Erkebulan Rýslanbekulynyń aıtýynsha, Prezıdenttiń sóılegen sózi –aǵymdaǵy ekonomıkalyq-áleýmettik máselelerge ǵana qatysty emes, buny – memleket, bıznes jáne qoǵam arasyndaǵy «jańa qoǵamdyq kelisim-shartty qalyptastyrý baǵytyndaǵy mańyzdy bir qadam», dep baǵamdaýǵa bolady.
«Prezıdent óz sózinde jaqyn merzimdegi basymdyqtar men áleýmettik máselelerge kóp kóńil bóldi. Onyń ishinde qarjylyq turaqtylyqty qamtamasyz etý, ınfraqurylymdy damytý, bilim máselesi jan-jaqty aıtyldy. Osy tusta «jańa qoǵamdyq kelisim-shart» degen maǵyna turǵysynda aıta ketsem, qazirgi tańda memlekettiń barlyq kiris-shyǵysyna deıin ádilettilikti qamtamasyz etý, ınvestısııalyq tartymdylyqty kúsheıtý boıynsha birneshe basymdyqtar men bastamalarǵa kýá boldyq. Mysaly, byltyrǵy referendým turǵysynda salynýǵa tıisti bir atom elektr stansııasynan keıin aldaǵy ýaqytta ekinshi jáne úshinshi AES salynatyny jáne sol arqyly eldiń energetıkalyq qaýipsizdigi men memleket pen ult múddesine tıesili basymdyqtarǵa kóńil bólinip otyrǵanyn kórdik. Osy bastamalardyń ar jaǵynda Slans munaı ken oryndarynyń ıgerilýi sekildi josparlar Úkimet tarapynan atalyp, strategııalyq sheshimderdiń qabyldanýyna basymdyq qosyldy», dedi Erkebulan Amanǵosov.
Sondaı-aq, onyń pikirinshe tehnıkalyq-kásiptik bilim berý júıesin reformalaý mańyzdy, óıtkeni bul – jańa salalar boıynsha bilikti kadrlardy daıarlaýǵa degen qajettilikten týyndap otyr. Sonymen qosa Memleket basshysynyń bastamasymen «Jaıly mektep» ulttyq jobasy sheńberinde jańa mektepterdiń kóptep salynýy – úsh aýysymdy mektepterdi azaıtýǵa baǵyttalǵan úlken strategııalyq is-shara.
«Bunyń barlyǵy – mol qarjyny talap etedi. Sondyqtan sol bastamalardyń sheńberinde «jańa qoǵamdyq kelisim-sharttyń» jatqandyǵyn baıqaımyz, árıne, bul belgili bir deńgeıde bıýdjettik shyǵyndardyń ashyq bolýyn talap etedi jáne bıznes tarapynyń memleket pen qoǵam aldyndaǵy jaýapkershiligin arttyrýdy kózdeıdi», dep túıindedi áleýmettanýshy Erkebulan Amanǵosov.
