Kollajdy jasaǵan – Záýresh SMAǴUL ,«EQ»
Surapyl soǵys qyzyp, antalaǵan ajal alqymnan alǵan sát. Jańbyrdaı jaýǵan oq, burshaqtaı boraǵan snarıadtardyń arasynda arpalysyp júrip, aty-jóni belgisiz bir qazaq qyzy tamasha erlik kórsetedi. Júzdegen jaýyngerdi ajaldan aman alyp qalady.
«Qazaq qyzy boraǵan bombanyń, jaýǵan oqtyń astynda júgirip júrip járdem berdi: jarasyn tańdy, aýyr jaralylardy arqalap, tylǵa tasydy. «Myna qazaq qyzy qorqýdy bilmeıdi. Netken júrekti jan deseńshi», dep tańdandy jurt» dep jazady maqala avtory.
Urys sozylyp, jaý kúsh alyp, qyzyl áskerden nebári 60 avtomatshy men eki pýlemetshi ǵana qalady. Kenet pýlemetshiniń biri oqqa ushyp, ıesiz qarýdy qazaq qyzy alady da, tónip kelgen jaýǵa oq jaýdyra bastaıdy. Jaý áskeri kóp qyrǵynǵa ushyrap, keri sheginedi.
Shegingen jaýdy qýyp kele jatyp, avtordyń ózi qalpaqtaı ushqan. Birer mınýt es-tússiz jatyp esin jıǵanda álgi qazaq qyzy jigerlendire sóılep, basyn súıep otyrǵanyn aıtady.
Maqala avtory batyr qyzdyń aty-jónin suramaǵanyna ókinip, oǵan oıynsha «Qazaq qyzy» degen at qoıyp alady. Aýrýhanada eki aı emdelip, basqa qalaǵa kelgende baıaǵy qyzben qaıta joly túıisedi.
«Jón surastyq. – Tereńózekte týyp, Qyzylorda, Almaty qalalarynda óstim, – dep bastady qyz sózin. – 1936 jyly Qyzylordadaǵy medısınalyq tehnıkýmdy bitirdim. Sol jyly Almatydaǵy medısına ınstıtýtyna túsip, 1940 jyly bitirip shyqqanmyn. Bir jyldan keıin armııa qataryna alyndym. Sodan beri aldaǵy lınııadaǵy aýrýhanada bolyp, munda jaqynda ǵana keldim. Birneshe qandy qyrǵynnyń ishinde boldym», dep qyz sózin tuıyqtap berdi», deıdi Sultan Qojanııazuly.
Qyzyǵy, «Sosıalıstik Qazaqstan» gazetinde jarııalanǵan materıalda maıdandaǵy qazaq qyzynyń aty sol kúıi atalmaǵan. Qyzylorda oblysy Tereńózek aýdanyna qarasty «Qyzyl dıhan» ujymsharyndaǵy Qaıralap qarttyń jalǵyzy ekeni ǵana tilge tıek bolypty.
Qazaq qyzy Qaıralapovanyń budan keıingi taǵdyry múldem belgisiz. Belgilisi, jer álemdi sum soǵystyń oty oraǵanda shybyn janyn shúberekke túıip, qanatymen sý sepken qarlyǵashtarymyz bolǵan.
Ol qarlyǵashtyń rýhy qazaqpen birge máńgilikke jasaı bermek.
