Eske salaıyq, Memleket basshysy sóılegen sózinde Úkimetke aǵymdaǵy jyldyń maýsym aıynyń sońyna deıin árbir perspektıvaly orta kásiporynmen jumys josparyn ázirlep, aıaqtaýdy tapsyrǵany málim.
Qosman Zekeshulynyń pikirinshe Qazaqstan ekonomıkasynyń damýy orta kásipkerlik kóleminiń artýyna tikeleı baılanysty, al, búginde bizde orta kásipkerliktiń ishki ónimdegi úlesi – 7%, eksportta – 7%, jumyspen qamtýda – 4% quraıdy.
«Salystyrý úshin aıtaıyn «Ekonomıkalyq yntymaqtastyq jáne damý uıymyna» múshe elderde orta bıznestiń jalpy ishki ónimdegi úlesi 20-30%-ǵa, eksporttaǵy úlesi 30%-ǵa, al jumyspen qamtýdaǵy úlesi 15%-dan astam deńgeıge jetedi», dedi Q.Qajkenov.
Sarapshynyń pikirinshe shaǵyn kásiporyndarmen salystyrǵanda orta kásiporyndardyń ekonomıkalyq tıimdiligi aıtarlyqtaı joǵary.
«Mysalǵa aıtar bolsam orta kásiporyndardyń ónimdiligi shaǵyn kásiporyndarmen salystyrǵanda 30 ese joǵary, ortasha mólsherde salynǵan árbir teńge shaǵyn kásiporyndarǵa qaraǵanda 2 ese kóp jalpy qosylǵan qun qalyptastyrady, orta bıznestegi jalaqy shaǵyn kásipkerlikke qaraǵanda 1,5 ese joǵary, al salyq túsimderine qosqan úlesi shaǵyn bızneske qaraǵanda 3%-ǵa artyq. Degenmen, olardyń sany az», dedi ol.
Onyń sózinshe Qazaqstanda orta kásiporyndardy damytýǵa neǵurlym mán berý kerek.
«Perspektıvaly orta kásiporyndardy damytý mańyzdy, óıtkeni olar ıkemdi, qarjylyq aýytqýlarǵa tózimdi, eksportqa baǵyttalǵan ónim óndirýge qabiletti, sondaı-aq sapaly jumys oryndaryn qurýǵa múmkindik beredi», dep túıindedi Qoǵamdyq saıasat ınstıtýtynyń bas sarapshysy Qosman Qajkenov.
