Shahar basshysy óz sózinde Vasılıı Vasılevıch sııaqty tulǵalar elimizdiń maqtanyshy ekenin, olardyń arqasynda búgingi beıbit ómirge qol jetkizgenimizdi atap ótti. Ardagerge estelik syılyqtar tabystap, soǵys kezindegi jáne eldi soǵystan keıingi damytýdaǵy eren eńbegi úshin alǵys aıtty.
Ulttyq ulan akademııasynyń tárbıe jáne áleýmettik-quqyqtyq jumys jónindegi orynbasary, polkovnık Erden Balǵymbaev ta soǵys ardagerine óziniń jyly lebizin bildirip, syılyǵyn tartý etti. Ardagerdiń ónegeli ómiri úshin shynaıy rızashylyǵyn bildirip, onyń erligi urpaqtyń otanshyl bolyp ósýine yqpal etetinin atap ótti.
Vasılıı Makıenko 1926 jyly 24 qańtarda Soltústik Qazaqstan oblysy Voloshınka aýylynda dúnıege kelgen. 1943 jyly Qazan aýdanynyń áskerı komıssarıaty arqyly maıdanǵa shaqyrylyp, áskerı jolynda 44-atqyshtar polkinde, 142-atqyshtar polkinde jáne 317-gvardııalyq atqyshtar polkinde qyzmet etedi. Soǵys kezinde II dárejeli «Otan soǵysy» ordenimen, sondaı-aq «Kenıgsbergti alǵany úshin», «Germanııany jeńgeni úshin» medaldarymen marapattaldy.
Soǵystan keıin Vasılıı Vasılevıch beıbit ómirdegi eńbek jolyn bastady. Ol sý qubyry júıesinde jumys istep, keıin tehnıkalyq jabdyqtaý óndirisin basqarý basqarmasy basshysynyń orynbasary bolyp 13 jyl qyzmet atqardy. 1960 jyly zeınetke shyqty.
Búginde ǵasyrǵa taqaǵan jasyna qaramastan, ardager áli de tyń. Týǵan-týystarynyń ortasynda, tórt qyzdan segiz jıen, alty shóbere súıgen baqytty ata. Onyń el úshin etken eńbegin tek Petropavl jurtshylyǵy ǵana emes, búkil Qazaq eli moıyndap, maqtan tutady.
