylary baq synady. Dúbirli dodada Qazaqstan quramasy jalpykomandalyq esepte top jardy.
«Memleket basshysy Qasym-Jomart Kemeluly Toqaevtyń qoldaýymen sport salasynda oń ózgerister bastaldy. Kelesi jyly otandyq sportshylardy birneshe baıraqty báseke kútip tur. 2025 jyldyń aqpan aıynda sportshylarymyz Qytaıdyń Harbın qalasynda ótetin qysqy Azııa oıyndaryna qatysyp, qysqy Olımpıada lısenzııasy úshin synǵa túsedi. Tarıh qoınaýyna enip bara jatqan 2024 jyly sportshylarymyz jaman nátıje kórsetken joq, jańa jyldan odan da úlken jeńister kútemiz», dedi Erbol Myrzabosynov.
Saltanatty is-sharada jyldyń mańyzdy sporttyq básekelerinde el namysyn abyroımen qorǵap, qorjynǵa júlde salǵan sportshylar men olardyń tuǵyrdan kórinýine sep bolǵan bapkerler, sondaı-aq jeńisti jańalyqtardyń jarshysy bolǵan BAQ ókilderi marapattaldy.
Jyl qorytyndysy boıynsha «Úzdik» dep tanylǵandar:
Eldos Smetov, Davıd Degtıarev – «Jyldyń úzdik sportshysy»;
Ǵalymjan Jylgeldıev, Iýrıı Kolesnıkov – «Jyldyń úzdik jattyqtyrýshysy»;
Grek-rım, erkin jáne áıelder kúresi federasııasy – «Jyldyń úzdik akkredıttelgen sport federasııasy»;
Kýanyshbek Esekeev, Qazaqstan dzıýdo federasııasynyń prezıdenti – «Jyldyń úzdik akkredıttelgen sport federasııasynyń prezıdenti»;
Erkebulan Ilııasov, «Jamby atý federasııasy» RQB prezıdenti – «Úzdik sport mesenaty»;
Ǵızat Túsipaev – «Jyldyń úzdik aýyl jattyqtyrýshysy»;
Erlan Tasbolatov – «Aýyldyq jerdegi úzdik dene shynyqtyrý jáne sport ádiskeri»;
Darhan Sharıǵatov – «Aýyldyq jerdegi úzdik dene shynyqtyrý jáne sport nusqaýshysy»;
Maqat aýdandyq mádenıet, tilderdi damytý, dene shynyqtyrý jáne sport bólimi – «Aýdandyq úzdik dene shynyqtyrý jáne sport bólimi»;
Almaty qalasyndaǵy «Joǵary sport sheberligi mektebi» – «Jyldyń úzdik sport uıymy»;
Jambyl oblysy ákimdiginiń dene shynyqtyrý jáne sport basqarmasy – «Úzdik sporttyq óńir»;
Ilıa Mızernyh – «Jas jáne jasóspirimder quramyndaǵy sportshy»;
Sergeı Sergeev – «Jyldyń úzdik balalar jattyqtyrýshysy»;
Nadejda Kım – «Dene shynyqtyrý jáne sport salasyndaǵy úzdik maman»;
Aqmaral Naýatbek – «Sportta úzdik serpin».
Sport jýrnalıstıkasynda bási bıik Seıdahmet Berdiqulov atyndaǵy marapatty «Habar» telearnasynyń jýrnalısi Jandos Aıtbaıuly, «Egemen Qazaqstan» gazetiniń tilshisi, áriptesimiz Qýanysh Nurdanbekuly, «Sport+» saıtynyń tilshisi Nazerke Sultanbek ıelendi.
«Seıdahmet Berdiqulov atyndaǵy syılyq - jyl saıyn sport jýrnalısterine tabystalatyn mártebeli marapat. Bıyl úzdikter qatarynan kóringenimizge qýanyshtymyn. Baıqaýǵa «Egemen Qazaqstan» gazetinde jarııalanǵan maqalamyzdy usynyp, júldeli boldyq. Bıikten kórinýimizge ujymnyń sebi mol. Qoldaǵan barlyq áriptesterime alǵys aıtamyn», dedi Qýanysh Nurdanbekuly.
