Foto: Aqorda
Prezıdenttiń aıtýynsha, byltyr óńdeý ónerkásibi salasynda 180 ınvestısııalyq joba júzege asyrylǵan. Jobalardyń jalpy quny – 1,3 trıllıon teńge quraǵan. Nátıjesinde osy saladaǵy ósim 6 paıyzǵa jýyqtap, sońǵy on jyldaǵy eń joǵary kórsetkishti kórsetken. Bul rette, Qasym-Jomart Toqaev osy jaqsy úrdisti birjola ornyqtyryp, saqtap qalý kerektigin basa aıtty.
«Taǵy bir asa mańyzdy másele – ekonomıkaǵa ınvestısııa tartý. BUU málimetterine sáıkes, Qazaqstan bul kórsetkish boıynsha aıtarlyqtaı tabysqa qol jetkizgen. Degenmen toqmeıilsýge negiz joq. Investorlardyń máselesin shuǵyl sheshý úshin Investısııa shtaby quryldy. Sonyń arqasynda bıýrokratııalyq kedergiler men quqyqtyq qarama-qaıshylyqtar joıylyp, keıbir jobalardy tezirek júzege asyrýǵa jol ashyldy. Alaıda basty maqsat – «jekelegen» problemalardy ǵana sheshpeı, eldegi tutas ınvestısııalyq ahýaldy jaqsartý», dedi Memleket basshysy.
Sondaı-aq, Prezıdent ınvestısııalyq jobalardy ázirleý barysynda vedomstvoaralyq úılestirýge áli de kóp ýaqyt ketetiniń tilge tıek etti.
«Úkimet basy artyq bıýrokratııadan arylyp, jedel jumys isteýi kerek. Memlekettik qyzmetshilerdiń qulyqsyzdyǵy jáne jaýapkershilik alýdan taısalýy kelisý rásimderi men sheshim qabyldaýdyń tym uzaqqa sozylýyna sebep bolyp otyr. Muny ashyq aıtqan abzal», dedi Qasym-Jomart Toqaev.
