Memleket tarıhy ınstıtýtynyń jetekshi ǵylymı qyzmetkeri, saıası ǵylymdarynyń kandıdaty Baýyrjan Sherııazdanov Prezıdenttiń búgingi jıynda el kókeıindegi saýaldarǵa jaýap bergenin, Qazaqstan álemdegi tarıftik tartystar men sanksııalyq teketirester kezinde ekonomıkalyq-áleýmettik damý jolynan tanbaý úshin, ár salany jańashyldyqqa beıimdep, tıimdi baǵdar ustanýy qajet ekenin atap ótti.
«Prezıdent búgingi otyrysta qoǵam, halyq arasynda kóterilip júrgen kóp suraqtarǵa jaýap bere otyra elimizdegi saıası, áleýmettik, ekonomıkalyq, qarjylyq, salyqtyq jaǵdaıdy tolyq qadaǵalap otyrǵanyn baıqatty. Bul qarapaıym halyqqa erteńgi kúnge senimmen qaraýǵa múmkindik uıalatady», dedi Baýyrjan Sherııazdanov.
Saıası sarapshy Prezıdent bastamalary jekeleı salalarǵa da serpin beretinine nazar aýdardy.
«Turmysty túzeýge yqpaldy agroónerkásip kesheniniń áleýetin arttyrý qajettigin Memleket basshysy taǵy da qaıtalap aıtty.
Birinshi. Sharýalardy qoldaý tetikterin qaıta qaraý. Prezıdent nesıe berý rásimderin jeńildetýdiń mańyzdylyǵyna toqtaldy. Bul tásilderdiń qajettiliginiń mysaly retinde eginniń rekordtyq kólemine qaramastan baǵanyń tómendegenin atap ótti.
Ekinshi. Aýyl sharýashylyǵy ónimderiniń eksportyna qoldaý kórsete otyryp, rentabeldi daqyldardy ósirý baǵytyn jalǵastyrý. Osy oraıda, et ónimderin eksporttaý áleýetin damytýdyń mańyzdy elementteriniń biri retinde maldy vaksınasııalaýdyń jáne olardyń arasyndaǵy indetke qarsy turýdyń mańyzdylyǵyn atap ótti. Qajetti ınfraqurylymdy, onyń ústine aýyldaǵy turmys jaǵdaıyn damytpaı turyp, agroónerkásip keshenin damytý múmkin emes. Aýyldarda turmys deńgeıin arttyrý boıynsha negizgi mindetterdiń qatarynda ınfraqurylymdy damytý jáne shaǵyn jáne orta bıznes pen bıznes bastamalardy qoldaý bolyp tabylady», dedi Baýyrjan Sherııazdanov.
Osy jyldy el basshysy «Jumysshy mamandyqtary jyly» dep jarııalaǵany belgili. Úkimettiń keńeıtilgen otyrysynda Prezıdent ataýly jyl aıasynda kásipterdiń bedelin arttyrýǵa baǵyttalǵan birqatar sharalar qabyldaıtynyn tilge tıek etti. Baýyrjan Sherııazdanov bul bastama kadrlardyń kásibı biliktiligin shyńdap, turmysyn túzeýge ashylǵan dańǵyl jol ekenine de toqtaldy.
«Jumysshy mamandyqtary jyly» aıasynda jumysshy kásipterdiń bedelin arttyrýǵa baǵyttalǵan birqatar sharalar qabyldanatyn bolady. Atap aıtqanda, kásiptik jáne tehnıkalyq bilim berý júıesin tolyq qaıta qaraý josparlanyp otyr. Bıznesti osy jumysqa keńinen tartý úshin barlyq TjKB uıymdary úshin memlekettik tapsyrys mólsheri ulǵaıtylady jáne teńestiriledi. О́z kezeginde ákimder kásipkerlermen birlesip óńirler úshin basym mamandyqtardy aıqyndap, kolledjderdi suranysqa ıe kadrlardy daıarlaýǵa baǵdarlaý múmkindigin ıelenedi.
Memleket basshysy memlekettik apparat jumysynyń tıimdiligin arttyrý mindetin qoıdy. Atap aıtqanda, jergilikti atqarýshy organdar jelisi boıynsha «Ákimder mektebi» aýqymdy bilim berý jobasyn iske qosý tapsyryldy (saılanǵan ákimder, ásirese buryn memlekettik qyzmette jumys istemegender úshin). Sondaı-aq, «Halyq únine qulaq asatyn memleket» tujyrymdamasyn iske asyrý sharalary retinde memlekettik apparattyń azamattardyń ótinishterimen jumys jasaýyna nazar aýdaryldy. Bul rette, tek tyńdap qana qoımaı, kóterilgen máselelerdi sheshý úshin júıeli jumys júrgizý mańyzdy», dedi Memleket tarıhy ınstıtýtynyń jetekshi ǵylymı qyzmetkeri.
