Foto: Jasandy ıntellekt
Qutqarýshylarymyzdy tótenshe jaǵdaılarǵa qarsy kúrestiń aldyńǵy shebinde turǵan naǵyz qaharmandar desek te artyq etpes. Sebebi órt, sý tasqyny, qar kóshkini nemese apat bolsyn, bul mamandar kez kelgen ýaqytta kómektesýge daıyn turady. Olardyń jumysy tek fızıkalyq eńbek ǵana emes, sonymen birge úlken psıhologııalyq jaýapkershilik. Sebebi olar eń qıyn jaǵdaılarda adam ómirin saqtap qalýda kásibılik pen tabandylyq tanytady.
Abaı oblysyndaǵy órt
Astana qalasy TJD №24 MО́SB bólimshe komandıri Eldar Qanafııanov kúrdeli órtterdi sóndirýge jáne avarııalyq-qutqarý jumystaryn júrgizýge qatysqan. Solardyń biri - 2022 jyly Qostanaı oblysynda orman órtin jáne 2023 jyly Abaı oblysynda órtterdi sóndirýge barǵan elordalyq órt sóndirýshiler quramynda bolǵan. Al bıyl elordalyq qutqarýshylar quramynda aldymen Qostanaı oblysynda sý tasqynyna qarsy jáne tasqynnyń saldarymen kúresý, úı aýlalarynan sý sorý jáne ótkizý jumystaryn júrgizdi. Qostanaı oblysyndaǵy jumystardy sátti aıaqtap, Batys Qazaqstan oblysyndaǵy sý taqynyna qarsy jumystardy júrgizýge qatysqan.
Eldar Qanafııanov «Rýhtastar» jastar syılyǵynyń «Qaısar jyl adamy» nomınasııasy boıynsha laýreat atandy.
Aqmola oblysyndaǵy sý tasqyny
Taraz qalasyndaǵy №20 órt sóndirý bóliminiń qaraýyl bastyǵy Baıdáýlet Dúısenov 2024 jyly Aqmola oblysynda sý tasqyny kezinde qutqarý operasııasyna qatysqan. Onyń komandasy adam ómirin saqtap qalýǵa jáne avarııalyq-qutqarý jumystaryn tıimdi júrgizýge múmkindik beretin joǵary kásibılik pen komandalyq jumysty kórsetti.
Dúısenov Baıdáýlet Arystanbaıuly ózin joǵary kásibı bilikti qutqarýshy retinde kórsete bildi. 2024 jyly oblys qaýipsizdigin qamtamasyz etýge qosqan úlesi jáne tabıǵı apattar kezindegi erligi úshin «Áýlıeata úzdigi-2024» jastar syılyǵynyń laýreaty atandy.
Sý tasqyny zardabyn joıý
QR Tótenshe jaǵdaılar mınıstrligi Qasym Qaısenov atyndaǵy 68303 áskerı bóliminiń vzvod komandıri Mırat Beketov túrli qutqarý jumystarynda erekshe kózge tústi. Sý tasqynynyń zardaptaryn joıýǵa jáne sý qoımalaryndaǵy adamdardy qutqarýǵa atsalysyp, joǵary kásibı sheberlik pen janqııarlyq tanytqan.
Ol sý tasqynynyń zardaptaryn joıýǵa qatysqany úshin «Erligi úshin» medalimen marapattalǵan.
Tútinge oranǵan páterden sábıdi qutqaryp qaldy
2024 jyldyń jeltoqsanynda órt sóndirý bóliminiń komandıri Azamat Qurmanııazov Atyraý qalasynda órtengen páterden 2023 jyly týǵan sábıdi qutqaryp qaldy. Páter esigi syrtynan qulyptaýly bolǵan. Qutqarýshy qoıý tútin men qaýipke qaramastan ǵımaratqa tez kirip, balany syrtqa alyp shyqqan. Sábıge alǵashqy medısınalyq kómek kórsetilip, aman qaldy. Bul oqıǵa Tótenshe jaǵdaılar mınıstrligi qyzmetkerleriniń tıimdiligi men iskerliginiń jarqyn mysaly boldy.
Turǵyn úıdegi órtten jeti adamdy qutqardy
Astana qalasy Tótenshe jaǵdaılar departamenti О́rt sóndirý jáne avarııalyq-qutqarý jumystary qyzmeti №5 mamandandyrylǵan órt sóndirý bóliminiń aǵa órt sóndirýshi-qutqarýshysy Nurdáýlet Esdáýletov adam ómirin saqtap qalýda talaı ret batyldyq pen kásibı sheberlik kórsetti.
2024 jyldyń 1 sáýirinde Astanada toǵyz qabatty turǵyn úıde órt boldy. Oqıǵa ornyna jetken Nurdáýlet úsh aıaqty baspaldaq ornatyp, batyldyq tanytyp, balany tórtinshi qabattaǵy terezeden aman alyp qaldy. Sol kúni barlyǵy jeti adam qutqarylǵan.
Birinshi oqıǵadan birneshe kún ótken soń Nurdáýlet Qarasaı batyr kóshesindegi úıdegi órtti sóndirýge qatysqan. Ekinshi qabattaǵy páterden qoıý qara tútin shyǵyp jatqan. О́rt sóndirýshi jabylǵan temir esikti ashyp, qoıý tútin men joǵary temperatýraǵa qaramastan úı-jaıdy aralap shyǵyp, edende jatqan eki qart adamdy taýyp alyp, olardy birinen soń biri órtenip jatqan páterden alyp shyqqan.
«Aqsaı» bazaryndaǵy iri órt
Jambyl oblysy Tótenshe jaǵdaılar departamenti О́rt sóndirý jáne avarııalyq-qutqarý jumystary qyzmetiniń jedel kezekshisi Ertaı Raıymbekov birqatar avarııalyq-qutqarý jumystarynda erekshe erlik pen kásibılik kórsetti.
2023 jyldyń 20 qańtarynda Tarazdaǵy «Aqsaı» bazarynda iri órt boldy. Ertaı Raıymbekov gaz-tútinnen qorǵaý qyzmetin basqaryp, basyn qaterge tigip, órtenip jatqan ǵımaratqa kirip ketken. Operasııa barysynda órt qursaýynda qalǵan eki áıel men bir múgedekti ózi qutqarǵan. Onyń sheshýshi áreketteri odan da aýyr zardaptardyń aldyn alyp, adamdardyń ómirin saqtap qaldy.
Ertaı Raıymbekov erligi úshin II dárejeli «Aıbyn» ordenimen marapattaldy.
Qaraǵandy oblysy Tótenshe jaǵdaılar departamentiniń №18 órt sóndirý bóliminiń júrgizýshisi Jeńis Bolatov birqatar qutqarý jumystarynda ózin kórsete bildi.
Aqtoǵaı aýdanyndaǵy izdestirý-qutqarý operasııasy
Qaraǵandy oblysy Tótenshe jaǵdaılar departamenti О́rt sóndirý jáne avarııalyq-qutqarý jumystary qyzmeti №18 órt sóndirý bóliminiń órt sóndirý avtokóliginiń júrgizýshi-qyzmetkeri Jeńis Bolatov pen Nurhat Núsipov 2024 jyldyń 8 aqpanynda áriptesterimen birge Aqtoǵaı óńirinde izdeý-qutqarý jumystaryna qatysty. Jedel top 7 aqpanda belgisiz baǵytqa ketip qalǵan jáne Aıyrtas aýylynan 6 shaqyrym batysqa qaraı ornalasqan áıel men balany taýyp alyp, qutqardy.
Jeńis Bolatov sý tasqynynyń zardaptaryn joıýǵa jáne adamdardy qutqarýǵa belsene qatysqany úshin III dárejeli «Aıbyn» ordenimen marapattaldy.
Nurhat Núsipov qysta avarııalyq-qutqarý jáne izdestirý-qutqarý jumystaryn júrgizý kezinde kórsetken erligi úshin III dárejeli «Aıbyn» ordenimen marapattalǵan.
Ýst-Talovkadaǵy órt
Shyǵys Qazaqstan oblysy, Shemonaıha qalasynyń №28 órt sóndirý bóliminiń aǵa órt sóndirýshi-qutqarýshysy Dýman Kenjebekov adamdardy qutqarýda erekshe erlik pen kásibılik kórsetti.
2024 jyldyń 1 qazanynda Ýst-Talovka aýylynda kópqabatty úıdiń úshinshi qabatynda órt boldy. Dýman Kenjebekov kúzetshimen birge oqıǵa ornyna der kezinde jetip, 10 adamdy, onyń ishinde 6 balany evakýasııalaǵan. Onyń sheshýshi áreketteriniń arqasynda adam shyǵyny men aýyr zardaptardyń aldyn aldy.
Erligi men adaldyǵy úshin Dýman Kenjebekov Shyǵys Qazaqstan oblysynda «Jyl qaharmany» ataǵyna ıe boldy. Syılyqty oǵan oblys ákimi Ermek Kósherbaev tapsyryp, onyń azamattardyń qaýipsizdigi men qorǵalýyn qamtamasyz etýge qosqan úlesin atap ótti.
Avarııalyq-qutqarý jumystary
Munaıly aýdanynyń №5 О́SB bastyǵynyń orynbasary azamattyq qorǵaý kapıtany Múslim Qudaıbergen avarııalyq-qutqarý jumystaryna qatysqan kezde batyldyq pen kásibılik tanytqany úshin «Úzdik tótenshe jaǵdaı qyzmeti» nomınasııasyna ıe boldy.
Jalpy, qutqarýshylar - bizdiń zamanymyzdyń naǵyz qaharmandary, olardyń qaısarlyǵy, kásibıligi men adaldyǵy myńdaǵan adamnyń ómirin saqtap, qaıǵyly oqıǵalardyń aldyn aldy. Olardyń batyldyǵy jaı ǵana minezdik qasıet emes, eń qıyn jaǵdaıda áreket etýge daıyn bolýdy talap etetin kásiptiń negizi.
