Elıtalyq týrnırdiń júldegerleri men qatysýshylaryn elorda áýejaıynda jaqyndary, áriptesteri, sondaı-aq kúshtik qurylymdardyń basshylyǵy saltanatpen qarsy aldy.
«Jaýyngerlerimizdiń jetistigi - bul jeke jeńisteri ǵana emes, búkil Qazaqstannyń jeńisi. Bul elimizdiń kúshtik qurylymdarynyń qaýipsizdikti qamtamasyz etý boıynsha mindetterin tıimdi oryndaýǵa árdaıym daıyn ekendikterin kórsetedi. Sizder barshaǵa óz kúshterińizdi, tózimdilik pen kásibılikterińizdi kórsetip, álemdik deńgeıde arnaıy bólinisterdiń elıtasy arasynda elimizdiń pozısııasyn nyǵaıttyńyzdar», - dedi Ishki ister mınıstri Erjan Sadenov.
Álemniń úzdik jaýyngerleri shynaıy operasııalar negizinde jasalǵan bes kúrdeli kezeńnen ótti. Ártúrli taktıkalyq ssenarııler boıynsha ázirlengen synaqtar álemdik standarttarǵa saı jabdyqtalǵan Dýbaı polısııasynyń oqý ortalyǵynyń bazasynda júrgizildi. Bul taktıkalyq operasııalar, shabýyldaý, adamdardy qutqarý, bıik nysandardy eńserý jáne kedergilerden ótý.
Tartysty týrnırde qazaqstandyq komandalar jedeldik, uıymshyldyq, dáldik jáne biliktilikterin kórsetti. IIM «Suńqar» komandasy úsh kezeńde júldeli orynǵa ıe boldy - olardyń ekeýi «altyn». Jalpy kórsetkish boıynsha «Suńqar» saıypqyrandary jarystyń kúmis júldegeri atandy.
Basqa da komandalar qazaqstandyq jankúıerlerdi joǵary nátıjelerimen qýantty. Ekinshi kezeńde Memlekettik kúzet qyzmetiniń «Sardar A» komandasy «altyn» alsa, QR UQK-nyń «Arystan Team» komandasy eki kezeńde úzdik úshtikten kórindi.
QR IIM-niń «Tomiris» áıelder komandasy erekshe kózge tústi. Qazaqstan atynan názik jandylardyń quramasy mundaı jarysqa alǵash ret qatysýda. Básekelestiktiń joǵarylyǵyna qaramastan olar áıelder komandalary arasynda 2-shi orynǵa ıe boldy.
Arnaıy bólinister arasyndaǵy bul týrnır bıyl altynshy ret ótkizildi. Ár jyl saıyn qatysýshylar sany da artyp keledi. Atalmysh saıysqa alǵash ret 2019 jyly IIM Ulttyq ulanynyń komandasy qatysqan. 2023 jyldan bastap bul qatarǵa elimizdiń basqa da arnaıy bólinisteri belsendi túrde qosyla bastady.
О́tken jyly qazaqstandyq arnaıy bólinisterdiń arasynda QR Memlekettik kúzet qyzmetiniń «Sardar» komandasy elimizge tarıhı jeńis – júldeli úshinshi oryndy syılady. Olar tek Dýbaı polısııasynyń eki komandasyna ese jibergen bolatyn.
Týrnır zamanaýı tásilder boıynsha tájirıbe almasýǵa, arnaıy jasaqtyń daıyndyq deńgeıi men halyqaralyq yntymaqtastyqty arttyrýǵa septigin tıgizip, jalpy jahandyq qaýipsizdikti nyǵaıtýǵa oń áser etedi.
