Sarapshy Úkimettiń keńeıtilgen otyrysynda Prezıdent Qasym-Jomart Toqaev maqtaýdan góri syndy kóbirek aıtqanyn atap ótti.
«Úkimettiń 2024 jyly atqarǵan jumysyna kóńili tolmaıtyndaı áser qaldyrdy. Úkimetke jumysty jetildirýge baılanysty biraz naqty tapsyrmalar berildi. Ol ásirese ekonomıkanyń damý qarqyny, ınflıasııanyń joǵary deńgeıi jáne halyqtyń tabysynyń ósýine qatysty naqty máselelerdi kóterdi. Árıne bul máseleler ózektiligin joımaıdy, elimizdiń damýy úshin, halyqtyń jaǵdaıyn jaqsartýǵa baǵyttalǵan sharalardy iske asyrýda nátıje beretin naqty mehanızmder kerek. Qazirgi jahandyq jáne ishki jaǵdaıǵa baılanysty reformalardy jedeldetý qajet», deıdi ol.
Jaqsybek Jıenalıevtiń aıtýynsha, qazirgi tańda halyqtyń ómir súrý deńgeıin kóterý, jumys oryndaryn ashý, aýyl sharýashylyǵyn qoldaý, otandyq óndiristi damytý basty mindetterdiń biri.
«Prezıdenttiń synı eskertýleri Úkimettiń naqty nátıjege jumys isteýin talap etedi. Eger bul tapsyrmalar ýaqtyly ári sapaly oryndalsa, eldegi turaqtylyq pen damý aıtarlyqtaı jaqsarady dep oılaımyn. Sondaı-aq, kadr máselesin qozǵady, sheneýnikterge bos málimetter men kózboıaýshylyq esepterden aýlaq bolý kerektigin eskertti. Shynymen de, memlekettik basqarýda shynaıylyq pen jaýapkershilik qajet, óz betinshe sheshim qabyldaýdan qoryqpaıtyn, salaǵa jańashyldyq ákeletin krızıs menedjerlerdi laýazymdy qyzmetterge taǵaıyndaý óte ózekti», deıdi sarapshy.
Sondaı-aq ol Úkimettiń 2024 jylǵy jumysyna ortasha baǵa berýge bolatynyn aıtyp ótti.
«Qabyldanǵan sheshimder keıbir salalarda oń ózgeristerge yqpal etse de, halyqtyń ál-aýqatyn jaqsartý úshin júıeli ári batyl reformalar jetkiliksiz boldy. Inflıasııa joǵary deńgeıde qaldy, baǵanyń ósýi halyqtyń turmys sapasyna áser etti. Shaǵyn jáne orta bıznesti damytýda ákimshilik kedergiler áli de bar. Sybaılas jemqorlyqqa qarsy kúres tolyq nátıje berip jatyr dep aıtý qıyn», deıdi J.Jıenalıev.
Onyń aıtýynsha, jetistikteriniń biri retinde aýyl sharýashylyǵynyń bıylǵy rekordtyq ónim alý kórsetkishterin atap ótýge bolady.
