Foto: primeminister.kz
Elimizdegi eń uzyn kópirdiń ashylýyna Memleket basshysynyń tapsyrmasy boıynsha Premer-mınıstr Oljas Bektenov qatysty.
Aıta keteıik, bul joba kólik qatynasyna qatysty kóp jylǵy máseleni sheshýge baǵyttalǵan. Kópir alty aýdandy – Kúrshim, Úlken Naryn, Marqakól, Qatonqaraǵaı, Tarbaǵataı jáne Zaısan aýdandaryn baılanystyryp tur.
Eki jolaqty avtomobıl kópiriniń uzyndyǵy 1316 metrdi quraıdy. Kópir táýligine 80 myńǵa deıin kólik ótkize alady, ótkelge 18 shaqyrym jańa jol tartylǵan. Joba ozyq ınjenerlik tehnologııalardy qoldana otyryp, barlyq sapa standarttaryna sáıkes júzege asyrylǵan.
Shyǵys Qazaqstan - mańyzdy kólik dálizderi ótetin strategııalyq aımaq. Buqtyrma sý qoımasy arqyly ótetin kópir logıstıkalyq baǵyttardy jaqsartyp, shekaralas eldermen úzdiksiz baılanysty qamtamasyz etedi. Odan bólek, jańa kópir óńir turǵyndarynyń yńǵaıyna qaraı boı túzegenin de aıta ketý kerek. Bul týraly Úkimet basshysy Oljas Bektenov te aıta ketken.
«Jańa kópir Memleket basshysynyń tapsyrmasy boıynsha turǵyndardyń jaılylyǵy men qaýipsizdigin arttyrý maqsatynda salyndy. Aımaqta turǵyndar 50 jyl boıy jazda ne parommen, qysta tikeleı ne muz ústimen júrgenin bilesizder. Qurylystyń salynýyn jergilikti turǵyndar uzaq kútti», degen edi Premer-mınıstr.
Búginde jańa qurylystyń ıgiligin kórip júrgen aımaq turǵyndary kópir sý qoımasynyń eki jaǵyndaǵy eldi mekender arasyndaǵy kólik qatynasyn edáýir jaqsartqanyn, bul kólikterdiń jeńil qatynaýyn qamtamasyz etkenin, taýarlar qozǵalysyn jedeldetkenin, qyzmetterge qoljetimdilik artqanyn, sondaı-aq oblystyń týrıstik áleýeti edáýir ashylǵanyn alǵa tartyp otyr.
Aıta ketetini, kópirdiń qurylysyna, jalpy, jobanyń iske asyrylýyna tek Qazaqstan mamandary tartylǵan eken. Bul óz kezeginde jańa jumys oryndarynyń ashylýyna múmkindik bergen. Premer-mınıstr aldaǵy ýaqytta da mundaı iri jobalardy júzege asyrý barysynda otandyq mamandar men merdiger kompanııalardy tartýǵa erekshe nazar aýdarylatynyn alǵa tartqan.
«Ári jumys berip ári ınfraqurylymdyq baılanys pen damýdy qamtamasyz etetin megajobalar kóp bolýy kerek. Syrttan eshkimdi tartpaı-aq, bizdiń óz quzyretimiz de jetkilikti. Osyndaı respýblıkalyq mańyzy bar iri jobalardy júzege asyrýdy jalǵastyramyz», dedi Oljas Bektenov.
Shyǵys óńiri qazba baılyqqa baı ekeni belgili. Jańa kópir sol baılyqty ıgerýge múmkindik berip otyr. Aldaǵy ýaqytta da týrızmniń jandanýyna jaǵdaı jasap, aımaqtyń qaıta túleýine sep bolady degen senimdemiz.
