Foto: ktez.kz
О́tken jyly besjyldyq baǵdarlama aıasynda jalpy quny 1,9 trıllıon teńgeni quraıtyn 86 ınvestısııalyq jobany júzege asyrý aıasynda oblysta 37 mıllıard teńgeniń 21 jobasy júzege asyrylyp, 411 jańa jumys orny ashyldy.
2025 jyly Qyzylorda oblysynda jalpy quny 275,3 mlrd teńgeni quraıtyn 24 jobany iske qosý, 1 myńǵa jýyq jumys ornyn qurý jáne 30,8 mlrd teńge ónim shyǵarý josparlandy.
«Jalpy qýattylyǵy 141 MVt bolatyn 4 kún jáne 1 jel elektr stansııasynyń qurylysyn júzege asyrýdy josparlap otyrmyz. Oblystyń elektr energııasyna degen suranysy táýligine 200 MVt quraıdy. Oblysta jalpy qýattylyǵy 89 MVt bolatyn 9 kún elektr stansııasy jumys isteıdi. 5 joba iske qosylǵanda oblysymyz tolyǵymen jasyl energetıkaǵa kóshedi», dedi oblys ákiminiń orynbasary Ardaq Zebeshev.
Qazaqstan Respýblıkasy Syrtqy ister mınıstrliginiń Investısııalar komıteti jıynǵa qatysýshylarǵa Ulttyq sıfrlyq ınvestısııalyq platforma – ınvestorlar, memlekettik organdar jáne kvazımemlekettik sektor arasyndaǵy ózara árekettestiktiń biryńǵaı terezesiniń múmkindikterin tanystyrdy. Búgingi tańda platforma pýlynda 836 joba bar, onyń 246-syn 2025 jyly iske asyrý josparlanǵan.
Jıynda óńirdegi eki iri ınvestısııalyq jobany júzege asyrýǵa qatysty túıtkildi máseleler talqylandy. Bul – Shalqııa polımetall ken ornynyń tıimdiligin arttyrý jáne kalsıılendirilgen soda óndiretin zaýyt salý.
Atap aıtqanda, azyq-túlik jáne tehnıkalyq tuz, polıpropılen qaptar shyǵaratyn «Araltuz» AQ qazirgi tańda Qazaqstandaǵy alǵashqy kalsıılendirilgen soda zaýytyn salý jobasyn júzege asyrýda. Bul shıkizat shyny bótelkelerdi óndirý úshin qajet. Qazirgi ýaqytta ol tolyǵymen derlik Qazaqstanǵa ımporttalady. Joba qomaqty ınvestısııany qajet etedi jáne nesıelik qarjylandyrýdyń merzimi men sharttaryn uzartý týraly máseleler bar. Mınıstr tıisti qarjy ınstıtýttaryna jobany qoldaýdyń barlyq múmkindikterin tabýdy tapsyrdy.
