Fotolar: Oqu-agartu ministrligi
Saltanatty sharaǵa premer-mınıstrdiń orynbasary Tamara Dúısenova, Oqý-aǵartý mınıstri Ǵanı Beısembaev, sondaı-aq iri kompanııalardyń, kásiporyndar men uıymdardyń ókilderi, kolledj stýdentteri, sarapshylar qatysty.
Oqý-aǵartý mınıstrligi baspasóz qyzmetiniń málimdeýinshe festıval qonaqtaryn qarsy ala otyryp, mınıstr tehnıkalyq jáne kásiptik bilim berý júıesin transformasııalaýdyń mańyzyn atap ótti. 2025 jyldyń 1 qyrkúıeginen bastap kolledjderdi jan basyna shaqqandaǵy qarjylandyrý kólemi eki esege ulǵaıady. Qazirgi ýaqytta kolledjderge 518 kásiporyn sheftik qamqorlyq kórsetedi, al bolashaqta olardyń sanyn 4 myńǵa deıin arttyrý josparlanyp jatyr.
«Jumysshy mamandyqtar jylynda iske asyrylatyn negizgi is-sharalardyń biri elimizdiń 10 kolledjin ınternasıonaldandyrý bolmaq. Negizgi maqsat – olardyń jahandyq deńgeıde básekege qabilettiligin arttyrý jáne bilim berý baǵdarlamalaryn halyqaralyq standarttarǵa sáıkestendirý. Atom energetıkasy boıynsha mamandardy daıarlaýda Vengrııanyń tájirıbesin engizý, sondaı-aq Qytaıdyń IT, dron qurastyrý jáne mashına jasaý salasyndaǵy tájirıbesin qoldaný josparlanyp», dedi Ǵanı Beısembaev.
Sonymen qatar Astanada tehnıkalyq jáne kásiptik bilim berý uıymdarynyń stýdentterin qoldaý jáne damytý maqsatynda Ulttyq quzyrettilik ortalyǵy qurylady. Mundaı ortalyq Qytaıda, Ońtústik Koreıada jáne BAÁ-de tabysty jumys istep jatyr. Al osy kúzde Aqtaýda TurkicSkills - túrkitildes elder arasynda I-shi kásibı sheberlik chempıonaty ótedi.
Aıta keteıik, «Jumysshy mamandyqtar qalasy» festıvali — Jumysshy mamandyqtarynyń jylyn resmı túrde ashatyn alǵashqy is-shara. Bul bolashaq mamandardyń, jumys berýshilerdiń, tehnıkalyq jáne kásiptik bilim berý uıymdarynyń ózara yntymaqtastyǵy úshin qurylǵan alań. Festıvaldiń biregeı formaty qonaqtarǵa ártúrli kásipterdiń erekshelikterimen tanysýǵa jáne ınteraktıvti alańdar men mamandandyrylǵan jabdyqtardyń kómegimen ekonomıkanyń túrli salasynda ózderin synap kórýge múmkindik beredi.
«Jumysshy mamandyqtary qalasynda» segiz taqyryptyq kóshe ashyldy: taý-ken isi jáne metallýrgııa, mashına jasaý jáne kólik, energetıkter men munaıshylar, aýyl sharýashylyǵy, sý sharýashylyǵy mamandary, qurylysshylar, sondaı-aq qutqarýshylar, órt sóndirýshiler, medısına kósheleri, sondaı-aq bolashaq mamandyqtaryna arnalǵan kósheler de bar. Sonymen qatar kásibı damýdyń túrli salalary men baǵyttaryn kórsetetin 40 kreatıvti úı usynylǵan.
Birneshe kún ishinde qala aýmaǵynda túrli semınarlar men master-klasstar, munaı jáne energetıka ónerkásibi taqyryptary boıynsha hakaton, kásipter sherýi, bos oryndar jármeńkesi, startaptardyń tusaýkeserleri, konsertter men trenıngter ótedi.
Festıvaldi uıymdastyrýshy – Oqý-aǵartý mınıstrligi, oǵan ónerkásip jáne qurylys, kólik, energetıka, aýylsharýashylyǵy, ekologııa jáne tabıǵı resýrstar, sý resýrstary jáne ırrıgasııa, sıfrlyq damý, ınnovasııalar jáne aeroǵarysh ónerkásibi, tótenshe jaǵdaılar, densaýlyq saqtaý mınıstrlikteri, sondaı-aq Ulttyq kompanııalar men elimizdiń kásiporyndary qoldaý kórsetti.
Aıta keteıik, Qazaqstannyń kásiptik-tehnıkalyq bilim berý júıesinde 772 kolledj jumys isteıdi, onda 556 myń stýdent oqıdy. Memleket basshysynyń qoldaýynyń arqasynda 2 jyl ishinde kolledj stýdentteriniń stıpendııasy eki ese ósti. 2025 jyly stýdentterdi suranysqa ıe mamandyqtar boıynsha tegin tehnıkalyq jáne kásiptik bilimmen qamtý 153 myńdy quraıdy, bul ótken jylmen salystyrǵanda 10 myńǵa artyq. Memlekettik tapsyrystyń 70% - y mashına jasaý, kólik, energetıka, IT, qurylys jáne t. b. qosa alǵanda, tehnıkalyq mamandyqtarǵa baǵyttalatyn bolady.
