Jalpy, «Disney» kompanııasynda fılmderdi túrli elderge beıimdep, dýblıajdaý – burynnan bar úrdis. «Disney» jyl saıyn ár fılmniń túrli tilderdegi 30-ǵa jýyq nusqasyn daıyndaıdy. Qazaq tiliniń osyndaı tańdaýly tilder qataryna qosylyp, álemge áıgili keıipkerlerdiń qazaq kórermenimen bir tilde sóıleýi, árıne, aıtýly oqıǵa.
Eske salsaq, kishkentaı kórermenniń kóńilinen shyqqan «Oıjumbaq 2» anımasııalyq fılminiń basty keıipkeri Raılıdi Aqerke Estaıqyzy, Qýanyshty – Gúlnar Tlebaldy, Muńdy – Alma Qylmuqan, Qorqynyshty – Rústem Janyamanov dybystaǵan bolatyn. «Ninety One» boız-bendynyń solısteri – Azamat Ashmaqyn men Batyrhan Malıkov, dýblıaj rejısseri Shah-Murat Ordabaev ta jobaǵa úles qosqan edi.
Al kópten kútken shytyrman oqıǵalarǵa toly «Moana 2» anımasııalyq fılminiń rejısseri – kishi Deıv Derrık, mýzyka avtory – «Gremmı» syılyǵynyń júldegerleri Ebıgeıl Barloý men Emılı Bear, «Gremmı» nomınanty Opetaııa Foaıa men úsh dúrkin «Gremmı» júldesiniń ıegeri Mark Manchına.
Qazaq tilinde kórsetilgen kelesi týyndy – «Mýfasa: Arystan patsha». 2019 jylǵy «Arystan patsha» fılminde qoldanylǵan zamanaýı tehnologııalardyń kómegimen túsirilgen bul kartına Mýfasanyń balalyq jáne jastyq shaǵyn, baýyry Shrammen aradaǵy óshpendiliktiń túpki tarıhyn baıandaıdy. Fılm rejısseri – Barrı Djenkıns («Aı sáýlesi»), ssenarııin Djeff Natanson («Termınal») jazǵan.
Usynylǵan fılmderdiń qazaq tilindegi dýblıajy otandyq «Movie Dalen» stýdııasynda jasaldy.
Mádenıet jáne aqparat mınıstrligi men halyqaralyq «Qazaq tili» qoǵamy «Disney» stýdııasynyń bul bastamasyna qoldaý bildirdi. Jalpy, Halyqaralyq «Qazaq tili» qoǵamynyń negizgi jumys baǵyty «Disney» kompanııasynyń ustanymymen úndes keledi. «Qazaq tili» qoǵamy memlekettik tildegi kontent qoryn, atap aıtqanda, bala tilin qazaqsha shyǵarýǵa qajet quraldardan bastap, ár adamnyń qazaq tili aıasynda tulǵa ári maman bolyp qalyptasýyna kerek mazmun qoryn arttyrýǵa basymdyq beredi.
