Sýret: intlaffairs.hku.hk
Shynynda da, búgingi bilim salasynyń kóshbasshysyna qandaı quzyret qajet, sondaı-aq ozyq tehnologııany, jasandy ıntellektini jáne strategııalyq ózgeristerdi basqarýdy bilim júıesine qalaı engizýge bolady? Osy suraqtarǵa «Bilim berýdegi óńirlik kóshbasshylyq: ınnovasııalar jáne jasandy ıntellekt is-árekette» atty kásibı damý baǵdarlamasynyń sarapshylary jaýap beredi.
Oqytý kýrsy Qorqyt ata atyndaǵy Qyzylorda ýnıversıteti men Á.Marǵulan atyndaǵy Pavlodar pedagogıkalyq ýnıversıtetimen birlesip ótkiziledi. Negizgi sessııalardy Seýl ulttyq ýnıversıtetiniń sarapshylary júrgizedi. Jańa baǵdarlama óńirlik bilim bólimi jetekshileriniń basqarý jáne kóshbasshylyq daǵdylaryn damytýǵa baǵyttalǵan. Oǵan 90-ǵa jýyq oblystyq, qalalyq jáne aýdandyq bilim bólimderiniń basshylary, mektep jáne kolledj dırektorlary qatysady.
NU vıse provosty, Joǵary bilim mektebiniń dekany Aıda Saǵyntaevanyń aıtýynsha, búginde bilim salasy derbestendirilip, sıfrlyq jáne yqpaldastyq arta túsken.
«Eger buryn oqý úderisi barlyǵyna birdeı bolsa, qazir ol oqýshynyń jeke qajettiligine beıimdelgen. Bir jaǵynan, sıfrlandyrý klassıkalyq mekteptiń aýmaǵyn keńeıtti. Qazir tehnologııa, JI, onlaın platformalar oqytýdy ınteraktıvti jáne qoljetimdi etip otyr. Sondaı-aq menedjerlerge jasandy ıntellektini paıdalaný trend emes. Bul – jańa shyndyq», degen ol jasandy zerde arqyly alynǵan aqparatty muqııat tekserip, taldaý qajettigin eske saldy.
Oqytý kýrsyna arnalǵan baǵdarlama 10 modýlden turady. Onda bilim men tehnologııa jáne menedjment salasyndaǵy jetekshi sarapshylardy biriktirip, qatysýshylarǵa kóshbasshylyq daǵdylardy jetildirý, basqarýdyń ınnovasııalyq quraldaryn meńgerý sekildi erekshe múmkindikter qarastyrylǵan.
Joǵary bilim mektebiniń qaýymdastyrylǵan professory Mır Afzaldyń sózine zer salsaq, qatysýshylar kýrs barysynda kóshbasshylyqtyń jańa tujyrymdamasymen tanysady.
«Bul álemge kúrt ózgeris ákelgen jasandy ıntellekt dáýirinde óte qajet. Jasandy ıntellekti oqý baǵdarlamasyna, oqytýǵa jáne mektepti basqarýǵa kiriktirilmeı eshqandaı bilim salasy damymaıdy. Sondyqtan biz ustanatyn negizgi tujyrymdama: kóshbasshylyq qyzmet emes, ol – tájirıbe», dedi professor.
Aıta keteıik, bul baǵdarlama «Academic Leadership Institute: Executive Academic Leadership Programme» jáne «Deans’ School» sııaqty tabysty bastamalardyń jalǵasy. Buǵan deıin osy baǵdarlama sheńberinde otandyq joǵary oqý oryndarynyń 80 rektory men dekany biliktiligin jetildirgen. Jalpy alǵanda, NU Joǵary bilim mektebi qurylǵannan beri 27 myńnan astam bilim salasynyń qyzmetkeri kásibı daıarlyqtan ótken.
