Almaty qalasy ákimdigi jáne qalalyq mýzeıler birlestiginiń qoldaýymen shyqqan ensıklopedııanyń kólemi – 47 baspa tabaq, taralymy – 1000 dana. Alǵysózin Qazaqstan Jazýshylar odaǵynyń basqarma tóraǵasy Mereke Qulkenov, Almaty qalasy mýzeıler birlestiginiń dırektory Lázzat Saǵyndyqova jáne Á.Qaıyrbekov jazǵan. Bul eńbekte qazaq ádebıetiniń klassıgi, Qazaqstannyń halyq jazýshysy, dramatýrg, Sosıalıstik Eńbek Eri, akademık, sóz zergeri Ǵ.Músirepovtiń ómir joly, ósken ortasy, shyǵarmalarynyń jazylý tarıhy, ádebı baılanystary, oı-tujyrymdary, zamandastarynyń lebizi molynan qamtylǵan. Ensıklopedııany daıyndaýǵa Qazaqstan Respýblıkasy Mádenıet qaıratkeri G.Qudabaeva, Mýzeı kesheniniń ǵylymı qyzmetkerleri N.Altaeva, R.Otar, A.Kósherbaeva, J.Taeva qatysty. Redaktory – Almaty qalasy mýzeıler birlestigi dırektorynyń ǵylymı jumystar jónindegi orynbasary R.Qaıratuly.
Is-sharanyń moderatory Á.Qaıyrbekov ensıklopedııanyń qalaı ázirlengeni týraly qysqasha aqparat berdi. Qazaqstan Respýblıkasy Prezıdentiniń keńesshisi M.Otarbaev, Almaty qalasy ákiminiń keńesshisi M.Ahetov, Qazaqstan Jazýshylar odaǵynyń basqarma tóraǵasy M.Qulkenov, Qazaqstannyń Eńbek Eri A.Áshimov, Memlekettik syılyqtyń laýreaty N.Orazalın, t.b. kitap tusaýkeseriniń rásimin jasady. Kitaptyń 5 danasy Ulttyq kitaphana qoryna tapsyryldy. Kópshilik qaýymǵa klassıktiń kózi tirisinde túsken derekti fılmderden arnaıy daıyndalǵan shaǵyn beınejazba kórsetildi.
Kitap tanystyrylymyna Ǵabeńniń qyzy Gaýhar Músirepova, jazýshynyń jıeni Sáýle, nemere qaryndasy Janat, t.b. qatysty. Ánshi, Qazaqstannyń eńbek sińirgen qaıratkeri E.Shúkiman kezinde Ǵabeńniń súıip tyńdaǵan ánderi Aqan seriniń «Mańmańgeri» men Birjan saldyń «Alqarakók» ánderin oryndady. Kesh sońynda qonaqtarǵa ensıklopedııanyń bir-bir danasy syıǵa berildi.
Nazgúl ALTAEVA,
S.Muqanov pen Ǵ.Músirepovtiń ádebı-memorıaldyq mýzeı kesheniniń ǵylymı qyzmetkeri
