Onyń aıtýynsha, óz ekonomıkasyna syrtqy ınvestısııalardy tartýmen birge, Qazaqstan sheteldik kapıtaldy qorǵaýda halyqaralyq mindettemelerdi ózine qabyldap aldy. Sondaı-aq ınvestorlarǵa elimizge qarsy halyqaralyq trıbýnalǵa talap qoıýǵa múmkindik berdi.
Bıyl memleket múddelerin qorǵaýǵa barynsha den qoıyldy. Qazir Ádilet mınıstrliginde 21 is bar, sonyń ishinde 13 is halyqaralyq tórelikte, altaýy sheteldik sottarda jáne 2 is sotqa deıingi talqylaýda jatyr. Bul 21 istiń ishinen 7 daý aıaqtalýǵa jaqyn, qalǵan 6 is áli qaralǵan joq. Buǵan qosa mınıstrlik Úkimettiń múddelerin shetelde bildirý jáne qorǵaý máselelerine, otandyq zań fırmalarynyń áleýetin paıdalaný múmkindikterin talqylaýǵa arnalǵan alǵashqy halyqaralyq praktıkalyq konferensııa ótkizgen. Nátıjesinde, «GRATA International Kazakhstan» zań fırmasymen kelisimshart jasalypty. Al Ádilet mınıstrligi jumysynyń mańyzdy baǵyttarynyń biri – memleketke qarsy jańa tórelik jáne sot talaptarynyń týyndaýynyń aldyn alýdaǵy sharalardy qabyldaý. Bul jumys mınıstrlik qyzmetkerleriniń shet memlekettermen ekijaqty ınvestısııalyq kelisimderdi talqylaý jónindegi, onyń ishinde jobany talqylaýdaǵy shet memleketter ókilderimen jumys kezdesýlerine qatysý sııaqty baǵyttardy qamtyp otyr.
«Bizdiń qyzmetkerler memlekettiń ınvestısııalyq ahýaldy jaqsartý jónindegi saıasatyn qoldaý maqsatynda Syrtqy ister mınıstrligi jáne «Kazakh Invest» ınvestısııalar komıtetiniń ókilderimen birge sheteldik ınvestorlarmen ınvestısııalar jáne ınvestısııalyq mindettemeler týraly kelisimderdiń jobalaryn talqylaý jónindegi jumys toptarynyń quramyna alyndy. Sondaı-aq memlekettik jáne kvazımemlekettik organdarynyń qatysýymen sheteldegi memlekettiń múliktik quqyqtaryn qorǵaý máselelerindegi daýlardy boldyrmaý jáne sheshýde tıisti usynymdarmen dóńgelek ústel uıymdastyryldy», deıdi vıse-mınıstr.
Mınıstrlik azamattar men zańdy tulǵalardyń quqyqtaryn naqty qorǵaýdaǵy keshendi jumys atqaryp otyr. Osylaı degen ol bıyl sot oryndaýshylary shamamen 8,8 mln qujatty qaraǵanyn jetkizdi. Sonyń ishinde naqty oryndalǵan qarjy 428 mlrd teńgeni qurasa, jyl basynan beri memleket kirisine 52 mlrd teńge óndirilgen.
Vıse-mınıstrdiń aıtýynsha, sot oryndaýshylarynda qazirdiń ózinde 288 myń alıment óndirý týraly is bar. Onyń 277 myńy – erler, al 11 myńnan astamy – áıelder. Al 12 myń problemalyq alımentterdiń óndiristi somasy 17 mlrd teńgeni quraıdy. Bul – qaryzdy múldem ótemeıtin boryshkerler degen sóz. Degenmen bıyl 11 aıda alıment boıynsha óndirip alynǵan bereshek qarjy 7 mlrd teńgeden asyp otyr. Alıment óndirip alý týraly atqarýshylyq qujattarda májbúrlep oryndaý sharalarynan basqa, sot oryndaýshylary ishki ister organdarynyń qyzmetkerlerimen birlesip boryshkerlerdiń avtokólikterin mamandandyrylǵan arnaıy aıyppul turaǵynda ustaý sekildi reıdtik is-sharalar júrgizedi. Sondaı-aq boryshkerlerdiń elektrondyq aqshasy men jasyryn kiristerin anyqtaýǵa baǵyttalǵan sharalar da atqarylyp, turaqty jumys orny men tabysy joqtardy jumysqa ornalastyrýǵa járdemdesý jumystary da uıymdastyrylady.
Sonymen qatar bıyl tamyzda jeńildetilgen is júrgizý júıesi iske qosyldy. Onyń negizgi mindetine azamattyq isterdiń jekelegen sanattarynda JSO-nyń qyzmetine aqy tóleýden bosatý jolymen qarjylyq júktemeni azaıtý kiredi. Qazir osyndaı jeńildetilgen óndiriske 20 AEK-ke deıingi ákimshilik aıyppuldar men salyq bereshekteri kirgizilgen. Júıe iske qosylǵannan beri 69 myńnan asa qujat oryndaldy jáne memleket kirisine shamamen 1,3 mlrd teńge óndirildi. Azamattardyń únemdelgen aqsha kólemi 349 mln teńgeden asyp otyr. Osy oń tájirıbe eskerilip, qazir ońaılatylǵan óndiris ınstıtýtyn qoldanýdy keńeıtýge kóńil bólinip jatyr.
