Foto: Ashyq derekkóz
Nurtóre Júsip Memleket basshysynyń tóraǵalyǵymen ótken Úkimettiń keńeıtilgen otyrysyn jyldyń basyndaǵy asa qajet jıyn dep atady.
«Eldegi ekonomıkalyq jaǵdaı sarapqa salyndy. Memleket basshysy túıindi sózinde Úkimettiń jáne basqa da quzyrly organdardyń jaqyn aradaǵy negizgi mindetterine toqtaldy. Bizdiń Úkimetke jetpeı jatqan bir is bolsa - osy. Ár jer, ár óńirde nátıjeli jumys bar. Biraq máselege tutas qaraý, ortaq sheshimder qabyldaý, mınıstrlikter jumysyn birlese otyryp úılestirý jaǵy jetispeıdi.Muny Memleket basshysy qadap turyp aıtty», dedi Senat depýtaty.
Senatordyń pikirinshe, syrttaı qarasańyz Úkimet jappaı jumylyp jumys istep jatqan sııaqty. Apta saıyn Úkimet otyrysy ótedi. Premer-mınıstr tapsyrma beredi. Shapqylap júrgen bir adam. Al nátıje qandaı? Berilgen tapsyrma oryndaldy ma? Oryndalmasa nege oryndalmady? Suraý joq sekildi.
«Tapsyrmalar bar. Tııanaqty oryndaý jaǵy az. Suraý, baqylaýǵa alý, óz mindetterin durys atqarmaǵandardy jaýapqa tartý jaǵy baıqalmaıdy. Osy qalyppen kete bersek, bári jáı ásheıin sóz túrinde qalady. Sondyqtan «belbeýdi býýǵa bel kerek»! Jedel sheshim qabyldaýǵa Er kerek! Jaýapkershilikti óz moınyna ala bilý degen talap ornyqsa deımiz. Osy ýaqytqa deıin ekonomıkany damytý úshin «klaster kerek» dedik. Odan keıin «ınnovasııa kerek» dedik. Sosyn «ındýstrıalızasııa kerek» dedik. Qansha mıllıard qarjy ketti sonyń bárine!Jaýap bergen bireý bar ma?», dep jazdy Nurtóre Júsip.
Úkimettiń keńeıtilgen otyrysynda Prezıdent memlekettik qyzmetshilerdiń qulyqsyzdyǵy jáne jaýapkershilik alýdan taısalýy kelisý rásimderi men sheshim qabyldaýdyń tym uzaqqa sozylýyna sebep bolyp otyrǵandyǵyn ashyq aıtty.
Bul rette senator qulyqsyzdyqtan qalaı qutylamyz? Jaýapsyzdyqty qalaı retteımiz? Derbes sheshim qabyldaýǵa qashan kóshemiz? Úkimettiń taǵdyry eń aldymen osy saýaldarǵa jaýap tabýyna tikeleı baılanysty bolady-aý dep túıindedi.
