Joǵarydaǵy jaǵdaıdan keıin UFC basshylyǵy reıtıngte 9-orynda turǵan Stıv Ersegtiń ornyna dereý basqa sportshyny izdedi. Kóp keshikpeı Asýdyń qarsylasy retinde Allan Nasımentonyń esimi ataldy. «Taza súıek» degen búrkenshik atpen tanylǵan 33 jastaǵy Brazılııanyń ókili 2011 jyldan beri aralas jekpe-jekti serik etedi. Biraq keıinnen Nasımentonyń basqa bireýmen aıqasatyny belgili boldy. Qandasymyz endi portýgalııalyq Manel Kapemen kúsh synasady. Manel Angolada týyp, keıinnen Portýgalııaǵa qonys aýdarǵan. 31 jastaǵy faıter aralas jekpe-jektegi tusaýkeser kezdesýin 2012 jyldyń kókteminde ótkizdi. Barlyǵy 27 ret aıqas alańyna shyǵyp, 20 ret jeńiske jetti. 17 básekede aıqyn basymdyq tanytty. Búrkenshek esimi – «Starboy» («Juldyzdy jigit»). 2019 jyly Pıreneı túbeginen kelgen kókjal Saıtamadaǵy Rizin 20 týrnırinde Kaı Asakýradan aılasyn asyryp, sol promýshenniń chempıony atandy. 2021 jyly UFC-ge qabyldandy. Álemdegi eń beldi uıymdaǵy alǵashqy eki kezdesýinde Aleshandro Pantoja men Mateýs Nıkolaýdan utyldy. Odan keıin Ode Osborn, Jalǵas Jumaǵulov, Devıd Dvorak, Felıpe Dos Santosqa san soqtyrdy. Byltyr eki jekpe-jek ótkizdi. Jazda Muhammad Mokaevtan jeńilse, qysta Brýno Gýstavo da Sılvany esinen tandyrdy.
Jambyl oblysy Sarysý aýdanynda dúnıege kelgen Asý Almabaev 25 qańtarda 31 jasqa toldy. 2013 jyldan beri kásipqoılar arasynda baq synap júr. Rekordy – 23 jekpe-jek, 21 jeńis, 12 nokaýt, 2 jeńilis. Asý úshin 2017 jyl sátsiz boldy. Qazaq faıteri Tagır Ulanbekov pen Mehman Mámedovten utyldy. Sátsizdikten sabaq alǵan Almabaev qatarynan 17 básekede basymdyq tanytty. 2019 jyly M-1 Global promoýsheniniń ýaqytsha chempıony atandy.
Uzaq ýaqyt boıy ASV, Alash Praıd, Tech-Krep, Fight Nights, Naıza, M-1 Global, Brave sekildi uıymdarda kúsh synasyp, biraz tájirıbe jınaqtaǵan Asý 2023 jylǵy 5 tamyzda UFC-degi tusaýkeser kezdesýin ótkizdi. Neshvılde ıamaıkalyq Oda Osborndy «qylqyndyrý» tásilimen utty. Byltyr amerıkalyq Karlos Vergara, Hose Djonsondy, brazılııalyq Mateýs Nıkolaýdy tóreshilerdiń sheshimimen jeńdi. Osy tabystarynyń arqasynda reıtıngte 8-orynǵa kóterildi.
Qazirde mamandar Almabaevtyń áleýetin joǵary baǵalap otyr. Bul salmaqtyń chempıony – Aleshandre Pantoja (Brazılııa). Brendon Roıval (AQSh), Brendon Moreno (Meksıka), Ámir Albazı (Iran), Kaı Kara-Frans (Jańa Zelandııa), Tasýro Taıra (Japonııa), Manel Kape (Angola), Aleks Peres (AQSh) syndy sańlaqtar reıtıngte bizdiń jigitten joǵary tur. Desek te Asýdyń alar asýlary áli alda. Osy jekpe-jekte jeńiske jetse taǵy birneshe satyǵa bıikteıdi. Jeńisti joly jalǵasyn tapsa, chempıondyq tájge de talasatyn bolady.
