Foto: ashyq derekkóz
Memleket basshysy Qasym-Jomart Toqaev Mádenıet jáne aqparat mınıstrliginiń qyzmetine qatysty, sondaı-aq basqa da birqatar mańyzdy jańashyldyqty qamtıtyn zańǵa qol qoıǵan edi. Osy tusta sala mınıstri Aıda Balaeva vedomstvo jumysyna qatysty málimdeme jasady.
Mınıstrdiń aıtýynsha, Sháken Aımanov atyndaǵy «Qazaqfılm» kınostýdııasy óziniń jańa damý kezeńine qadam basqaly tur.
«Endi elimizde túsiriletin fılmderdi qarjylandyrýdyń jalpy kóleminiń keminde 30%-y tikeleı «Qazaqfılmge» baǵyttalady. Bul kınostýdııanyń jumysy tıimdi ári qarjylyq turǵydan turaqty bolýyna múmkindik beredi.
О́kinishke qaraı, kınostýdııada bolyp jatqan oń ózgeristerge kóńili tolmaıtyn kınogerler de joq emes. Árıne, ashyqtyq pen jarııalyqqa, kirý rejımin qatańdatýǵa, kınostýdııa qyzmetiniń tıimdiligin tekserýge baǵyttalǵan qarjylyq reformalar barlyǵyna birdeı unaı bermeıdi», dedi Aıda Balaeva.
Bul rette mınıstr kınostýdııa – memlekettik nysan ekenin eske salyp, onyń arnaıy erejeleri bolýy zańdy ekenin jetkizdi. Buǵan stýdııa aýmaǵynda qymbat qural-jabdyqtar men mádenı mura obektileri ornalasqany da sebep bolyp otyr.
«Qarjylyq máselege keler bolsaq, tıimdi menedjment qural-jabdyqtar men úı-jaılardy jalǵa berý kınostýdııanyń múddesine saı júzege aspaǵanyn kórsetti. Kóptegen jeke kompanııalar «Qazaqfılmde» kommersııalyq fılmder túsirgenimen, ondaǵy tabys kınostýdııa bıýdjetine túspegen.
Kommersııalyq aýmaqtarǵa aýdıt júrgizý kezinde de jalǵa alý qunyn bekitýde tańdamaly tásilder bolǵany anyqtaldy. Máselen, eki kelisimshart boıynsha jalǵa alý baǵasy ádeıi tómendetilgen, sonyń saldarynan bir jaǵdaıda 11 aı ishinde 5 940 mıllıon teńge, al ekinshisinde 7 aı ishinde 42 mıllıon teńge shyǵyn kelgen», dep túsindirdi vedomstvo basshysy.
Onyń aıtýynsha, qural-jabdyqtar men úı-jaılardy jalǵa berýde qatań rejım men baqylaý ornatý, jańa qarjylandyrý júıesimen durys basqarý arqyly stýdııany ózin-ózi qamtamasyz etetin tabysty ortalyqqa aınaldyrýǵa bolady.
«Máselen, ótken jyly stýdııa tórt kommersııalyq fılmdi ekranǵa shyǵardy, onyń ishinde «Shyrmaýyq» (rejısser A.Sharǵyn) jáne «Kapıtan Baıtasov» (rejısser D.Qamshybaev) kórkem fılmderi, sondaı-aq eki derekti fılm bar.
Sonymen qatar «Altyn adam» atty anımasııalyq fılm tolyǵymen «Qazaqfılmniń» tehnıkalyq bazasynda jasalyp, ony 2025 jyldyń naýryz aıynda kópshilik nazaryna usyný josparlanyp otyr», dep qosty Aıda Balaeva.
Aıta keteıik, qazirgi kezde «Jabaıy» jáne «Malaı» atty kórkem fılmder túsirilip jatyr, odan bólek «Kúlpásh», «Búrkitshi» jobalary júzege asyrylady. Sondaı-aq bıyl óz qarajaty esebinen «Mýza» atty derekti fılm túsirý josparlanyp otyr.
«Memleket basshysynyń «Qazaqfılm» kınostýdııasy jumysyn jetildirý boıynsha qoıyp otyrǵan mindetterdi oryndaýda búgingi qabyldanǵan zań sheshýshi ról atqarady dep senemin.
Buǵan deıin de atap ótkenimdeı, «Qazaqfılm» tek jumysyn jalǵastyryp qana qoımaı, qarqyndy túrde damı beredi», dep sózin aıaqtady mınıstr.
