Meırambekpen qazirgi Ál-Farabı atyndaǵy Qazaq ulttyq ýnıversıtetiniń Jýrnalıstıka fakýltetinde birge bilim aldyq. Jaqsy oqyp qana qoımaı, jarasymdy ázil-qaljyńy taýsylmaı, kýrstastardy kúlkige keneltip júretin aqjarqyn minezimen erekshelendi. Stýdenttik toı-tomalaǵymyzda asabalyq etip, ortamyzdyń kórki boldy. Sol kezden-aq týma daryny, bıik parasaty, jyly da shynshyl sózimen jurtty aýzyna qaratyp, janyna tarta biletin uıymdastyrýshylyq qabileti ańǵarylyp, kelesheginen úlken úmit kúttiretin.
Meırambektiń ómir joly taqtaıdaı túzý hám jeńil bolǵan joq. Orta mektepti támamdaǵan soń aýylda bir jarym jyldan astam qurylysshy bolyp eńbek etti. Sebebi keńes zamanynda respýblıkamyzdaǵy jalǵyz jýrnalıstıka fakýltetiniń kúndizgi bólimine oqýǵa birden túsý on shaqty talapkerdiń bireýine ǵana buıyratyn baqyt edi. Sondyqtan Meırambektiń áýeli daıarlyq bólimine túsýine týra keldi. Al keıingi jýrnalıstik qyzmetinde shyndyqty aıtamyn dep, mańdaıy tasqa soǵylǵan sáti de boldy... Biraq, «almas qylysh qyn túbinde jatpaı», jarq etip, kýrstastarymyzdyń ishinde eń joǵary laýazymdy qyzmetterge taǵaıyndaldy. Jambyl oblysy ákiminiń áleýmettik máseleler jónindegi orynbasary bolyp, týǵan óńiriniń órkendeýine aıanbaı atsalysty. «Jambyl» telearnasynyń dırektory kezinde talaı bulaqtyń kózin ashqandaı is tyndyrdy – daryndy jastardy jumysqa alyp, olarǵa tálimger boldy. Oblys kásipodaqtary aýmaqtyq birlestiginiń tóraǵasy retinde qarapaıym eńbekkerlerdiń quqyqtaryn qorǵaýǵa janyn saldy. Altynshy shaqyrylymdaǵy Jambyl oblystyq máslıhatynyń jáne jetinshi shaqyrylymdaǵy Parlament Májilisiniń depýtaty bolyp saılanyp, el men jer, til men dil taǵdyryna qatysty kókeıkesti máselelerdi kóterdi. Onyń «Jambyl oblysynyń qurmetti azamaty» atanǵandyǵy – týǵan óńirine sińirgen eleýli eńbegine jerlesteri tarapynan berilgen ádil de laıyqty baǵa.
Meırambek Tólepbergen – elimizdiń tańdaýly jýrnalısteri shoǵyrynan óz ornyn alǵan, esimi qazaq jýrnalıstıkasynyń tarıhyna engen qalamger. Shyǵarmashylyq jumysyn sport taqyrybynan bastap, Ortalyq Azııa jáne Qazaqstan sport jýrnalısteriniń Halyqaralyq baıqaýynyń bas júldesine ıe boldy. «Halyq keńesi» jáne «Egemen Qazaqstan» respýblıkalyq gazetterinde jaýapty qyzmetter atqaryp, saıası-áleýmettik máselelerge arnalǵan pýblısıstıkalyq maqalalarymen keńinen tanyldy. «Eren eńbegi úshin» medalimen marapattalyp, «Qazaqstannyń eńbek sińirgen qaıratkeri», Prezıdent grantynyń ıegeri, Jýrnalıster odaǵy syılyǵynyń laýreaty atandy.
Meırambek halqymyzdyń súıikti uly, jaqsy aǵalarǵa jaqsy ini, keıingi tolqynǵa janashyr aǵa, senimdi dos, asyl jar, ardaqty áke bola bilgen birtýar azamat edi. Júzinen nur tógilgen jarqyn beınesi jadymyzdan óshpeıdi.
Káribaı MUSYRMAN
