Foto: polisia.kz
Bıyl ishki ister organdary «Profılaktıka jyly: polısııa Zań men Tártip kúzetinde» qaǵıdaty aıasynda jumys atqarady.
Úkimettiń keńeıtilgen otyrysynda aıtylǵan «Zań men tártip» qaǵıdaty IIM belgilegen jumys baǵytymen qabysyp jatyr.
IIM-de ótken keńes barysynda belgilengen júıe negizinde eldegi qaýipsizdikti qamtamasyz etýge qatysty negizgi máseleler talqylandy.
Ishki ister mınıstri Erjan Sadenov qylmystyń aldyn alý jónindegi sharalardy iske asyrý, onyń ishinde jeke profılaktıkalyq is-sharalardy kúsheıtý, qylmys jasaýǵa beıim adamdardy erte kezeńde júıeli túrde anyqtaý boıynsha mindetter júktedi. Jurtshylyqty zań buzýshylyqtyń aldyn alý salasyna belsendi tartý qajet ekenin alǵa tartty.
Vedomstvo basshysy múddeli organdarmen birlesip mektepterde, kolledjderde jáne joǵary oqý oryndarynda oqıtyn jastardyń boıynda patrıotızm, jaýapkershilik jáne minez-qulyq mádenıetin qalyptastyrý boıynsha aqparattyq-nasıhattaý jumysyn uıymdastyrýdy tapsyrdy.
«Úkimet otyrysynda ınfraqurylymdyq damý, sıfrlyq tehnologııalardy engizý jáne energetıka salasynyń ilgerileýi de negizgi baǵyt retinde atap ótildi. Sondyqtan júk tasymalynyń qaýipsizdigin qamtamasyz etýdi, munaı ónimderin urlaýdyń jáne olardy shetelge zańsyz áketýdiń qylmystyq shemalaryn anyqtaý boıynsha jumysty jandandyrýdy tapsyramyn», dedi mınıstr.
Sondaı-aq Erjan Sadenov qyzmet basshylary men óńirlik bólinister jetekshileriniń aldyna ınternet-alaıaqtyqqa qarsy is-qımyl, sıfrlyq jobalardy damytý, tıisti kóshi-qondy baqylaýdy mindetti túrde qamtamasyz ete otyryp, sheteldik jumys kúshin tartýǵa baılanysty rásimderdi jaqsartý, azamattardyń ótinishterimen jumys tıimdiligin arttyrý boıynsha birqatar naqty mindetter qoıdy.
