«Seıitjan qarı Esjanuly» meshitinde ótken konferensııada Senat depýtaty Nurtóre Júsip, memleket jáne qoǵam qaıratkeri Shalataı Myrzahmetov, Mádenıet jáne aqparat mınıstrligi Din isteri komıteti tóraǵasynyń orynbasary Ádilbek Kákimuly, QMDB tóraǵasy, Bas múftı Naýryzbaı qajy Taǵanuly, dintanýshy-ǵalym Alaý Ádilbaev, aqyn, ádebıetshi Abaı Qalshabek jáne ózge de qoǵam belsendileri súbeli sóz sóılep, taqyryp aıasynda usynys-pikirlerin bildirdi.
«Elimizdegi otbasylyq qundylyqtar halyqtyń mádenı jáne áleýmettik ereksheliginiń mańyzdy bóligi ekeni aqıqat. О́rkendegen qoǵamnyń negizi – úlkenge qurmet, bolashaq urpaqqa qamqorlyq jáne otbasylyq qatynastaǵy úılesim. Otbasy dástúrin saqtaý, olardy jańa jaǵdaıǵa beıimdeý úshin qazirgi zaman qıyndyǵy men qubylǵan kezeńdegi ahýaldy eskerý mańyzdy. Bizdiń elimizdegi otbasy – ol halyqtyń tarıhy men dástúrimen tyǵyz baılanysta bola otyryp, damýdy jalǵastyratyn áleýmettik qurylymnyń mańyzdy bóligi. Otbasy qundylyqtarynda ıslam áseriniń tamyry tereń jáne ǵasyrlar boıy qoǵamdyq qatynastarda ózindik orny bar. Qazaqtyń neke men bala tárbıesi jáne úlkenge qurmetke qatysty kóptegen dástúrli ádet-ǵurpy ıslam ilimimen tyǵyz baılanysty. Sondyqtan ıslam qaǵıdalary men kóshpeli ómir saltyndaǵy osy qundylyqtar úılesim taba otyryp, qazaq mádenıetiniń ereksheligine beıimdeldi», dedi Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip.
QMDB tóraǵasy Naýryzbaı qajy Taǵanuly otbasy ózektiligin eshqashan joǵaltpaıtyn, zamana turǵansha ómirsheńdigin joımaıtyn mańyzdy uǵym ekenin atap ótti.
«Aldymen otbasynyń Alla bergen baǵa jetpes nyǵmet ekenin esten shyǵarmaǵan jón. «Sender úshin ózderińnen jubaılar jaratyp, aralaryńa súıispenshilik pen meıirimdilik salǵany – Onyń belgileriniń biri» dep qasıetti Quran Kárimniń «Rým» súresinde baıandalǵandaı, er men áıeldiń neke odaǵyn otbasy dep ataımyz. Atalǵan aıat otbasynyń meıirimdilik pen súıispenshilikke negizdelgenin kórsetedi», dedi Bas múftı.
