Memleket basshysynyń tapsyrmasymen 2023 jyldan beri bastaýysh synyp oqýshylaryna tegin ystyq tamaq beriledi. Sondaı-aq Oqý-aǵartý mınıstrliginiń Balalardyń quqyqtaryn qorǵaý komıteti tamaqtaný sapasyn arttyrý maqsatynda byltyr tamaqtaný normalaryn qaıta qarap, ashana qyzmetkerlerine qoıylatyn talapty kúsheıtti. Jetkizýshilerge SES qorytyndysyn alý mindetteldi. Tegin tamaq alýshylardyń esebi avtomattandyryldy. Mektepterde tamaqtaný sapasyn kúndelikti baqylaýǵa brakerajdyq komıssııalardyń jumysy mindetteldi. Buǵan qosa, barlyq óńirde ata-analar, qoǵamdyq uıym ókilderi jáne máslıhat depýtattarynyń qatysýymen vedomstvoaralyq saraptamalyq komıssııalar arqyly qoǵamdyq baqylaý uıymdastyryldy.
Jalpy, tamaqtanýdy júıeli túrde uıymdastyrý sapasyn memlekettik baqylaýdy Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń aýmaqtyq bólimsheleri qamtamasyz etedi. Qazir bilim uıymdaryndaǵy tamaqtaný standartynyń jobasyn ázirleý jáne bekitý boıynsha jumystar júrgizilip otyr.
Jıyn barysynda Oqý-aǵartý mınıstri Ǵanı Beısembaev ýákiletti memlekettik organdarǵa brakerajdyq jáne vedomstvoaralyq komıssııalardyń quramyn jańartyp, olarǵa óńirlik kásipkerler palatalarynyń ókilderin engizýdi, komıssııalardyń jumys algorıtmin jańartý, sondaı-aq barlyq úderiske qatysýshylardyń monıtorıng jumystary men baqylaýyn kúsheıtý tapsyrdy. Talaptar júıeli túrde buzylsa, jergilikti bılik organdaryna qyzmet kórsetýshilermen kelisimsharttardy birjaqty tártippen buzý quqyǵy beriledi.
Búgingi tańda elimizde 1,7 mıllıonnan astam oqýshy tegin ystyq tamaqpen qamtylǵan. Bul maqsatqa jergilikti bıýdjetterden 192 mıllıard teńgeden astam qarajat bólingen.
Aıta keteıik, ótken jyl sońynda Prezıdent Bilim jáne bala quqyqtaryn qorǵaý máseleleri jónindegi zańǵa qol qoıdy. Osyǵan oraı endi jekemenshik mektepterdiń 1-4 synyp oqýshylaryna da tegin ystyq tamaq beriledi. Jańa bastama 25 myńnan astam balany qamtıdy. Oǵan memleket qosymsha 12 mıllıard teńge bóldi.
Qaısar Qusaıyn
