Infografıkany jasaǵan – Záýresh SMAǴUL ,«EQ»
Jeltoqsanǵa deıin elde múgedektigi boıynsha memlekettik áleýmettik járdemaqy alatyndar sany – 539,5 myń adam, asyraýshysynan aıyrylý boıynsha – 188,3 myń adam. Múgedektigi jóninen memlekettik áleýmettik járdemaqylardyń mólsheri múgedektiktiń tobyna, sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady. Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine, eń tómengi kúnkóris deńgeıine qaraı belgilengen.
Budan ózge, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda Memlekettik áleýmettik saqtandyrý qorynan áleýmettik tólemder tólengen. Jyl basynan 1 jeltoqsanǵa deıin 101,1 myń adam eńbek etý qabiletinen aıyrylý boıynsha áleýmettik tólem shamamen 67,2 myń otbasy asyraýshysynan aıyrylý boıynsha áleýmettik tólem alǵan. Tólemderdiń mólsheri keıingi eki jylda Memlekettik áleýmettik saqtandyrý qorynan áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffısıentteri, asyraýyndaǵy adamdar sanyna, mindetti áleýmettik saqtandyrý júıesine qatysý ótili, tabysty aýystyrýyna baılanysty belgilengen. Bul respýblıkalyq bıýdjetten tólenetin járdemaqylarǵa qosymsha tólemder.
Bıyl qańtardan múgedektigi, asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri eń tómen kúnkóris deńgeıiniń ulǵaıýyna baılanysty 7%-ǵa ósken edi. Úkimet sheshimi boıynsha eńbekke qabilettiliginen aıyrylý, asyraýshysynan aıyrylý boıynsha Memlekettik áleýmettik saqtandyrý qorynan tólenetin tólemderdiń mólsheri de 7%-ǵa artqan. Sóıtip, múgedektigi boıynsha memlekettik áleýmettik járdemaqy mólsheri 1-top úshin – 95 496 teńgeni, 2-top úshin – 76 397 teńgeni, 3-top úshin 52 089 teńgeni quraǵan. Jeltoqsandaǵy jaǵdaıǵa zer salsaq, eńbekke qabilettiliginen aıyrylý jóninen áleýmettik tólemderdiń ortasha mólsheri 59 826 teńge, asyraýshysynan aıyrylý boıynsha 64 619 teńge shamasynda bolǵan.
Jeltoqsanǵa deıin 77,6 myń otbasyndaǵy 411,3 myń adamǵa ataýly áleýmettik kómek taǵaıyndalǵan. Bıyl osy maqsatqa bıýdjetten 54,7 mlrd teńge qarastyrylǵan. Ataýly áleýmettik kómektiń negizgi maqsaty – aqshalaı tólem túrinde qoldaýdy júzege asyrý, otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý. Mysaly, tabysy óńirlik eń tómen kúnkóris deńgeıiniń 70%-nan aspaıtyn azamattarǵa toqsan saıyn áleýmettik kómek taǵaıyndalady. Tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK (5 538 teńge) mólsherinde aı saıynǵy qosymsha tólem beriledi. AÁK alýshylar qatarynan mektep jasyna deıingi 128,8 myń balaǵa 5 mlrd teńge kóleminde qosymsha tólem taǵaıyndalǵan. Budan bólek, jumysqa ornalastyrý, óz isin ashýǵa nıetti otbasylarǵa granttar berý, qajet bolǵan jaǵdaıda biliktilikti arttyrý kýrstaryna jiberý, jumyspen qamtýǵa járdemdesý qarastyrylǵan. El azamattary ataýly áleýmettik kómek taǵaıyndaýǵa ótinishti turǵylyqty jerindegi mansap ortalyǵynda, aýyl okrýginiń ákimine nemese Elektrondyq úkimet portaly, ıaǵnı egov.kz arqyly bere alady.
