Jınalǵandar aldymen bir mınýt únsizdikpen qaza tapqan sarbazdar Aıbat Amanov pen Madııar Qaısarovty eske aldy. Budan keıin Gúlnaz Álkenqyzyna sóz berildi.
«Osyndaı is-sharany uıymdastyryp otyrǵan Ulttyq ulan basshylyǵyna, 5571 áskerı bólimniń basshylyq quramyna alǵys aıtamyn. Ulym qyzmet atqarǵan Taldyqorǵan qalasyna arnaıy barǵan edim. Almatydaǵy 5571 áskerı bólim – ulymdy osynda alǵash qarsy alǵan jer. Áskerdegi ár sarbaz ulymdaı bolyp ketken, árqaısysy maǵan qymbat. Sizderdiń kózderińizge qarap, dúnıeden ótken ulymdy kórgendeı bolamyn. Qaıǵyly oqıǵalar qaıtalanbasyn, ár sarbaz úıine aman-esen oralsyn. El aman, jurt tynysh bolsyn», dedi batyrdyń anasy.
Sondaı-aq saptaǵy qarýlas dosyna degen saǵynyshyn jetkizgen A.Amanovtyń qyzmettes dosy Erjan batyr uldyń eline degen adaldyǵy, dosqa janashyrlyǵy jaıynda syr shertti.
«Aıbat óte jaqsy jigit edi. Onymen bir rotada qyzmet etkenimdi maqtan tutamyn. Keıbir kezde qyzyǵy men shyjyǵy mol áskerı ómirden sharshaǵan sátte sózimen emdep, rýhymdy janyp otyratyn. Bir túsingenim, barlyǵymyz bir jaýyngerlik januıamyz, qıyndyq túskende bir-birimizden jaqyn adam bolmaıdy. Sondyqtan, jigitter, birlik kerek. Eshteńege alańdamaı qyzmetterińdi adal atqaryndar», dedi ol.
Is-shara sońynda Aıbat týraly derekti fılm kórsetilip, el men jer, halyqtyń amandyǵy jolynda qyzmet etip, Otan aldynda mindet alǵan ulandyqtardyń boıyndaǵy jiger otyn janyp ótkendeı boldy. О́z kezeginde sóz alǵan 5571 áskerı bólim komandıriniń orynbasary, podpolkovnık Ulyqbek Qaraev «Batyrdyń anasy – barsha Otanymyzdyń anasy. Biz áskerı bólim basshylyǵy atynan sizdiń aldyńyzda bas ıemiz, bizdiń áskerı bólimniń esigi sizder úshin árdaıym ashyq», dep aǵynan jaryla sóıledi.
Is-shara sońynda áskerı bólim basshylyǵy kelgen qonaqtarǵa estelik syılyqtar tabystap, alǵysyn bildirdi.
Jadyra MÚSILIM,
jýrnalıst
