Sýretterdi túsirgen – Erlan OMAR, «EQ»
Meshitte, túrli jıynda, sondaı-aq áleýmettik jelide san myńdaǵan adamnyń sanasyna ıman sáýlesin quıǵan din qyzmetkerleriniń qoǵamdy adamgershilik jolyna tárbıeleýdegi eńbegi ushan-teńiz. Degenmen keıde bazbir ýaǵyzshynyń qate tujyrym jasap qoıyp, qoǵamdyq pikirtalasqa túrtki bolatyn kezderi de bar. «Jańylmaıtyn jaq joq» degenmen, dúıim eldi aýzyna qaratqan dinı kóshbasshylardyń jurt aldyndaǵy sóıleıtin sózin jeti ret ólshep, bir ret piship aıtqany durys-aq. Keshe Astanada Qazaqstan musylmandary dinı basqarmasynyń uıymdastyrýymen ótken «Qoǵamda izgilikti nasıhattaýdyń mádenıeti» II Respýblıkalyq ýaǵyzshylar forýmynda osy másele kóterilip, keńinen talqyǵa salyndy.
Jıynǵa qatysqan Memlekettik keńesshi Erlan Qarın Prezıdent Qasym-Jomart Toqaevtyń Ulttyq quryltaıda kótergen adamgershilik pen jaýapkershilik, ádildik pen adaldyq, birlik pen yntymaq syndy qundylyqtardy qoǵamda keńinen dáripteýdiń mańyzyna aıryqsha toqtaldy. Sonymen qatar Prezıdent atap ótken áleýmettik keseldermen kúresýdiń ózektiligin tilge tıek etti.
«Qasym-Jomart Kemeluly asyl dinimizdi damytýǵa, onyń ultty uıystyrý jolyndaǵy róline joǵary mán beredi. Shyn máninde bizdiń basty baılyǵymyz – eldiń birligi men turaqtylyǵy. Yntymaǵymyzdy nyǵaıtý jolynda bárimiz eńbek etýimiz kerek. Osy turǵyda bul forýmnyń ıdeıasy men maqsaty durys. Sizderdiń eldi ımandylyqqa uıytýdaǵy, aýyzbirshilik pen adamgershilikke shaqyrýdaǵy eńbekterińiz zor», dedi E.Qarın.
Memlekettik keńesshi sóz arasynda Bas múftı Naýryzbaı qajy Taǵanulynyń dinı termınderdi qazaqsha aıtý týraly oıyn quptady. QMDB tóraǵasy jas býyn ókilderiniń aýyzashardy «ıftar», sáresin «sýhýr» dep aıtyp júrgeni kóńilge qaıaý túsiretinin aıtqan edi. Babalar jolyn ustanǵan urpaq retinde ózge tilden engen dinı termınderden barynsha aýlaq bolyp, ózimizdiń ata-babamyzdan qalǵan jaqsy sózderdi qoldanyp, ana tilimizge qurmet kórsetýge shaqyrdy.
Forýmda sóz alǵan Bas múftı Naýryzbaı qajy Taǵanuly byltyr birinshi ret ýaǵyzshylar forýmyn ótkizip, «Ýaǵyz-nasıhat aıtýdyń ádebi men mádenıeti» qujaty qabyldanǵanyn atap ótti.
«Mundaǵy maqsatymyz – ýaǵyzshylardyń qoǵam aldyndaǵy jaýapkershiligin arttyrý. О́ıtkeni ýaǵyz aıtý – úlken jaýapkershilikti talap etetin is. Ýaǵyzshy eń aldymen óziniń ádebi men mádenıetin jetildirip, jyly sózben, sabyrlyqpen, dáleldi túrde nasıhat aıtsa, adamdardyń júregine ıman qundylyqtary uıalaıdy. Qazaqstan musylmandary dinı basqarmasy otbasyndaǵy ózara meıirimdilik, izgilik, adamgershilik syndy asyl qasıetterimizdi jańǵyrtý úshin 2025 jyldy dinı qyzmet aıasynda «Islam jáne otbasy qundylyǵy» jyly dep jarııaladyq. Alla qalasa, ıgi bastama aıasynda birneshe is-sharany júzege asyramyz. Osy rette ýaǵyzshylardy el arasynda otbasy qundylyǵy jaıly belsendi nasıhat aıtýǵa shaqyramyn», dedi Bas múftı.
Jıyn barysynda Mádenıet jáne aqparat vıse-mınıstri Qanat Ysqaqov, naıb múftıler Kenjetaı Dúısenbaı men Sansyzbaı Shoqanov, QMDB Ýaǵyz-nasıhat bóliminiń meńgerýshisi Batyrjan Mansurov, Mádenıet jáne aqparat mınıstrligi Din isteri komıtetiniń basqarma basshysy Japal Dolıev sóz alyp, qoǵamdaǵy ýaǵyz aıtý mádenıetine qatysty oılaryn ortaǵa saldy.
Forým aıasynda ımamdarǵa arnalǵan aqparattyq-oqý semınary ótip, ýaǵyzshylarǵa qoǵamda túsinbeýshilik týdyratyn taqyryptardy qozǵamaý, birjaqty pátýa bermeý, QMDB bekitken pátýalarǵa súıený, sondaı-aq dástúrli rýhanı qundylyqtardy keńinen nasıhattaý qajettiligi túsindirildi. Is-shara sońynda «Úgit-nasıhat aıtýdyń tártiptik erejesi» qujaty qabyldandy.
