Sıfrlyq damý belesi

Qazirgi tańda sıfr­lan­dyrýdyń eń jarqyn mysaly – sıfrlyq qu­jat­tar búginde tolyqqandy fızıka­lyq qujattarǵa teńes­tirildi. Azamattar el ishinde ushaqtar­da, poıyzdarda tek sıfrlyq qujattardyń negi­zinde erkin júre alady. Byl­tyr bul qyz­met 200 mln-nan astam ret kór­setilgen. Taǵy bir jetistik – onlaın notarıýs.

«Degenmen, keıbir azama­tar qyzmetti qoldanýda yńǵaı­syz­dyqqa tap bolatynyn baı­qadyq. Olar qosymshadan iz­deý, siltemeni kórý sııaqty min­­detterdi qıynsynady. Olar­ǵa áli de halyqqa qyzmet kór­setý ortalyǵyna barǵan jeńildeý. Sondyqtan bul jerde jasandy ıntellektini engizý qajet dep sanaımyz. Jasandy zerdeni bız­nes salalaryna engizý de elimizdiń ekonomıkalyq kórsetkishteri­ne eleýli áser etedi. Ekonomıka tıimdirek bolady, eńbek ónim­diligi artyp, bilim salasy damıdy. Endi biz jasandy ıntellekt negizinde vırtýaldy kómekshilerdi engizý boıynsha jumystardy bastadyq», degen edi Úkimet otyrysynda Sıfr­lyq damý, ınnovasııalar jáne aeroǵarysh ónerkásibi mınıstri Jaslan Mádıev.

Bul mindetterdiń barlyǵy Jasandy ıntellektini damy­týdyń 2029 jylǵa deıingi tu­jy­rymdamasy men Jasandy ın­tellekt týraly jańa zań aıasynda jalǵasady. Atalǵan tu­jy­­rymdamada birneshe ma­ńyz­dy baǵyt bar. Birinshisi – sýper­­kompıýterlik ınfra­­qurylymdy daıyndaý, ekin­shisi – zańnamalyq aktilerdi shyǵarý, úshinshisi – adamı kapıtaldy damytý. Bıyl osy úsh baǵyt basty nazarda bolmaq.

Jyl saıyn elimizdegi star­taptardyń sany men sapasy artyp keledi, bul úrdis aldaǵy ýaqytta da jalǵasyn tappaq. «Astana Hub» tehnoparki osy jyly da «Silkway Accelerator» jáne «AI’preneurs» sekildi tabysty baǵdarlamalar legin jal­ǵap, startap negizin qalaý­shy­larǵa qoldaý kórsetedi. Byltyr qurylǵan «Astana Hub Ventures» qory bıyl jergilikti startaptardy qoldaýda mańyzdy quralǵa aınalmaq. Aıta keteıik, 10 mıllıon dollar kóleminde baǵalanatyn bul qor «Astana Hub» baǵdarlamasynyń túlek­terine ınvestısııa salýǵa baǵyttalǵan.

Aıta keteıik, búginde «Astana Hub» tehnoparki 1 500-den astam qatysýshy­ny bir arnada toǵystyrady. Olardyń qata­rynda jasan­dy ıntellekt salasynda jumys isteıtin 150 startap bar. Jańa «Alem AI» ortalyǵy elimiz­diń JI salasyndaǵy óńirlik kóshbasshy rólin nyǵaıtyp, ınnovasııalar, zertteýler men jahandyq yntymaqtastyq úshin aýqymdy platforma usynady.