– Sanjar Serikbaıuly, siz elimizde ótken jylytý maýsymynda gaz tutyný boıynsha tarıhı rekord jańartylǵanyn aıtyp, qazaqstandyqtar saǵatyna 4 mln tekshe metrden astam gaz paıdalanǵanyn atap ótken edińiz. Qazirgi jylytý maýsymynda QazaqGaz óz abonentteriniń kóńilinen shyǵyp otyr ma?
– Tutynýshylardy gazben úzdiksiz qamtamasyz etý – biz úshin árdaıym basym mindet. Eń joǵary júkteme kezinde – mysaly, qatty aıazdy kúnderi turǵyndarǵa turaqty gaz jetkizýge óz resýrsymyz jetkilikti. Qajet bolǵan jaǵdaıda, jalpy kólemi shamamen 4 mlrd m3 gaz bolatyn ózimizge qarasty jerasty gaz qoımalaryndaǵy (JGQ) gaz qorynyń esebinen qosymsha qamtamasyz ete alamyz.
Kúzgi-qysqy kezeńdi alańsyz ótkizý úshin QazaqGaz jyl saıyn naýryz aıynan bastap jylytý maýsymyna daıyndyqty bastaıdy. Qys mezgilinde iri gaz jetkizýshileriniń ken oryndary nemese gaz óńdeý zaýyttarynda qandaı da bir kezekten tys jóndeý jumystary oryn ala qalsa, qosymsha gaz kólemin alý úshin «Gazprommen» qosymsha gaz kólemine spottyq kelisimshart jasastyq. Buǵan qosa, elimizdiń ońtústik óńirlerine О́zbekstan arqyly gaz tranzıtiniń balamaly baǵyttary qarastyryldy. Sondyqtan da jylytý maýsymynyń eń qaýyrt kezeńderinen abyroımen ótýge QazaqGaz ulttyq kompanııasy tolyq daıyn dep sanaımyn. Bul QazaqGaz-dyń óndiris mamandarynyń orasan zor eńbeginiń arqasynda múmkin bolyp otyr.
Memleket basshysynyń tapsyrmasyn iske asyrý aıasynda bıyl elimizdiń 9 óńirinde 107 eldi meken gazben jabdyqtaý júıesine qosyldy. Olarda turyp jatqan 300 myńǵa jýyq otandasymyz «kógildir otyndy» paıdalanýǵa qol jetkizdi.
Prezıdenttiń tapsyrmasyna sáıkes, Astana qalasyn, astanalyq aglomerasııany, sondaı-aq Aqmola oblysynyń eldi mekenderin gazdandyrý qarqyndy jalǵasýda. Búginde elordada 70 myńǵa jýyq adam kógildir otyndy paıdalanady. 2024 jyly Jibek joly aýylyn gazǵa qosý arqyly oblystyń gazdandyrylǵan eldi mekenderiniń sanyn 16-ǵa jetkizdik.
Qazir «Taldyqorǵan–Úsharal» magıstraldyq gaz qubyrynyń qurylysy júrip jatyr. Bul Jetisý oblysynyń taǵy 66 eldi mekeni gazben qamtamasyz etiletinin bildiredi, turǵyndar men ónerkásip oryndaryn gazben jabdyqtaýdyń senimdiligin qalyptastyrady.
Sonymen qatar biz gazdy únemdi tutyný qaǵıdatyn qalyptastyrýǵa kúsh salýdamyz. Osyǵan oraı, tıisti zańdar men tutyný normatıvterine túzetýler engizý qarastyrylyp jatyr. 8 qazanda Parlament Májilisinde tıisti zań jobasynyń tanystyrylymy boldy. Qujat 2025 jyldyń I toqsanynyń sońyna deıin túpkilikti bekitilýi tıis.
– Bilýimizshe, bıyl QazaqGaz jáne halyqaralyq geologııalyq barlaý kompanııalary arasynda birqatar iri kelisimderge qol qoıyldy. Osy jobalar týraly ne aıtasyz?
– Ishki naryqta gazdy tutyný kólemi eleýli qarqynmen artyp kele jatqandyqtan, kompanııamyz geologııalyq barlaýǵa basa mán berip otyr. Keıingi eki jylda gaz qory bar 23 áleýetti ýchaske qaraldy. Sonyń ishinde 15 ýchaske QazaqGaz-ǵa bekitilip berildi. Olar ınvestorlardy tartý arqyly geologııalyq barlaý jumystaryn júrgizýdi talap etedi.
Sonymen qatar Jambyl oblysyndaǵy Anabaı ken ornynyń múmkindigi keńeıtildi, onda qysqa merzim ishinde №17 uńǵymany (3690 metr) burǵylaý boıynsha jumystar júrgizildi, uńǵymanyń joǵary ónimdiligin rastaıtyn kólemdi gaz kózi tabyldy – táýligine 120 myń m3 gaz alamyz, bul jobalyq kórsetkishten eki ese artyq. Sondaı-aq №18 uńǵymany burǵylaý jumystary bastaldy, sonyń arqasynda gaz óndirý kólemi ulǵaıtylady.
Aıta keter taǵy bir jetistigimiz – 100 paıyz carry-qarjylandyrý sharty boıynsha Chevron kompanııasymen Aqtóbe oblysyndaǵy KT-III (Jálibek) ýchaskesinde geologııalyq barlaý júrgizý týraly kelisimge qol jetkizildi. Iаǵnı ınvestor geologııalyq barlaý kezinde barlyq shyǵyn men táýekeldi óz moınyna alady. Bul elimiz úshin óte tıimdi. Qazirgi ýaqytta Chevron qolda bar seısmıkalyq derekterdi aýqymdy óńdeýdi júzege asyryp, tehnıkalyq taldaý ázirlep jatyr. Bul jumys 2025 jyly da jalǵasyn tabady.
QazaqGaz «KOR» UK-men Mańǵystaý oblysyndaǵy Aqqudyq ýchaskesinde birlesken geologııalyq barlaý týraly kelisim jasasty jáne Aqtóbe oblysyndaǵy Shalqar ýchaskesindegi jer qoınaýyndaǵy kómirsýtekterdi paıdalanýǵa kompanııa tarıhynda alǵashqy kelisimshartqa qol qoıdy. Geologııalyq barlaý jumystarynyń arqasynda Jambyl oblysyndaǵy Maldybaı ýchaskesinde jańa gaz ken oryndary ashyldy.
Sondaı-aq Aqtóbe oblysyndaǵy bolashaǵy zor Severnyı-2 ýchaskesinde geologııalyq barlaý jumystaryn birlesip júrgizý boıynsha «QazAzot» AQ-men kelisimge qol qoıyldy.
QazaqGaz Túrikmenstandaǵy gaz ken oryndaryn, sonyń ishinde «Galkynysh» gaz-munaı ken ornyn ıgerýge de qatysatyn bolady. Memleket basshysynyń Túrikmenstanǵa sapary aıasynda biz jáne «Túrikmengaz» memlekettik konserni osyndaı strategııalyq kelisimge qol qoıdyq.
Ken oryndaryn tolyq barlaý jáne ıgerý jobalarynyń barynsha dál jáne jedel oryndalýyn qamtamasyz etý úshin QGGeoDigital sıfrlyq platformasy ázirlendi. Bolashaqta osy platformany jasandy ıntellektige (JI) negiz retinde, sondaı-aq uńǵymalardy burǵylaý oryndaryn anyqtaý úshin paıdalaný josparlanyp otyr.
– Bıyl Qazaqgaz jáne Qashaǵan ken ornyn ıgerý jobasyna qatysýshylar arasynda «Bolashaq» qondyrǵysynan suıytylǵan munaı gazyn jetkizý boıynsha kelisimge qol qoıyldy. Bul ishki naryqtaǵy tapshylyqty sheshýge áser ete me?
– Bul – QazaqGaz úshin tarıhı oqıǵa. Osyǵan deıin ulttyq kompanııa tek metanmen ǵana aınalysyp keldi. Endi ónimdi bólý týraly Qashaǵan kelisimindegi ózgeristerdiń arqasynda Energetıka mınıstrliginiń sheshimimen biz suıytylǵan gaz boıynsha da ókilettikke ıe boldyq.
Qashaǵan ken ornynda suıytylǵan munaı gazyn ajyratý zaýytynyń qurylysy bastaldy. Bul joba áleýmettik-ekonomıkalyq turǵydan mańyzdy. О́ıtkeni ony iske asyrý eldegi suıytylǵan gaz tapshylyǵyn azaıtýǵa múmkindik beredi. Birinshi kezeńde biz jylyna – 400 myń tonna, al ekinshi kezeńde 700 myń tonna suıytylǵan gaz alýdy boljamdap otyrmyz.
– Memleket basshysynyń Qatarǵa sapary aıasynda bıylǵy aqpan aıynda QazaqGaz jalpy somasy 11 mlrd dollardan asatyn ınvestısııalyq tórt kelisimge qol qoıdy. Qatarlyq UCC Holding-tiń enshiles kompanııasy Power International Holding-pen yntymaqtastyq ornatyldy. Osy mámile týraly aıtsańyz.
– Qazaqstan tarıhynda alǵash ret gaz salasyna 11 mıllıard dollar ınvestısııa salynbaqshy. Qatarlyq jobalar elimizdiń ekonomıkalyq ósiminiń mańyzdy faktoryna aınalady. О́ıtkeni olar gazdyń resýrstyq bazasyn keńeıtýge jáne tasymaldaý qýattaryn jaqsartýǵa tikeleı yqpal etedi. Bul bizdiń eldi gazdyń qosymsha kólemimen qamtamasyz etip, ekonomıkanyń damýyna oń áserin tıgizedi.
Kelisimderdiń biri – «Aqtóbe – Qostanaı» jańa magıstraldyq gaz qubyryn salý úshin ınvestısııalar tartý týraly. Buǵan qosa, biz elimizdiń ońtústik jáne ortalyq óńirlerin gazben qamtamasyz etetin mańyzdy gaz arterııasy – «Beıneý–Bozoı–Shymkent» magıstraldyq gaz qubyrynyń ekinshi jelisin salý boıynsha birlesken jobany iske asyramyz. Sondaı-aq biz Qashaǵanda qýaty 2,5 mlrd tekshe metr bolatyn jańa gaz óńdeý zaýytyn (GО́Z) salý jáne salynyp jatqan qýaty 1 mlrd tekshe metr GО́Z-di satý týraly eki kelisimge qol qoıdyq. Bul rette qýaty 1 mlrd tekshe metr GО́Z qurylysy bekitilgen kestege sáıkes jalǵastyrylyp jatyr.
– Qazir korporatıvtik álemde ESG halyqaralyq standarttaryna erekshe nazar aýdarylyp otyr. 2023 jyly QazaqGaz álemdegi eń úzdik 10 gaz kompanııasynyń qataryna engeni belgili. Sizdiń oıyńyzsha, ESG reıtıngi gaz salasyna ınvestısııa tartýda qandaı ról atqarady?
– Búkil álemdegideı, Qazaqstanda da turaqty damý máselesiniń ózektiligi artyp otyr. О́tken jylmen salystyrǵanda biz Morningstar Sustainalytics baǵalaýy boıynsha 18,2 ball jınap, ESG-reıtıngtegi kórsetkishimizdi jaqsarttyq jáne elimizdiń óndiristik kompanııalary arasyndaǵy kóshbasshylyq pozısııamyzdy rastadyq.
2024 jyly UN Global Compact jahandyq shartyna qosylǵanymyz – biz úshin ornyqtylyq jolyndaǵy mańyzdy qadam. Bul – BUU-nyń bıznestiń áleýmettik jaýapkershiligin kótermeleýge baǵyttalǵan halyqaralyq bastamasy. Ornyqty damý maqsattaryna umtylys bizdiń áleýmettik jaýapty oıynshy retindegi bedelimizdi nyǵaıtyp, «jasyl» ınvestısııalarǵa jol ashady, tutastaı alǵanda, ınvestısııalyq tartymdylyǵymyzdy eselep arttyrady.
– Gazdandyrý elimizdiń halyqaralyq ekologııalyq mindettemelerdi oryndaýyna qalaı yqpal etedi?
– Osy jyly Qazaqgaz bir mańyzdy jobany – Almaty qalasynda 2-shi jáne 3-shi jylý energetıkalyq ortalyqtary (JEO) úshin syrtqy gaz ınfraqurylymyn salýdy aıaqtady. Ol mynadaı tórt nysannyń qurylysyn qamtydy: 2-JEO men 3-JEO-da eki avtomatty gaz taratý stansasy, TIP-04 jalǵastyrǵysh gaz qubyry jáne «Almaty – Baıserke – Talǵar» magıstraldyq gaz qubyrynyń ekinshi jelisi. Bul bıznesti damytýǵa jáne óńirde jańa jumys oryndaryn qurýǵa mýltıplıkatıvtik áser etedi. Almaty jylý-elektr ortalyqtaryn kómirden gazǵa aýystyrý óńirdegi ekologııalyq jaǵdaıdyń jaqsarýyna tikeleı yqpalyn tıgizedi.
Qazaqstan tarıhynda alǵash ret biz Qarmet-ti — Eýrazııadaǵy eń iri metallýrgııalyq kombınatty gazdandyryp jatyrmyz. Ol áli kúnge deıin kómirdi paıdalanady. Bul joba – Temirtaý qalasynyń ekologııasyn jaqsartýǵa qosatyn úlesimiz. Metallýrgterdiń talaı urpaǵy kómirden gazǵa aýysýdy armandaǵan edi, bizge sol armandy júzege asyrý qurmeti buıyryp tur.
– QazaqGaz-dyń otandyq taýar óndirýshilerdi qoldaýdaǵy rólin qalaı baǵalaısyz?
– Memleket basshysynyń satyp alýdaǵy otandyq taýarlar kólemin ulǵaıtý jónindegi tapsyrmasyn oryndaý aıasynda QazaqGaz «Atameken» UKP, Qazaqstan mashına jasaýshylar odaǵy jáne basqa uıymdardyń alańdarynda otandyq taýar óndirýshilermen kezdesýlerdi júıeli túrde ótkizip keledi. Osy jyly QazaqGaz jalpy somasy 30 mlrd teńge bolǵan 100-den astam ofteık-kelisimshart jasasty. Biz Qazaqstannyń mashına jasaýshylar odaǵynyń múshesi retinde oǵan qatysýshylarmen udaıy yntymaqtastyq jasasyp kelemiz. 2025 jyly biz osy baǵyttaǵy jumysty odan ári kúsheıtip, otandyq óndirýshilermen qazirgiden de kóp kelisimshart jasasýdy josparlap otyrmyz. Sonymen qatar «Azııa gaz qubyry» JShS jáne «Beıneý–Shymkent gaz qubyry» JShS sııaqty birlesken kásiporyndar úshin satyp alýdyń jańa erejeleri ázirlendi. Kompanııalar otandyq taýar óndirýshilerdi qoldaý, ofteık-kelisimsharttar jasasý jáne taýarlardy, jumystar men qyzmetterdi satyp alýda elishilik qundylyqty damytý jónindegi mindettemelerin oryndap otyr.
– QazaqGaz-dyń halyqtyń áleýmettik jaǵynan az qamtylǵan toptaryna qoljetimdi gaz berý jaıy qalaı?
– Osy aıda QazaqGaz Energetıka mınıstrligimen birlesip, «Áleýmettik ámııan» qanatqaqty servısin iske qosty. Joba Shymkent qalasy men Batys Qazaqstan oblysynda ataýly áleýmettik kómekti (AÁK) jáne turǵynjaı kómegin (TK) alatyn azamattardy qoldaýǵa baǵyttalǵan. Atalǵan óńirlerdiń AÁK jáne TK alyp júrgen turǵyndary eGov Mobile qosymshasynyń kómegimen tabıǵı gazǵa 24 paıyzǵa deıingi jeńildikti paıdalana alady. Synaq kezeńinen keıin bul joba búkil elge taratylady.
– QazaqGaz óz abonentteri úshin gazben jabdyqtaý júıesine qandaı zamanaýı tehnologııalyq sheshimder engizdi?
– QazaqGaz salany sıfrlandyrýǵa basa mán berip otyr. «Aqyldy» eseptegishterdi ornata otyryp, taratý jelileri men abonentterdi sıfrlandyrý belsendi túrde júrgizilip jatyr. Sıfrlanǵan abonentter ınteraktıvti kartadan kórinedi. Sonyń kómegimen gazdy qalypty tutynbaıtyn abonentterdiń ornalasqan ornyn anyqtaýǵa, eseptegishterdiń kórsetkishterin jınaýdy baqylaýǵa jáne gazdy esepke alýdyń ashyqtyǵyn arttyrýǵa bolady.
Shymkent qalasyndaǵy Tasken shaǵyn aýdanynda gazdy sıfrlyq esepke alýdyń qanatqaqty jobasy aıaqtaldy. Osyǵan uqsas jumystar Astana men Qaraǵandyda da júrgizildi. Joba gaz shyǵynyn azaıtýda jáne tólem tártibin jaqsartýda joǵary tıimdiligin kórsetti. Aldaǵy ýaqytta biz jasandy ıntellektini qoldana otyryp, osy júıeni búkil el boıynsha engizetin bolamyz.
2023 jyly kompanııa turǵyn úılerge gaz berý úshin eGov.kz arqyly onlaın-ótinimder júıesin engizdi. Bul azamattardyń atalǵan qyzmetke qoljetimdiligin jaqsartýǵa múmkindik berdi. Qazir biz tehnıkalyq sharttardy berýge ótinimderdiń 46 paıyzyn onlaın-platformalar arqyly alyp otyrmyz. Munyń ózi abonentterimizdiń gazǵa qosylý úderisin aıtarlyqtaı jeńildetti.
– Kompanııanyń shyǵyny eksporttan túsken paıda esebinen jabylatynyn bilemiz. Onyń kólemi aldaǵy ýaqytta qalaı ózgeredi?
– 2023 jyly kompanııamyz «Orta Azııa – Ortalyq» magıstraldyq gaz qubyry arqyly Reseı gazynyń О́zbekstanǵa tranzıtin bastady. Bul – tarıhı mańyzdy oqıǵa. Bıyl «Gazprommen» birlesken ýaǵdalastyqtar nyǵaıyp, Reseı gazynyń О́zbekstan men Qyrǵyzstanǵa tranzıtiniń kólemi arta tústi. Jaqynda ǵana «Gazprommen» gazdy óńdeý, tranzıt jáne ımport boıynsha 2025–2026 jyldarǵa arnalǵan strategııalyq kelisimsharttar jasaldy.
QazaqGaz ishki naryqqa zııan keltirmesten, halyqaralyq naryqtarǵa gaz eksportynyń kólemin saqtaıdy.
– Baǵa belgileýde qandaı ózgeris bar?
– Bıylǵy eń úlken jetistikterimizdiń biri – Qazaqstan Respýblıkasy Energetıkalyq keńesiniń ishki naryqtyń shyǵynsyzdyǵyna qol jetkizý úshin baǵa belgileý reformasyn qalyptastyrý jónindegi sheshimi. Bul Qazaqstannyń gaz salasynyń tabysty bolashaǵyn aıqyndaǵan mańyzdy kezeń deýge bolady. Áleýetti ınvestorlar endi eldiń gaz jobalaryna ınvestısııa salýǵa yntaly bolady. Ol – geologııalyq barlaý men gaz tasymaldaý ınfraqurylymyn salýǵa arnalǵan ınvestısııalar. Bul sheshim ishki naryqta gazdy satýdy aldaǵy úsh-tórt jyl ishinde shyǵynsyzdyq deńgeıine kezeń-kezeńmen shyǵarýǵa múmkindik beredi. Biraq biz baǵanyń kúrt ósýine jol bermeımiz.
– Endi mamandaryńyz týraly aıtsańyz. Kompanııada qyzmetkerlerdiń biliktiligin arttyrý úshin qandaı sharalar qabyldandy?
– Ár qyzmetkerimiz – kompanııamyzdyń basty qundylyǵy. Áriptesterimiz oqytý men taǵylymdamadan udaıy ótip, bizdiń seriktesterden álemdik ozyq tájirıbeni úırenip júr. Máselen, bıyl biz Eni-men yntymaqtastyqty kúsheıtip, qyzmetkerlerimizge arnalǵan kýrstar serııasyn ótkizdik. Biz osy jumysty 2025 jyly odan ári jalǵastyrýǵa nıettimiz.
Buǵan qosa, QazaqGaz-da gaz salasynyń beıindi mamandarynyń biliktiligin arttyrýdyń jáne olardy kásibı qaıta daıarlaýdyń biryńǵaı korporatıvtik ortalyǵy – Oqý ortalyǵy quryldy. Onyń jumysy aıasynda Solar Turbines, Baker Hughes sııaqty sheteldik kompanııalarmen yntymaqtastyq ornatý josparlanyp otyr. Bizdiń mindetimiz – ǵylymdy, ınnovasııany jáne óndiristi ıntegrasııalaý, gaz salasynda otandyq ǵylymdy kommersııalandyrýdy damytý. Osy maqsatta Satbayev University-de QazaqGaz-dyń mamandandyrylǵan aýdıtorııasyn ashtyq. Bizdiń jumysymyzda professorlardyń, oqytýshylardyń jáne QazaqGaz mamandarynyń sońǵy tehnologııalyq ázirlemeleri qoldanylatyn bolady.
– Kompanııanyń jumyskerlerdiń eńbek jaǵdaıy men ómir súrý jaǵdaıyn jaqsartýǵa arnalǵan qandaı bastamalary bar?
– QazaqGaz jumyskerlerdi áleýmettik qoldaý aıasynda 2022 jyldan bastap óndiristik personaldyń jalaqysyn kezeń-kezeńimen arttyryp keledi. Naqty aıtsam, keıingi eki jylda ol 15 paıyzdan 45 paıyzǵa deıin kóbeıtildi. Buǵan qosa, jyl saıyn jalaqyny ındeksteý júrgiziledi. Onyń mólsheri bıyl 9 paıyz boldy. Sondaı-aq tabysy tómen mamandardyń jalaqysyn ortasha deńgeıge jetkizý sharalary qoldanylyp keledi.
Memleket basshysynyń bıylǵy 25 jeltoqsandaǵy Jarlyǵymen 2025 jyl Jumysshy mamandyqtarynyń jyly bolyp jarııalanǵany málim. QazaqGaz kompanııalar toby boıynsha óndiristik mamandarymyzdyń sany – 13 myńnan asady. Bul – barlyq jumyskerdiń 88,5 paıyzy. Biz Prezıdenttiń bastamasyn tolyǵymen qoldaımyz jáne eńbek adamynyń mártebesin arttyrý úshin barlyq qajetti sharany qabyldaımyz.
– QazaqGaz jańa jylǵa qandaı josparmen kirmekshi?
– 2025 jyl ulttyq kompanııa boıynsha Geologııalyq barlaý jáne kúrdeli qurylys jyly bolyp jarııalandy. Qazirdiń ózinde órshil josparlar ázirlendi. Olarda jobalardy, sonyń ishinde gazdy geologııalyq barlaý jobalaryn qysqa merzimde iske asyrý boıynsha aıqyn maqsattar men mindetter qamtylǵan. Saladaǵy qazirgi syn-qaterlerge qaramastan, biz barlyq kedergini birtindep eńserip kelemiz.
Memleket basshynyń bıylǵy Joldaýynda gaz salasyn damytýǵa erekshe nazar aýdarylyp, damýdyń jańa keshendi josparyn ázirleý tapsyryldy. Bul rette burynǵy jospar tıisti kesteden oza iske asyrylyp, QazaqGaz-dyń damý strategııasynyń bir bóligi de oıdaǵydaı oryndalǵandyǵyn atap ótpekpin. Endi biz jańa qujatty ázirleýge kiristik. Aıaqtalǵannan keıin ony Úkimet bekitetin bolady. Shyn máninde biz gaz salasyn damytýdyń sapalyq turǵydan jańa kezeńine kóship jatyrmyz. Sondyqtan 2025 jyl biz úshin asa qaýyrt ta jemisti jyl bolýǵa tıis.
Sondaı-aq Memleket basshysy tarapynan gaz salasynyń damýyna turaqty baqylaý jasalyp otyrǵanyn aıtqan jón. QazaqGaz komandasynyń úılesimdi jumysynyń, «Samuryq-Qazynanyń», Energetıka mınıstrliginiń, Úkimettiń jáne seriktesterimizdiń qoldaýynyń arqasynda biz aldymyzda turǵan negizgi mindetterdi iske asyrý úshin mańyzdy qadamdar jasap, nyq senimmen ilgerilep kelemiz. Al aldymyzda bárimizdi aýqymdy jumys kútip tur. Biz týyndaıtyn qıyndyqtardy jeńip qana qoımaı, naqty nátıjelerge senimdi túrde qol jetkizýge daıynbyz.
2024 jylǵy nátıjelerdiń arqasynda biz gaz salasyn damytýdyń jańa erasyn bastap jatyrmyz jáne 2025 jyl biz úshin óte qarqyndy jáne jemisti bolmaq.
– Áńgimeńizge rahmet. Jańa jylda halqymyzdy jańa jetistikterińizben qýantyńyzdar!
Áńgimelesken –
Káribaı MUSYRMAN,
«Egemen Qazaqstan»
