Is-sharaǵa qatysqan Qarýly kúshter Qurlyq áskerleriniń bas qolbasshysy, general-maıor Mereke Kóshekbaev áskerdegi qaýipsizdikti arttyrýdyń jáne áskerı qyzmetshilerdiń ómiri men densaýlyǵyna qater tóndiretin jaıttarmen kúrestiń mańyzdylyǵy jaıynda áńgimeledi.
«Áskerı qyzmetshilerdiń qaza bolýynyń árbir jaǵdaıyn qylmystyq qýdalaý organdary muqııat tekseredi, sondaı-aq qaıǵyly jaǵdaıdyń sebepterin anyqtaý úshin sheshim qabyldanady. Árıne, biz mundaı jaǵdaıdyń aragidik bar ekenin bilemiz jáne máseleni sheshýdiń joldaryn izdeımiz. Biz qater tóndiretin jaıttardyń aldyn alý, barlyq áskerı qyzmetshi úshin qolaıly jaǵdaı jasaý úshin belsendi jumys istep jatyrmyz», dedi ol.
Qurlyq áskerleri – armııamyzdaǵy adam sany eń kóp jaýyngerlik quram. Olar áskerı tehnıkany paıdalaný, oqý-jattyǵýlarǵa qatysý, atys júrgizý jáne basqa da mindettemelerdi oryndaıtyndyqtan, qaýipsizdik máselesine erekshe nazar aýdarýdy talap etedi. M.Kóshekbaev ásirese merzimdi áskerı qyzmetshilerdi daıarlaýda tek sabaq oqytý emes, eń aldymen olardyń densaýlyǵy men ómirine qater tóndirer jaǵdaılardyń aldyn alýǵa erekshe kóńil bólinetinin jetkizdi. Sonymen qatar olardy áskerı-patrıottyq turǵyda tárbıeleý de – qolbasshylyq aldynda turǵan mindettiń biri.
«Jyl saıyn biz arqyly azamattyq qoǵamda suranysqa ıe jáne tapshy jumysshy mamandyqtary boıynsha daıyndyǵy joǵary myńdaǵan bala oqyp shyǵady. Olar – shynjyr tabandy jáne dóńgelekti tehnıkany paıdalaný jónindegi mamandar, gaz-elektrmen dánekerleýshiler, kranshylar, baılanysshylar, t.b.», dep atap ótti ol.
Brıfıng barysynda general-maıor jas sarbazdardyń áskerge alǵash kelgen ýaqyttaǵy jańa ómirge beıimdelýi men jaýynger retinde qalyptasý úrdisi týraly da áńgimeledi. Onyń aıtýynsha, áskerdegi qyzmet – Otan aldyndaǵy mindet qana emes, sonymen qatar árbir sarbaz úshin úlken áleýmettik synaq. Bul aýyr fızıkalyq jáne psıhoemosııalyq stresstermen baılanysty. Qyzmet barysynda áskerı qyzmetshiler qaraýyldarǵa, narıadtarǵa túsip, jaýyngerlik daıarlyq is-sharalaryna qatysady. Sol sebepti kóptegen áskerı qyzmetshi otbasy men qoǵamnan oqshaýlanýǵa baılanysty beıimdelý qıyndyqtaryna tap bolyp, bul olardyń moraldyq-psıhologııalyq jaǵdaıyna da áser etedi. Sondyqtan olardyń qyzmetke degen daıyndyǵy óte mańyzdy.
«Birinshi kúni olarmen jeke áńgimelesý ótkiziledi, neni qalaıtyny, qandaı qajettiligi bary tekseriledi, soǵan sáıkes sheshim qabyldanady. Psıhologter jumys isteıdi. Árqaısysyna tálimger bekitilip, «Jaýyngerlik dos» júıesi boıynsha áriptester aıqyndalady. Áskerı bólim oryndaıtyn mindetterdiń sıpaty men ereksheligi jaıynda aqparat berilip, qaýipsizdik sharalary túsindiriledi», dedi Qurlyq áskerleriniń bas qolbasshysy.
Aıta ketsek, merzimdi áskerı qyzmet barysynda «Jas jaýynger kýrsy» baǵdarlamasy boıynsha sarbazdy áskerı ǵylymdarǵa bastapqy daıarlaý sabaqtary ótkizilip, ár sarbazdyń moraldyq-psıhologııalyq jaı-kúıi men qyzmet ótkerýge daıyndyǵy zerdelenedi. Qyzmettiń qaýipsizdigin qamtamasyz etý maqsatynda jaýapty ofıserlerdiń táýlik boıy kezekshiligi uıymdastyrylyp, quqyq qorǵaý organdarynyń qatysýymen profılaktıkalyq dene tekserý júrgiziledi.
General-maıor M.Kóshekbaev áskerı polısııa jasaqtarymen, sarbaz analary komıtetimen jáne áskerı qyzmetshilerdiń otbasy múshelerimen ózara jumys júıesi uıymdastyrylǵanyn tilge tıek etti. Merzimdi áskerı qyzmetshilerge týystarymen baılanysta bolýǵa múmkindik beretin «Otbasymen beıneqońyraý» jobasy bar. Ár sarbaz aptasyna bir ret jaqyn adamdarymen beınebaılanysqa shyǵady, sonymen qatar kún saıyn telefon arqyly bos ýaqytynda úıine qońyraý shala alady.
Qurlyq áskerleriniń bas qolbasshysy ózine baǵynyshty qurylymdaǵy árbir jarǵydan tys qarym-qatynas oqıǵasyn Qorǵanys mınıstriligine baǵynbaıtyn qylmystyq qýdalaý organdary tekseretinin, armııada salamatty orta qalyptastyrý maqsatynda mundaı jaǵdaılardyń qaıtalanýyn boldyrmaýǵa baǵyttalǵan sharalar qabyldaıtynyn atap ótti.
