Foto: ashyq derekkóz
Atap aıtsaq, «Esik kóli bógeti», «Saz Talǵar 7», «Baıserke 2», «Voroshılovskoe», «K 3» sot sheshimimen memleketke qaıtarylsa, «Teren Qara» (joǵarǵy), «Saz Talǵar 4», «K30/1» kelisim negizinde qaıtarylǵan. Qazir bul nysandar oblys ákimdigine qarasty «Almaty oblvodhoz» memlekettik kásipornynyń basqarýyna berildi. Atalǵan nysandardyń barlyǵy Talǵar, Ile jáne Qarasaı aýdandarynda ornalasqan.
Nysandar memlekettik menshikke ótkennen keıin, bılik olardy ýaqtyly jańǵyrtyp, jóndeý jumystaryn júrgize alady. Olardyń qatarynda dambalardy nyǵaıtý jáne sý jiberý shlıýzderin jóndeý, sý qoımalarynyń jaǵdaıyn, ásirese sý tasqyny kezeńinde baqylaýdy kúsheıtý, nysandardy turaqty monıtorıngten ótkizý sharalary josparlanýda. Sonymen qatar, sý qoımalaryn ári qaraı paıdalaný úshin jeke ınvestorlardy tartý kózdelgen.
Mysaly, «Esik kóli bógeti» men «Teren Qara» nysandaryna 23 mlrd teńgeden astam ınvestısııa tartý týraly kelisim jasaldy, ol 210 jańa jumys oryn ashýǵa múmkindik beredi. Bul sharalar óńirdiń aýyl sharýashylyǵyn jáne turǵyndaryn turaqty sýmen qamtamasyz etip qana qoımaı, týrıstik ınfraqurylymnyń damýyna jaǵdaı jasaıdy. Bul óz kezeginde oblys ekonomıkasyna oń áserin tıgizedi.
Sondaı-aq, týrızm men balyq sharýashylyǵyn damytý josparlanyp otyr, bul aımaqtyq bıýdjetke túsetin qarjylyq júktemeni azaıtýǵa kómektesedi. Osy turǵyda jeke ınvestısııalardy tartýdyń, jańa jumys oryndaryn ashýdyń jáne shaǵyn bıznesti damytýdyń mańyzy arta túsedi.
«Bizdiń basty maqsatymyz – sý resýrstaryn tıimdi paıdalaný. Nysandardy memlekettik basqarýǵa qaıtarý olardyń ýaqytyly jóndelýine jáne durys paıdalanylýyna múmkindik beredi. Al ınvestısııa tartý – óńirdiń damýyna, jumys oryndarynyń kóbeıýine jáne bıýdjet kirisiniń artýyna yqpal etedi», dep atap ótti Almaty oblysy qarjy basqarmasynyń basshysy Bıbigúl Uzaqova.
