Foto: Aqorda
Bıyl Olımpıada jyly bolǵany barshaǵa belgili. El quramasy dúbirli dodada derbes memleket retinde 8 ret baq synady. Tórtjyldyqtyń basty básekesine joldama ıelengen 80 atletimiz jarys jolyna shyqty. Olımp shyńyn 60 kelide tatamıge shyqqan Eldos Smetov baǵyndyryp, Qazaqstan qorjynyna altyn medal saldy. Smetovtiń bul jeńisi táýelsiz Qazaqstan tarıhynda dzıýdodan enshimizge buıyrǵan alǵashqy «altyn» bolyp tirkeldi.
Osy sport túrinen ekinshi júldeni 66 kelide Ǵusman Qyrǵyzbaev jeńip aldy. Ol Parıj Olımpıadasynyń qola júldegeri atandy. Kórkem gımnastıkadan tarıhı kúmis medaldi - Narıman Qurbanov tartý etti. Narıman at ústindegi jattyǵýdy eń birinshi bolyp oryndap, 15.433 upaıdy esebine jazdy. Ol bazalyq qıyndyǵy 6.7-ge teń jattyǵýdy sátti oryndap shyqty. Bul jetistik Qazaqstan tarıhyndaǵy sporttyq gımnastıkadaǵy tuńǵysh medal ekenin atap ótken jón.
Parıj Olımpıadasynda bylǵary qolǵap sheberleri arasynan Nurbek Oralbaı kópshilikti kúmis júldemen qýantsa, qyzdar arasynan Nazym Qyzaıbaı ózi qatysqan alǵashqy Olımpıadasyn qola júldemen qorytyndylady.
Erkin kúresten 36 jastaǵy Demeý Jadyraevtyń altynǵa bergisiz kúmisi de el quramasyna erekshe serpin berdi.
Qazaqstan men Germanııa komandasy arasyndaǵy pnevmatıkalyq vıntovkadan 10 metr qashyqtyqqa aralas juptyq nysanadan kózdeý tartysynda bizdiń el mereıi ústem boldy. Osy synda el namysyn qorǵaǵan Aleksandra Le men Islam Satpaev osylaısha qola júldege qol jetkizdi.
Osylaısha ulttyq qurama Olımpıada oıyndarynda 1 altyn, 3 kúmis, 3 qola júldemen komandalyq esepte 43-orynǵa jaıǵasty.
Parıjdegi XVII Paralımpıadada qanjyǵamyzǵa 9 medal tústi. Bul dodaǵa 9 sport túrinen 33 lısenzııa alǵan 44 sportshy qatysty. Paýerlıftıngten 54 keli salmaqta synǵa túsken sportshymyz Davıd Degtıarev 188 keli kóterip altyn medal ıelenip, ekinshi ret Olımpıada chempıony ataǵyn qorǵap qaldy. Paralımpıadalyq dzıýdodan 48 keli salmaqta Aqmaral Naýatbek chempıon atandy. Aqmaral Naýatbekten bólek Erǵalı Shameı kúmis, al Daıana Fedosova, Zarına Raıfova jáne Jurqamyrza Shúkirbekov qola medaldi qorjynǵa saldy. Odan bólek nysana kózdeýden Erkin Ǵabbasov, júzýden Nurdáýlet Jumaǵalı kúmis alsa, jeńil atletıkadan Dastan Muqashbekov qola medal enshiledi.
Sondaı-aq bıyl UFC-de segizburyshqa shyqqan Shavkat Rahmonov pen Asý Almabaevtyń da asyǵy alshysynan tústi. UFC-diń jeńil orta salmaqtaǵy jaýyngeri, jeńilip kórmegen otandasymyz Shavkat Rahmonov 8 jeltoqsan tańerteń ırlandııalyq Ien Gerrıge qarsy baq synady. Buryn bir zalda jattyqqandar arasyndaǵy tartysty jekpe-jekte az-kem upaı aıyrmashylyǵymen otandasymyzdyń qoly kóterildi. Bul Shavkat Rahmonovtyń upaımen basym bolǵan alǵashqy jekpe-jegi.
UFC lıgasynda Asý Almabaev ta sátti joryǵyn jalǵastyryp jatyr. Almabaev brazılııalyq qarsylas Mateýs Nıkolaýmen úsh raýndqa sozylǵan jekpe-jek ótkizip, tóreshilerdiń sheshimimen jeńiske jetti. Osy jeńisinen keıin Almabaev úzdik ondyq quramyna endi.
Osy jyldyń qyrkúıeginde Úndistanda shahmat Olımpıadasy ótti. Aqyl-oı synynda qazaq qyzdary jergilikti sportshylarǵa ǵana jol berip, kúmis medalmen elge oraldy. Osy jarystyń sońǵy týrnırinde shahmattan Qazaqstan áıelder quramasy AQSh ókilderine qarsylas atandy.
Oıynda Bıbisara Asaýbaeva, Ksenııa Balabaeva jáne Alýa Nurman jeńiske jetse, Merýert Kamalıdenova, ókinishke qaraı, jeńilip qaldy. Osylaısha, qurama 18 upaı jınap, 2024 jylǵy shahmat Olımpıadasynyń kúmis júldegeri atandy.
Qazaqstan áıelder quramasy tómendegi quramda óner kórsetti:
Bıbisara Asaýbaeva;
Merýert Kamalıdenova;
Ksenııa Balabaeva;
Alýa Nurman;
Amına Qaıyrbekova.
Osy jyldyń 13 maýsymynda Úndistannyń Gandınagar qalasynda ótken jasóspirimder arasyndaǵy álem chempıonatynda (FIDE World Junior Chess Championships 2024) Qazybek Nógerbek te tabysty óner kórsetti. Qazybek Nógerbek ( reıtıngi 2502) 11 raýndta 8½ upaı jınaǵan. Osy arqyly Qazybek álem chempıony ataǵyna úmitkerler týrnırine irikteý aıasyndaǵy álem chempıonatyna joldama aldy. Sondaı-aq týrnır barysynda FIDE prezıdenti keńesiniń kezekti otyrysynda Qazybek Nógerbekke grossmeıster ataǵy tabystaldy.
Kásipqoı boksta el jalaýyn jelbiretip júrgen Jánibek Álimhanuly da WBO, IBF tıtýldaryn sátti qorǵady. 14 shilde kúni Las-Vegasta kásipqoı boksshy Jánibek Álimhanuly jańazelandııalyq Andreı Mıhaılovıchke qarsy rıngke shyǵý kerek edi. Alaıda jeńilip kórmegen jerlesimiz salmaq qýý barysynda qıyndyqqa tap bolǵanmen, Cıdneıde ótken kásipqoı boks keshinde otandasymyz Jánibek Álimhanuly (16-0, 11 KO) jańazelandııalyq Andreı Mıhaılovıchti 9-raýndta nokaýtpen jeńdi (21-1, 13 KO).
28-31 qazan kúnderi Albanııanyń Tırana qalasynda kúres túrlerinen olımpıadalyq emes salmaqtarda álem chempıonaty ótti.
Kúres túrlerinen ótken balýandar básekesinde alǵashqy júldeni 63 kelide beldesken Erjet Jarylqasyn qorjynǵa saldy. Ol fınalda ázerbaıjandyq Nıhat Zahıd Mammadlıge ese jiberdi.
23 jasqa deıingi jastar arasynda ótken álem chempıonatynda Rızabek Aıtmuhannyń altyn enshilegenin aıta ketken jón. Sondaı-aq qyzdar quramasy sapynan 72 kelide bozkilemge shyqqan Jámılá Baqbergenova japonııalyq qarsylasyna jol berip, kúmis medalǵa qol sozdy.
Erkin kúresten 70 kelide Nurqoja Qaıpanov álem chempıony atandy. Jerlesimiz fınalda japonııalyq Ioshınosýke Aoıagıden aılasyn asyrdy.
Osy jyldyń qańtarynda ótken jasóspirimder Olımpıadasynda Ilıa Mızernyh tarıhı altyn júldeni enshiledi. Shańǵymen tuǵyrdan sekirýden alǵashqy múmkindiginde ol úshinshi orynyn saqtap qaldy. Al ekinshi múmkindikte nátıjesin jaqsartyp, keıin birinshi orynǵa shyqty. Aıta keteıik, Qazaqstan buǵan deıin qysqy jasóspirimder Olımpıadasynda altyn medal almaǵan.
Taılandtyń Chıangmaı qalasynda 30 qarasha - 10 jeltoqsan aralyǵynda bokstan Azııa chempıonaty ótti. Bylǵary qolǵap sheberleriniń básekesinde Qazaqstan quramasy erler arasynda 5 altyn, 5 kúmis, 1 qola medalmen ekinshi orynda qorytyndylady. Bokstan Qazaqstan quramasy Azııa chempıonatynda qazaq eline jarqyn jeńister syılady. Fınalǵa shyqqan 5 boksshy da altynnan alqa taqty. О́zge 5 boksshy qyzymyz qola júlde qanjyǵalady.
Bıylǵy 9 aıda otandyq sportshylar 621 medal (213 altyn, 191 kúmis jáne 217 qola) jeńip aldy.
