Is-sharany uıymdastyrýǵa Oqý-aǵartý, Mádenıet jáne aqparat mınıstrlikteri men Jetisý oblystyq ákimdigi qoldaý kórsetti.
Fılmniń rejısseri – Erlan Oshaqbaev. Bul týyndyda jas muǵalimniń týǵan aýylyna oralýy, ózi bilim alǵan mektepte jumysqa ornalasýy, oqýshylarmen baılanysy, muǵalim bedelin nyǵaıtýǵa degen talpynysy, ustazdyqtyń qıyndyǵy men qyzyǵy kórinis tapqan. Sondaı-aq fılmde zamanaýı pedagogıkanyń ózekti máseleleri de qozǵalǵan. Tanystyrylym barysynda Oqý-aǵartý mınıstri Ǵanı Beısembaev Mádenıet jáne aqparat mınıstrligimen birlesip, fılmdi elimizdiń telearnalarynda kórsetý týraly bastama kóterdi.
«Memleket basshysy pedagogterdiń qoǵamymyzda mańyzdy ról atqaratynyn atap ótken bolatyn. Bul sózder pedagogterdi qoldaýǵa jáne bilim sapasyn arttyrýǵa baǵyttalǵan naqty qadamdarmen bekitildi. Alǵashqy jáne mańyzdy qadamdardyń biri 2019 jyly «Pedagog mártebesi týraly» zańnyń qabyldanýy boldy, ol pedagogterdiń jumys júktemesin azaıtý, artyq fýnksııalardan bosatý jáne jańa yntalandyrý sharalaryn engizý máselelerin rettedi. Osy fılmniń negizgi mıssııasy – pedagogtiń tek mamandyq emes ekenin kórsetý. Olardyń qoǵamdaǵy rólin tereń túsinýge, jas muǵalimder úshin jaýapkershilikti sezinýge jáne kásibı damýǵa shabyttandyratyn mańyzdy sebep bolatynyna senemin», dedi mınıstr.
Fılmniń ıdeıa avtory – belgili jýrnalıst Beısen Quranbek, ssenarııin jazǵan – Gúlmıra Qadyrqyzy. Keıipkerlerdiń rólin Jetisý oblystyq drama teatry men oqýshylar saraıynyń akterleri somdaǵan.
Aıta keteıik, «Ustaz» fılmi Jetisý telearnasynyń qoldaýymen túsirilgen. Endi bul týyndy elimizdiń basty telearnalarynan kórsetilmek. Bul fılm – muǵalim mamandyǵynyń bedelin arttyrýǵa ári onyń qoǵamdaǵy ornyn aıshyqtaýǵa baǵyttalǵan erekshe joba.
