«SalSeri» sýret galereıasyndaǵy kórme – jyldyń eń ádemi mezgiline arnalyp «Kóktemniń oıanýy» dep atalypty. Kórme – beıneleý shyǵarmashylyǵy arqyly jastardy rýhanı tárbıeleýdi, Otanǵa, týǵan ólke – aýylǵa, eńbek adamdaryna degen súıispenshilikti arttyrýdy, estetıkalyq mádenıetti qalyptastyrýdy kózdeıdi.
Atalǵan kórmege qatysqan 5 sýretshi de Qazaqstannyń Dızaınerler Odaǵy men Sýretshiler Odaǵynyń músheleri ári shetelderge de birshama belgili tulǵalar. Atap aıtqanda, Nıý-Iorkte ótken «Art-Ekspo 2011» halyqaralyq baıqaýynyń laýreaty, eńbekteri birneshe jınaq kitapqa engen sýretshi Baqytnur Býrdesbekov, Eýrazııalyq Dızaınerler Odaǵynyń jáne Reseı Sýretshiler kásiptik odaǵynyń (PSHR) múshesi, «Artekspo Nıý-Iork-2011» baıqaýynyń altyn medal ıegeri, Ulttyq dızaın akademııasynyń akademıgi, mádenıet qaıratkeri Tóleýǵazy Baıǵalıev, Qazaqstan men Reseıdiń kórmeleri men konkýrstarynyń qatysýshysy, jumystary QR murajaılarynda jáne AQSh pen Eýropadaǵy jeke kolleksııalarda qoıylǵan Tabyn Qylyshbaı, «Shabyt» halyqaralyq shyǵarmashylyq jastar festıvaliniń laýreaty, AQSh-taǵy «New York realism fine art» kórmesiniń altyn medal ıegeri, 2018 jyly «Ǵajaıyp adamdar» halyqaralyq baıqaýynyń fınalısti atanyp, kózin jumyp sýret salǵan sýretshi Renat Elýbaı, Qazaqstannyń jáne Reseıdiń kórkemóner kórmeleri men sımpozıýmdarynyń qatysýshysy, kitaptar boıynsha ıllıýstrasııalardyń avtory Ádilǵalı Baıandın qatysyp, kartınalaryn kórmege qoıdy.
Taǵylymdy sharany Májilis depýtaty, «Aýyl» partııasynyń Tóraǵasy Serik Egizbaev quttyqtaý sózimen ashty.
«Sizderdiń týyndylaryńyz kóptegen sheteldik kórmelerde usynyldy, al keıbiri AQSh, Eýropa jáne basqa da shet elderde óner baǵalaýshylarynyń jeke kolleksııalarynda tur. Shyǵarmalaryńyzdyń arqasynda álem qazaq tarıhyn, mádenıetin, turmysyn, tabıǵatyn jáne qazirgi zamanǵy Qazaqstandy tanıdy», dep sýretshilerge rızashylyǵyn bildirgen «Aýyl» partııasy Tóraǵasy S.Egizbaev kórmeni birlesip uıymdastyrǵany úshin Astana qalasynyń ákimdigine, sýretshilerge, sondaı-aq alań usynyp, kórmeni bezendirgeni úshin Arystan Smaǵulov myrzaǵa jáne onyń qyzmetkerlerine alǵys aıtty.
Aıta keteıik, atalǵan kórme «Aýyl» partııasynyń eńbek adamdaryn qoldaýdaǵy mańyzdy rólin kórsetedi, al óner – eńbek pen jasampazdyqty shabyttandyratyn ári adamdardy baılanystyratyn dáneker sala ekeni málim.
5 sýretshiniń árqaısysy jańarý ýaqyty, kóktem taqyrybyna óz kózqarasyn bildiredi, ıaǵnı, olardyń árqaısysynda tek ózine tán shyǵarmashylyq beıneleý tásili bar. Kartınalar – tabıǵat pen týǵan jer, aýylǵa degen súıispenshilik pen jylylyqqa toly.
Kórmege sýretteri qoıylǵan sýretshiniń biri, sharanyń ashylýynda quttyqtaý sóz sóılegen Ádilǵalı Baıandınniń aıtýynsha atalǵan kórmege barlyǵy 50-ge jýyq kartına qoıylǵan.
«Kórmedegi negizgi taqyryp – aýyl. Aýylda týyp óskendikten osy taqyryp salystyrmaly túrde aıtqanda bizge áldeqaıda jaqyn. О́zim 12 kartınamdy qoıdym. Birinshi kartınamda osydan júzdegen jyldar burynǵy ata- babalarymyzdyń Naýryzdy toılaǵany, ıaǵnı, aýylǵa kele jatqan qonaqtar, qazanda pisirilip jatqan baýyrsaq pen kóje, oınap júrgen balalar jáne taǵy basqa kórinisterdi beıneledim. Ekinshi kartınamda zamanaýı Astana men osy jerde kóship júrgen baıaǵy ata-babalarymyzdyń kóshin sýrettedim. Úshinshi kartınamda Astanadaǵy Naýryz meıramy, kıiz úıler, halyqtyń dýmandatyp jatqan kórinisin pash ettim. Osy tusta aıtaıyn, jalpy kıiz úıler Naýryz meıramynda ǵana emes, árdaıym tigilip tursa, elordamyzdyń óte tamasha saltanatty kórinisiniń biri bolar edi», dedi Ádilǵalı Sársenuly.
Túıindeı aıtqanda, jalpy adam balasynyń, týǵan ólkeniń, aýyldyń, qazaq dalasynyń, tabıǵattyń kóktemgi oıanýynyń sulýlylyq syrlaryn kórkemdik sheberlikpen ár túrli stılde beınelegen «Kóktemniń oıanýy» kórmesin tamashalaǵan jurt aýyldaryna oısha saıahattap, kóńilderine rýhanı áser alyp tarqasty.
Aıta keteıik, atalǵan kórme 5 naýryzǵa deıin jalǵasady.
