Sapar aıasynda depýtattar jergilikti turǵyndarmen kezdesip, olardyń turmys-tirshiligin, óńirdegi ekologııalyq jaǵdaıdy jáne atqarylyp jatqan jumystardy talqylady. Azamattardyń usynys-tilekterin tyńdap, Parlamentte qabyldanyp jatqan zańdar týraly pikir almasty.
– Búgin jylyoılyqtarmen kezdesip, kóktemgi maýsymǵa daıyndyqpen tanystyq. Atap aıtqanda, Jem ózeni men Qursaı ózekteriniń túbin tereńdetý jumystaryn kórdik. Joba aıasynda jergilikti jerdiń geografııasyn jatqa biletin kónekóz qarııalar men aýyldyń belsendi azamattarynyń usynystary eskeriledi. Osy másele boıynsha atqarylyp jatqan jumys árdaıym bizdiń nazarymyzda bolady, – dedi depýtat Dúısenbaı Turǵanov.
Joba aıasynda jalpy uzyndyǵy 95 shaqyrym bolatyn túp tereńdetý jumystary josparlanǵan. Atap aıtqanda, Qursaı kanaly – 46,1 shaqyrym, Jem ózeni – 48,9 shaqyrym, bóget qurylysy – 61 shaqyrym.Qazirgi ýaqytta Jem ózeniniń 4 shaqyrymy jáne Qursaı kanalynyń 31 shaqyrymy, jalpy 35 shaqyrym túp tereńdetý jumystary aıaqtalǵan. Túp tereńdetý jáne bóget salý jumystaryna 107 arnaıy tehnıka jumyldyrylǵan.
Jumys kestege saı kóktemge deıin tolyq aıaqtalady dep josparlanyp otyr. Depýtattardyń aıtýynsha, bul sharalar kóktemgi sý tasqynynyń aldyn alýǵa jáne aımaqtyń ekologııalyq jaǵdaıyn jaqsartýǵa septigin tıgizedi.
