Májilismender «Jaıly mektep» ulttyq jobasy aıasynda salynǵan jańa úlgidegi mektepte boldy. Depýtat Sergeı Ponomarev bul mektep partııanyń saılaýaldy ýádelerin is júzinde oryndap jatqanynyń aıqyn kórinisi ekenin aıtty. Joba aıasynda Almatyda birneshe jańa mektep ashyldy, ol oqýshylardyń sapaly bilim alý múmkindigin arttyra túspek.
– Memleket basshysy «Ana tili» gazetine bergen suhbatynda atap ótkendeı, elimiz boıynsha 460 myń oqýshyǵa arnalǵan 217 jaıly mektep salý josparlanyp otyr. Onyń 105-i salyndy. Mektep – bolashaq urpaqtyń berik negizin qalaıtyn jer. Bizdiń mindetimiz – ár balanyń sapaly bilim alýyna qolaıly jaǵdaı jasaý. Sondyqtan muǵalimderdiń kásibı áleýeti ǵana emes, ustazdar men oqýshylarǵa qolaıly jaǵdaı jasaý da mańyzdy. Bul mektepter balalarymyzdyń bilim alýy úshin barlyq múmkindikti berip otyr, – dedi Aıdos Sarym.
Jalpy qala boıynsha barlyǵy 21 jańa úlgidegi mektep salynýda. Qurylys jumystary Májilistiń jáne qalalyq máslıhat depýtattarynyń erekshe baqylaýynda.
Sonymen qatar májilismender «AMANAT» partııasynyń bastamasymen salynǵan otbasylyq-dárigerlik ambýlatorııanyń jumysymen tanysty. Medısınalyq mekeme azamattarǵa sapaly medısınalyq qyzmet kórsetýge, sondaı-aq emhanalar júktemesin azaıtýǵa baǵyttalǵan.
– Endi Alataý óńiriniń turǵyndary óz úılerine jaqyn jerden medısınalyq kómek alatyn bolady. Biz ár pasıentke jeke kóńil bólýge, aýrýlardyń aldyn alýǵa jáne zamanaýı qural-jabdyqtarmen tıimdi emdeýge basa nazar aýdaryp otyrmyz. Mundaı jobalar qoǵamynyń ál-aýqatyn arttyrýda mańyzdy ról atqarady. Jalpy alǵanda, densaýlyq saqtaý, dárigerlerdi jan-jaqty qoldaý máseleleri Prezıdent pen partııamyzdyń erekshe baqylaýynda, - dedi qalalyq máslıhat depýtaty Jandos Nádirov.
Sondaı-aq, depýtattar jergilikti turǵyndardy tolǵandyrǵan máselelerdi ortaǵa salyp, Májiliste qabyldanǵan zańnamalyq qujattar týraly málimet berdi.
Depýtattardyń sapary Almaty qalasyndaǵy áleýmettik jobalardyń oryndalý barysyn baqylaýǵa, sondaı-aq turǵyndardyń ózekti máselelerin zerdelep, júıeleýge baǵyttalǵan mańyzdy qadam boldy. «AMANAT» partııasy saılaý aldyndaǵy mindettemelerin oryndaýdy jalǵastyryp, elimizdiń turaqty damýyna úles qosýda.
