Sýret:baq.kz
«Amanat» partııasy fraksııasynyń depýtattary Nurjan Áshimbetov, Jarqynbek Amantaı jáne Vera Kım «ERG Service» JShS quramyna kiretin Pavlodar mashına jasaý zaýytynda boldy. Sapar barysynda 1955 jyly iske qosylǵan zaýyttyń qazirgi zamanǵy qaýipsizdik standarttaryna sáıkes keletini jáne jumysshylarǵa qolaıly eńbek jaǵdaıy jasalǵany aıtyldy.
«2025 jyldy Prezıdent jumysshy mamandyqtary jyly dep jarııalady. Jastarǵa kásiporyn basshylyǵy ǵana emes, memleket tarapynan da qoldaý kórsetiletinine osynda kóz jetkizdik. Jas mamandar tájirıbeden ótip, qyzmette ósý múmkindigine ıe bolady. Bul – jumysshy mamandar úshin áleýmettik qoldaý», dedi V.Kım.
Al Májilis depýtattary Aıgúl Quspan, Aıdos Sarym, Sergeı Ponomarev, Rınat Zaıytov Almaty qalasyna sapary aıasynda Alataý aýdanyndaǵy áleýmettik nysandardyń jumysyn baqylady. Sondaı-aq «Jaıly mektep» ulttyq jobasy aıasynda salynǵan jańa úlgidegi mektepte boldy.
«Memleket basshysy «Ana tili» gazetine bergen suhbatynda atap ótkendeı, elimiz boıynsha 460 myń oqýshyǵa arnalǵan 217 jaıly mektep salý josparlanyp otyr. Onyń 105-i salyndy», dedi Aıdos Sarym.
Májilismen Nurtaı Sabılıanov Semeı qalasyndaǵy «Ortalyq» jylý energetıka ortalyǵynyń jumysymen tanysyp, ujymymen kezdesý ótkizdi. Oblys qaıta qurylǵanǵa deıin qaladaǵy 21 jylý qazandyǵynyń 80 paıyzynyń tozyǵy jetken edi. Búginde jaǵdaı túzelip keledi. Depýtattyń aıtýynsha, byltyr respýblıkalyq bıýdjetten qarajattyń bólinýine oraı olardyń eskirýi 60 paıyzǵa tómendegen.
Parlament Májilisiniń vıse-spıkeri Albert Raý, depýtattar Ekaterına Smyshlıaeva, Berik Beısenǵalıev, Erkin Ábil «MILH» óndiristik kásiporny bazasynda Qostanaı oblysynyń bıznes ókilderimen kezdesti. Otyrysta qazirgi tańda Májiliste qaralyp jatqan taýardyń shyqqan elin anyqtaý máseleleri boıynsha zańnamalyq túzetýler talqylandy. Kóterilgen negizgi máseleniń biri sertıfıkattaý rásimderin jeńildetý boldy. Bıznes ókilderi jańa talaptar aıasynda ónimniń shyǵý tegin rastaý úderisiniń kúrdelene túsýi múmkin degen alańdaýshylyǵyn bildirdi.
«Bizdiń mindetimiz – attestasııalaý úderisinde qarapaıymdylyq pen tıimdilikti qamtamasyz etetin, artyq ákimshilik aýyrtpalyqtardy boldyrmaıtyn júıe qurý. Zań jobasy kásipkerlerdi qoldaýǵa jáne memlekettik organdarmen ózara is-áreketti jeńildetýge baǵyttalǵan», dedi A.Raý.
Aqtóbe oblysyna sapary barysynda Májilistiń vıse-spıkeri Danııa Espaeva men depýtat Juldyz Súleımenova kópsalaly oblystyq balalar aýrýhanasy ujymymen kezdesti. Kezdesýde dárigerler medısınalyq qural-jabdyqtardyń jáne operasııa jasaýǵa bólinetin qarajattyń jetkiliksizdigin aıtyp, aýdanaralyq hırýrgııalyq bólimsheler ashý týraly usynystaryn jetkizdi.
Májilis depýtattary Ádil Jubanov pen Dúısenbaı Turǵanov Atyraý oblysy Jylyoı aýdanyna sapary barysynda Jem ózeni men Qursaı ózekteriniń túbin tereńdetý jobasynyń oryndalý barysyn kórip qaıtty. Sapar aıasynda depýtattar turǵyndarmen kezdesip, olardyń turmys-tirshiligin, óńirdegi ekologııalyq jaǵdaıdy jáne atqarylyp jatqan jumystardy talqylady.
Halyqpen kezdesý aıasynda depýtat Dáýlet Turlyhanov Astana qalasyndaǵy «Qazaqstan» sport kesheniniń jaǵdaıymen tanysty. Al Májilistegi «Inklıýzıvti Parlament» depýtattyq tobynyń jetekshisi Erlan Ábdıev Ordabasy aýdany Temirlan aýylyndaǵy «Shapaǵat» áleýmettik qyzmetter kórsetý ortalyǵyna bardy. Ortalyqtaǵy azamattar kókeıkesti máselelerin ortaǵa salyp, olardy sheshý boıynsha usynystaryn jetkizdi.
