Nysan qurylysy 2024 jyly bastalǵan. Ol – «Qazmunaıgaz» UQ jáne ıtalııalyq «ENI» kompanııasynyń birlesken jobasy. Bas merdiger – «Hi-Teck «Qazaqstan» seriktestigi.
Májilis depýtaty Edil Jańbyrshın Memleket basshysynyń tapsyrmasy boıynsha elimizde kómirtektik beıtaraptyq strategııasyn júzege asyrý bastalǵandyǵyn atap ótti.
«Kún elektr stansııasy 50 MVt, jel stansııasy 77 MVt jáne gaz stansııasy – 120 MVt qýatpen jumys isteıdi. Gıbrıdti stansııa Jańaózen qalasyndaǵy kásiporyndardy, munaı óndirýshi kompanııalar men «Qazmunaıgaz» gaz óńdeý zaýytyn elektr energııasymen turaqty túrde qamtamasyz etedi», dedi E.Jańbyrshın.
Qurylysshylarmen áńgimelesý barysynda depýtattar Parlamentte qabyldanǵan zańdardyń júzege asyrylýy jóninde pikir almasty. Ásirese, «Jer qoınaýy jáne jer qoınaýyn paıdalaný» týraly zańnyń artyqshylyqtaryn ortaǵa salyp, bul qujatty Prezıdenttiń qoǵamda ádildik ornatýǵa baǵyttaǵanyna nazar aýdardy.
Aıta ketý kerek, Mańǵystaýda salynyp jatqan gıbrıdti elektr stansııasy ınnovasııalyq joba. Elimizde alǵash ret júzege asyrylyp otyr. Stansııa iske qosylǵan soń 70 adam jumyspen qamtylady. Aımaqty energııamen qamtamasyz etýdiń jańa kózderi kómirqyshqyl gazynyń qaldyqtaryn azaıtady. Stansııa qurylysyn 2025 jyldyń naýryz aıynda aıaqtaý josparlanǵan.
