Foto: ashyq derekkóz
Prezıdenttiń aıtýynsha, «Taza Qazaqstan» aksııasy qoǵamǵa ekologııalyq mádenıettiń jańa talaptaryn engizý ıdeıasynan bastaý alady.
«Halyqtyń bul bastamaǵa barynsha qoldaý bildirgenine tántimin. Ásirese, jastarǵa rızashylyǵymdy bildirgim keledi. Qazaqstan azamattary munyń kezekti bir naýqan emes, ozyq oıly qoǵam qalyptastyrý jolyndaǵy ıdeologııalyq platforma ekenin túsindi.
Biz, túptiń túbinde, tabıǵattyń baılyǵyna jáne kúndelikti turmys-tirshiligimizge nemquraıly qaraıtyn jaǵymsyz ádetten birjola arylýymyz qajet. Tazalyqty saqtaý jáne tabıǵatty aıalaý ulttyq bolmysymyzdyń ajyramas bóligine aınalýǵa tıis. О́rkenıetti elderdiń bári osyny ustanady», dedi Memleket basshysy.
Aıta keteıik, byltyr bul aksııaǵa 3,8 mıllıonǵa jýyq adam qatysty. 1,5 mıllıon tonnadan astam qoqys jınalyp, 3,2 mıllıonnan astam kóshet egildi.
Qasym-Jomart Toqaev «Taza Qazaqstan» jobasynyń júzege asýyna, eń aldymen, ákimder jaýapty ekenin tilge tıek etti.
«Eldi mekenderdiń tazalyǵy – turmys sapasynyń joǵary ekenin bildiredi. Men aımaqtarǵa barǵanda qalalardyń qalaı abattandyrylǵanyna únemi nazar aýdaramyn. Osy rette «Taza Qazaqstan» ıdeıasy ulttyq ıdeologııamyzdyń asa mańyzdy bóligine aınalýǵa tıis ekenin taǵy da qaıtalap aıtamyn», dedi el Prezıdenti suhbat barysynda.
